Maki 15:1-47
15 Tlóló e ayǐ hɔ́n é ɔ, vɔ̌sánúxwlémawutɔ́gán lɛ́, tomɛxó lɛ́ kpó sɛ́nkplɔ́nmɛtɔ́ lɛ́ kpó, énɛ́ wɛ nyí Hwɛɖɔxɔsá ɖaxó Jwifu lɛ́ tɔn ɔ blěbú, ɖe wě ɖó kpɔ́, bo blá Jezu lobo kplá ɛ yi jó nú Pilátu.
2 Énɛ́ wú ɔ, Pilátu kanbyɔ́ ɛ ɖɔ: “Hwi wɛ nyí Axɔ́sú Jwifu lɛ́ tɔn a?” É ka yí gbe n’i ɖɔ: “É nɛ́ a ɖɔ pɛ́ɛ́ nɛ́.”
3 Vɔ̌sánúxwlémawutɔ́gán lɛ́ ka ɖo nǔ gěgé sín hwɛ dó è wɛ.
4 Din ɔ, Pilátu lɛ́ jɛ nǔ kanbyɔ́ ɛ jí, bo ɖɔ: “A ɖó xó ɖé ná ɖɔ ǎ cé? Kpɔ́n hwɛ tobutóbú e dó we wɛ yě ɖe é.”
5 Amɔ̌, Jezu sɔ́ ná xósin ɖě ǎ, bɔ énɛ́ jí wǔ nú Pilátu.
6 Ðo Dǐndínwáyixwe ɖokpó ɖokpó hwenu ɔ, é ko ɖó walɔ bo nɔ ɖe gantɔ́ e yě byɔ́ é ɖokpó nyi te nú yě.
7 Hwenɛ́nu ɔ, nya e è nɔ ylɔ́ ɖɔ Balabási é ɖo ganmɛ, é kpó gǔfɔ́ntɔ́ lɛ́ kpó. Ðo gǔfínfɔ́n yětɔn mɛ ɔ, yě ko hu mɛ.
8 Énɛ́ ɔ, ahwan ɔ wá, bo jɛ nǔ e ba wɛ yě ɖe é byɔ́ Pilátu jí, sɔgbe xá nǔ e é ko nɔ bló nú yě é.
9 É yí gbe nú yě ɖɔ: “Mi ba ɖɔ má ɖe Axɔ́sú Jwifu lɛ́ tɔn nyi te nú mi a?”
10 Ðó Pilátu mɔ ɖɔ wǔhwinhwan* wɛ zɔ́n bɔ vɔ̌sánúxwlémawutɔ́gán lɛ́ jó è.
11 Amɔ̌, vɔ̌sánúxwlémawutɔ́gán lɛ́ sísɛ́ ahwan ɔ ɖɔ yě ní byɔ́ ɖɔ é ní ɖe Balabási nyi te nú émí ɖó tɛn tɔn mɛ.
12 Pilátu lɛ́ yí gbe nú yě ɖɔ: “Bɔ étɛ́ un ka ɖó ná wa nú mɛ e mi nɔ ylɔ́ ɖɔ Axɔ́sú Jwifu lɛ́ tɔn é?”
13 Yě lɛ́vɔ́ sú xó bo ɖɔ: “Xwe è nyi atín wú!”
14 Amɔ̌, Pilátu lɛ́ ɖɔ nú yě ɖɔ: “Étɛ́wú? Nǔ nyanya tɛ́ é ka wa?” É ɖo mɔ̌ có, yě lɛ́vɔ́ sú xó syɛ́nsyɛ́n d’é jí bo ɖɔ: “Xwe è nyi atín wú!”
15 Énɛ́ ɔ, ɖó Pilátu jló ná hɛn xomɛ hun ahwan ɔ wútu ɔ, é ɖe Balabási nyi te nú yě; bɔ ée é ɖɔ bɔ è sɔ́ lanbá dó xo Jezu ná gúdo é ɔ, é sɔ́ ɛ dó alɔ mɛ nú yě bónú yě ní xwe è nyi atín wú.
16 Din ɔ, sɔ́ja lɛ́ kplá Jezu yi kɔ́xota; énɛ́ wɛ nyí ɖo tokpɔngán ɔ sín hɔnmɛ, bɔ yě ylɔ́ ahwankpá ɔ blěbú kplé.
17 Yě dó awu vɔvɔ e wi d’é mɛ é n’i, bo sɔ́ wun dó lɔn axɔ́súgbákún ná, lobo sɔ́ xwe n’i.
18 Bɔ yě jɛ gbe dó è jí ɖɔ: “Kú dó lěhwenu,* Axɔ́sú Jwifu lɛ́ tɔn!”
19 Gɔ́ ná ɔ, yě nɔ zin fántín dó ta n’i, bo nɔ tún atán kɔn nyi wǔ tɔn; yě lɛ́ jɛ kpo bo ɖe kɔ́* n’i.
20 Gǔdo mɛ ɔ, ée yě cá n’i kpé é ɔ, yě ɖe awu vɔvɔ e wi d’é mɛ ɔ n’i, bo sɔ́ awu tɔn aga tɔn lɛ́ dó n’i. Énɛ́ gúdo ɔ, yě kplá ɛ tɔ́n, bo ná yi xwe è nyi atín wú.
