“Naagbee lɛ, nyɛmimɛi, nɔ fɛɛ nɔ ni ji anɔkwale, nɔ fɛɛ nɔ ni sa woo, nɔ fɛɛ nɔ ni ja, nɔ fɛɛ nɔ ni he tse, nɔ fɛɛ nɔ ni hãa ajieɔ suɔmɔ kpo, nɔ fɛɛ nɔ ni awieɔ he ekpakpa, nɔ fɛɛ nɔ ni hi jogbaŋŋ, kɛ nɔ fɛɛ nɔ ni sa yijiemɔ lɛ, nyɛyaa nɔ nyɛsusua enɛɛmɛi ahe.”​—Filipibii 4:8, Jeŋ Hee Shishitsɔɔmɔ.

 “Nɔ ni eshwɛ lɛ, anyɛmimɛi, nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa lɛ fɛɛ, kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa!”​—Filipibii 4:8, Ga Biblia momo.

 Nibii ni adesai susuɔ he lɛ kã Nyɔŋmɔ tsui nɔ waa, yiŋtoo titri hewɔ ji akɛ, wɔsusumɔi náa wɔnifeemɔi anɔ hewalɛ. (Lala 19:14; Marko 7:20-23) No hewɔ lɛ, mɛi ni miisumɔ ni amɛsa Nyɔŋmɔ hiɛ lɛ kpoɔ susumɔi ni Nyɔŋmɔ naa lɛ akɛ ehiii lɛ, ni yɛ no najiaŋ lɛ, amɛsusuɔ nibii ni ekpɛlɛɔ nɔ lɛ ahe.

 Ŋmalɛ nɛɛ tsĩ nibii kpaanyɔ komɛi ni esa akɛ Kristofoi ‘aya nɔ asusu he’ loo amɛya nɔ amɛjwɛŋ nɔ be fɛɛ be lɛ atã.

•   “Nɔ fɛɛ nɔ ni ji anɔkwale.” Wiemɔ nɛɛ tsɔɔ nibii kpakpai ni abaanyɛ akɛ he afɔ̃ nɔ tamɔ saji ni yɔɔ Nyɔŋmɔ Wiemɔ ni ji Biblia lɛ mli lɛ.​—1 Timoteo 6:20.

•   “Nɔ fɛɛ nɔ ni sa woo.” Wiemɔi nɛɛ damɔ shi kɛhã saji ni he hiaa waa. Jeee saji bibii ni he ehiaaa, loo hiɛaŋhiɛaŋ nɔ. Moŋ lɛ, amɛyeɔ amɛbua Kristofonyo koni ewaje efai shi ni etswa akɛ ebaafee nɔ ni ja be fɛɛ be lɛ.​—Tito 2:6-8.

•   “Nɔ fɛɛ nɔ ni ja.” Wiemɔ nɛɛ damɔ shi kɛhã yiŋkpɛi kɛ nifeemɔi ni ja yɛ Nyɔŋmɔ shishitoo mlai anaa, jeee adesai asusumɔ naa.​—Abɛi 3:5, 6; 14:12.

•   “Nɔ fɛɛ nɔ ni he tse.” Wiemɔ nɛɛ damɔ shi kɛhã susumɔi kɛ yiŋkpɛi ni he tse ni yɔɔ krɔŋŋ, jeee yɛ bɔlɛnamɔ saji agbɛfaŋ pɛ kɛkɛ, shi yɛ nibii fɛɛ amli.​—2 Korintobii 11:3.

•   “Nɔ fɛɛ nɔ ni hãa ajieɔ suɔmɔ kpo.” Wiemɔ nɛɛ damɔ shi kɛhã nibii ni sa ni hãa asumɔɔ mɔ moŋ fe ni abaanyɛ mɛi, abaabɛ mɛi awo mli, loo abaabe.​—1 Petro 4:8.

•   “Nɔ fɛɛ nɔ ni awieɔ he ekpakpa.” Enɛ damɔ shi kɛhã nibii ni hãa mɛi náa jwɛŋmɔ ni ja yɛ mɛi krokomɛi ahe, ni mɛi ni yɔɔ bulɛ kɛhã Nyɔŋmɔ lɛ nyaa he.​—Abɛi 22:1.

•   “Nɔ fɛɛ nɔ ni hi jogbaŋŋ.” Wiemɔ nɛɛ damɔ shi kɛhã nibii ni hi jogbaŋŋ yɛ jeŋba gbɛfaŋ yɛ Nyɔŋmɔ mlai lɛ anaa. Amɛji nifeemɔi ni shĩ ko kwraa bɛ he.​—2 Petro 1:5, 9.

•   “Nɔ fɛɛ nɔ ni sa yijiemɔ.” Wiemɔ nɛɛ damɔ shi kɛhã nibii ni sa yijiemɔ jogbaŋŋ, titri lɛ nibii ni Nyɔŋmɔ sumɔɔ. Nibii ni Nyɔŋmɔ diɛŋtsɛ hu efee ni sa yijiemɔ lɛ ji nibii ni esa akɛ adesai asusu he, ni amɛjie eyi yɛ he be fɛɛ be.​—Lala 78:4.

 Be ni bɔfo Paulo ŋmaa saji ni yɔɔ Filipibii awolo lɛ mli ni akɛhã Kristofoi ni yɔɔ Filipi lɛ, no mli lɛ, awo lɛ tsũŋ yɛ lɛ diɛŋtsɛ eshĩa yɛ Roma. Fɛɛ sɛɛ lɛ, mɛi ni tsɔɔ amɛjwɛŋmɔ yɛ nibii ni aŋmala yɛ Biblia lɛ mli lɛ ahe lɛ wie akɛ, eji wolo ni hãa mɔ náa miishɛɛ, ejaakɛ wiemɔi ni yɔɔ mli lɛ hãa mɔ tsui nyɔɔ emli ni emii shɛɔ ehe.​—Filipibii 1:3, 4, 7, 8, 18; 3:1; 4:1, 4, 10.

 Paulo sumɔɔ enyɛmimɛi Kristofoi ni yɔɔ Filipi lɛ waa aahu akɛ, esumɔ ni amɛ hu amɛná miishɛɛ kɛ toiŋjɔlɛ ni no mli lɛ eyɔɔ lɛ eko. (Filipibii 2:17, 18) No hewɔ lɛ, be ni Paulo gbe ewolo ni eŋma kɛyahã Filipibii lɛ naa lɛ, ewo amɛ hewalɛ ni amɛjie sui ni baahã amɛná miishɛɛ kpo, ni amɛhiɛ akã shi, ni amɛkɛ amɛhiɛ afɔ̃ Nyɔŋmɔ nɔ yɛ sɔlemɔ mli be fɛɛ be, ni amɛkɛ amɛjwɛŋmɔ ama nibii ni baahã toiŋjɔlɛ ahi amɛ kɛ Nyɔŋmɔ teŋ lɛ anɔ.​—Filipibii 4:4-9.

 Kwɛmɔ Filipibii awolo lɛ hiɛkpamɔ vidio kuku nɛɛ.