21 Gɔ́ ná ɔ, yě hɛn aligbɔntɔ́ e gosín gletoxo ɔ mɛ é ɖé gǎnnugǎnnu bónú é ná hɛn yatín* Jezu tɔn. Silenɛ́ɛnu, éé nɔ nyí Sinmɔ́ɔ, bo nyí tɔ́ nú Alɛsándlu kpó Hlufúsi kpó é wɛ.
22 Énɛ́ ɔ, yě kplá ɛ yi fí e è nɔ ylɔ́ ɖɔ Gɔlugɔ́ta é; tínmɛ tɔn wɛ nyí “Takágo tɛnmɛ.”
23 Ðo fínɛ́ ɔ, yě tɛ́n kpɔ́n bo ná ná ɛ vɛ̌ɛn e è cáká kpó mǐla kpó é,* amɔ̌, é ba ná nu ǎ.
24 Bɔ yě xwe è nyi atín ɔ wú, bo nyi akɔ dó awu tɔn aga tɔn lɛ́, bo ná dó tuun ée mɛ ɖokpó ɖokpó ná yí é lobo má.
25 Din ɔ, gan tɛ́nnɛ zǎnzǎn tɔn mɔ̌ wɛ ɖo xixo wɛ* hwenu e è xwe è nyi atín wú é.
26 Hwɛ e è dó è é sín nǔwlánwlán ɔ ɖɔ: “Axɔ́sú Jwifu lɛ́ tɔn.”
27 Gɔ́ ná ɔ, yě xwe ajotɔ́ we nyi atín wú ɖo akpá tɔn; mɛ ɖě ɖo ɖisí tɔn xwé, mɛ ɖě ɖo amyɔ tɔn xwé.
28 *——
29 Bɔ mɛ ɖěɖěe ɖo wǐwá yi wɛ lɛ́ é nɔ zun i, bo nɔ húnhún ta, lobo nɔ ɖɔ: “Wǒó nú we! Hwi mɛ e ɖɔ émí ná mu tɛ́npli ɔ, bɔ ɖo azǎn atɔn vlamɛ ɔ, émí ná gbá é ɔ,
30 jɛ te sín yatín* ɔ jí dó hwlɛ́n hwiɖée gán.”
31 Mɔ̌ ɖokpó ɔ, vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó lɔ ɖo cícá n’i wɛ ɖo yěɖée tɛ́ntin, bo nɔ ɖɔ: “É hwlɛ́n mɛ ɖěvo lɛ́, é ka sixú hwlɛ́n éɖée ǎ!
32 Klísu, Axɔ́sú Izlayɛ́li tɔn ɔ, ní jɛ te sín yatín* ɔ jí din, énɛ́ ɔ, mǐ ná mɔ, bo ɖi nǔ.” Mɛ e è xwe nyi atín wú ɖo akpá tɔn lɛ́ é lɔmɔ̌ tlɛ ɖo zunzun i wɛ.
33 Hwenu e é xo gan 12 hwemɛ tɔn mɔ̌ é ɔ,* ablu dó ɖo ayǐ ɔ bǐ jí, káká jɛ gan atɔn mɛ hwemɛ mɔ̌.*
34 Ðo gan atɔn mɛ hwemɛ mɔ̌ ɔ, Jezu sú xó tlílí bo ɖɔ: “Eli, Eli, lama sabakitani?” Tínmɛ tɔn wɛ nyí: “Mawu ce, Mawu ce, étɛ́wú a ka jó mì dó?”
35 Ée mɛ e ɖo te sɛkpɔ́ fínɛ́ lɛ́ é ɖé lɛ́ se mɔ̌ é ɔ, yě jɛ ɖiɖɔ jí ɖɔ: “Mi kpɔ́n! É ɖo Elíi ylɔ́ wɛ.”
36 Énɛ́ ɔ, mɛɖé dó wezun, bo nylɔ́ xumɛtekan dó vɛ̌ɛn sinvɛ́sinvɛ́ mɛ, lobo zé slɔ́ fántín nu, bo ná ɛ bónú é ní nu, lobo ɖɔ: “Mi jó è dó! Mǐ ní kpɔ́n ɖɔ Elíi ná wá hwlɛ́n ɛ a jí.”
37 Amɔ̌, Jezu sú xó syɛ́nsyɛ́n, bɔ gbɔjɛ tɔn xwɛ.*
38 Bɔ xɔmɛgbovɔ tɛ́npli ɔ tɔn* vún ɖó we, sín aga wá do.
39 Din ɔ, ée sɔ́jakanwekogán e ɖo te ɖo nukɔn tɔn é mɔ ninɔmɛ e mɛ gbɔjɛ tɔn xwɛ ɖe lɛ́ é ɔ, é ɖɔ: “Vǐ Mawu tɔn wɛ nya élɔ́ nyí nǔgbó.”
40 Nyɔ̌nu lɛ́ lɔmɔ̌ ɖo zɔ, bo ɖo nǔ e ɖo jijɛ wɛ lɛ́ é kpɔ́n sɛ́dó wɛ. Mali Magidálanu ɔ, Mali e nyí Jaki Kpɛví* ɔ kpó Jozée kpó sín nɔ é, kpó Salomɛ́ɛ kpó ɖo yě mɛ.
41 Nyɔ̌nu énɛ́ lɛ́ nɔ xwedó è, lobo nɔ d’alɔ ɛ hwenu e é ɖo Galilée é. Nyɔ̌nu gěgé ɖěvo e zɔn kpɔ́ xá ɛ sín Jeluzalɛ́mu wá lɛ́ é lɔ ɖo yě mɛ.
42 Din ɔ, ɖó hwe ko lɛ́ kɔ bǐ, bɔ é lɛ́ nyí Nǔsísɔ́ sín azǎn gbe, énɛ́ wɛ nyí gbɔjɛzán kpo sɔ wútu ɔ,
43 Jozɛ́fu Alimatéenu, éé nyí mɛ nukúnɖéjí ɖokpó ɖo Hwɛɖɔxɔsá ɖaxó Jwifu lɛ́ tɔn, bɔ é lɔ ko ɖo te kpɔ́n Axɔ́súɖuto Mawu tɔn é wá. É kpankɔ́n bo yi Pilátu gɔ́n, lobo byɔ́ cyɔ Jezu tɔn.
44 Amɔ̌, Pilátu kanbyɔ́ éɖée ɖɔ Jezu ka ná ko kú dóó a jí. Énɛ́ ɔ, é ylɔ́ sɔ́jakanwekogán ɔ, bo kanbyɔ́ ɛ ɖɔ Jezu ko kú wɛ a jí.
45 Ée sɔ́jakanwekogán ɔ ná ɛ gǎnjɛwú ɔ gúdo é ɔ, é ná gbe Jozɛ́fu ɖɔ é ní yi sɔ́ cyɔ ɔ.
46 Ée é xɔ lɛ̌ɛnkanvɔ fɛ́ɖɛ́fɛ́ɖɛ́, bo ɖe Jezu jɛ te gúdo é ɔ, é bú lɛ̌ɛnkanvɔ fɛ́ɖɛ́fɛ́ɖɛ́ ɔ dó è, bo sɔ́ ɛ ɖó yɔdo e è ko kun dó só xomɛ é mɛ. Énɛ́ gúdo ɔ, é blí awǐnnya dó yɔdo ɔ nu.
47 Amɔ̌, Mali Magidálanu ɔ kpó Mali e nyí nɔ Jozée tɔn é kpó kpo ɖo fí e è sɔ́ ɛ ɖó é kpɔ́n wɛ.
Tínmɛ e ɖo do lɛ́ é
^ Alǒ “mɛnújlójló.”
^ Alǒ “Mǐ kan xwé byɔ́.”
^ Alǒ “wlí yɛ̌yi.”
^ Kpɔ́n Xógbe ɖé lɛ́ sín tínmɛ.
^ Énɛ́ wɛ nyí, amasin e ɖó aɖǐ é.
^ Blǔju tɔn, “ganxixo atɔngɔ́ ɔ mɛ wɛ è ɖe.”
^ Kpɔ́n Matíe 17:21, tínmɛ e ɖo do é.
^ Kpɔ́n Xógbe ɖé lɛ́ sín tínmɛ.
^ Kpɔ́n Xógbe ɖé lɛ́ sín tínmɛ.
^ Blǔju tɔn, “Bɛ́sín ganxixo ayizɛ́ngɔ́ ɔ mɛ ɔ.”
^ Blǔju tɔn, “ganxixo tɛ́nnɛgɔ́ ɔ mɛ.”
^ Alǒ “bo bɔnu.”
^ Avɔ énɛ́ wɛ gbo Tɛn mímɛ́ bǐ ɔ ɖó vo nú Tɛn mímɛ́ ɔ.
^ Xókwín “Kpɛví” ɔ sixú ɖo xlɛ́xlɛ́ wɛ ɖɔ Jaki énɛ́ kún wa ɖaxó, alǒ ɖi ga sɔ mɛsɛ́dó Jaki ɖě ɔ, éé nyí Zebeɖée ví é ó.