“Mawu ɔ, sɔgbe xá hlɔ̌nhlɔ́n tɔn e ɖo azɔ̌ wa wɛ ɖo mǐ mɛ é ɔ, é sixú wa nǔ zɛ nǔ ɖěɖěe mǐ byɔ́, alǒ sixú lin lɛ́ é bǐ wú flaflá tɔn. Énɛ́ wú ɔ, susu ní nyí étɔn.”—Efɛ́zinu lɛ́ 3:20, 21, Biblu gbɛ yɔ̌yɔ́ ɔ tɔn.

 “Mawu ɖó hlɔ̌nhlɔ́n, bo hɛn ɔ, é ná wa nǔ nú mǐ hú nǔ e mǐ byɔ́ ɛ ɔ, abǐ éé lin wɛ mǐ tlɛ ɖe ɔ gbɔn hlɔ̌nhlɔ́n e ɖo azɔ̌ wa wɛ ɖo mǐ mɛ ɔ jí. Susu nú Mawu.”—Efɛ́zinu lɛ́ 3:20, 21, MAWUXÓWÉMA.

 Mɛsɛ́dó Pɔ́lu tínmɛ jiɖe e é ɖó ɖɔ Mawu kpé wú bo ná ná sin nú ɖɛ mɛsɛntɔ́ tɔn lɛ́ tɔn, bo lɛ́ bló bɔ nǔ e ɖó nukún wɛ yě ɖe é ná jɛnu lěe yě ma sixú ko ɖó nukún tɔn gbɔn ǎ é é. É tlɛ sixú ná sin nú ɖɛ lɛ́ ɖo ali jí wǔ ɖé nu lěe è ma lin gbɔn ǎ é.

 “Sɔgbe xá hlɔ̌nhlɔ́n tɔn e ɖo azɔ̌ wa wɛ ɖo mǐ mɛ é.” Jexóva Mawu hɛn ɔ, a é ná ná mǐ hlɔ̌nhlɔ́n e sín hudó mǐ ɖó bo ná wa jlǒ tɔn é.—Filípunu lɛ́ 4:13.

 Ðo wěmafɔ 20​gɔ́ ɔ mɛ ɔ, mɛsɛ́dó Pɔ́lu tɛ ɖɛ̌ nǔ bǔnɔ ɖé jí dó nǔwúkpíkpé e Jexóva ɖó bo ná d’alɔ mɛsɛntɔ́ Tɔn lɛ́ é wú. Alɔdlɛ́ndónǔ ɖé ɖɔ xó dó xógbe e è tínmɛ dó “é sixú” é wú bo ɖɔ: “Ðiɖɔ wɛ wěmafɔ énɛ́ ɖe ɖɔ Mawu kpé wú bo ná wa nǔɖé alǒ hɛn ɔ, é ná bló nǔɖé kpowun ǎ, ɖiɖɔ wɛ é ɖe ɖɔ é ɖó hlɔ̌nhlɔ́n bo ná bló nǔ ɔ.” Xɔ́ntɔn lɛ́ nɔ ba ná d’alɔ mǐ, amɔ̌ yě nɔ kpé wú hwebǐnu ǎ, Jexóva ka nɔ kpé wú hwebǐnu bo nɔ wa nǔ ɖěbǔ e é byɔ́ é dó kpé nukún dó mɛsɛntɔ́ tɔn lɛ́ wú, lobo nɔ lɛ́ ná sin nú ɖɛ yětɔn lɛ́. Éɖokpónɔ sín hlɔ̌nhlɔ́n wɛ ma ɖó dogbó ǎ, bɔ é lɛ́ nyí Acɛbǐnɔ.—Ezayíi 40:26.

 “Mawu . . . sixú wa nǔ zɛ nǔ ɖěɖěe mǐ byɔ́, alǒ sixú lin lɛ́ é bǐ wú flaflá tɔn.” Jexóva sixú wa nǔ gěgé nú mɛsɛntɔ́ tɔn lɛ́, alǒ tlɛ wa nǔ zɛ nǔ e yě ɖó nukún tɔn é wú “flaflá tɔn”. É sixú d’alɔ yě ɖo ali ɖé nu b’ɛ ná zɛ nǔ e yě sixú mɔ ɖɔ é sukpɔ́ é, alǒ nǔ e yě mɔ ɖɔ é nyí alɔhundónánǔmɛ sín nǔ é wú flaflá tɔn.

 Nukɛgbe “zɛ nǔ ɖěɖěe mǐ byɔ́, alǒ sixú lin lɛ́ é bǐ wú” ɔ kplɔ́n mǐ nǔ ɖěvo dó wěmafɔ énɛ́ wú. Ðɔ e mɛsɛ́dó ɔ ɖɔ “zɛ nǔ ɖěɖěe mǐ byɔ́, alǒ sixú lin lɛ́ é bǐ wú” é xlɛ́ ɖɔ é jló ɖɔ klisánwun lɛ́ bǐ ní tuun ɖɔ Mawu sixú d’alɔ yě b’ɛ ná zɛ lěe yě lin gbɔn é wú. Nouvelle Bible français courant tínmɛ akpáxwé nukɔntɔn wěmafɔ 20​gɔ́ ɔ tɔn gbɔn lě: “Nú é mɛ e kpé wú bo ná wa nǔ zɛ nǔ e mǐ byɔ́ alǒ lin é wú bɔ è ma sixú jlɛ́ ǎ é.” Hweɖélɛ́nu ɔ, klisánwun lɛ́ sixú lin ɖɔ tagba émítɔn lɛ́ d’agba dín, alǒ vɛ́ wǔ dín bɔ è ná ɖe ɖɛ. Bóyá, yě tlɛ nɔ tuun nǔ e tamɛ yě ná xo ɖɛ dó é ǎ. Amɔ̌, dogbó ɖě ɖe nú Jexóva ɖo nukúnnúmɔjɛnǔmɛ linu alǒ ɖo nǔwúkpíkpé e é ɖó bo ná d’alɔ mǐ é linu ǎ. Ðo hwetɔnnu ɔ, é sixú ɖe ɖɛ tagba ɖěbǔ, bo ná wa mɔ̌ ɖo ali e yě ma sixú lin alǒ ɖi ɖɔ é ná wa mɔ̌ ɖe ǎ é lɛ́ é nu. (Jɔbu 42:2; Jelemíi 32:17) Cóbɔ nǔ ná nyí mɔ̌ ɔ, é nɔ ná hlɔ̌nhlɔ́n yě bɔ yě nɔ dɛ, bo tlɛ nɔ dɛ kpó awǎjijɛ kpó.—Jaki 1:2, 3.

 Mɛsɛ́dó Pɔ́lu wɛ wlán wěma Efɛ́zinu lɛ́ tɔn sɛ́dó klisánwun e nɔ toxo Efɛ́zi tɔn mɛ ɖo Azíi kpɛví ɔ, éé nyí Turquie égbé tɔn sín akpáxwé ɖé é lɛ́ é. Nǔ e Pɔ́lu ɖɔ ɖo ɖɛ e é xo dó yě tamɛ lɛ́ é mɛ lɛ́ é wɛ é wlán dó wěmasɛ́dómɛ énɛ́ mɛ. (Efɛ́zinu lɛ́ 3:14-21) É xo ɖɛ ɖɔ yě ní tɛ́n kpɔ́n bo xwedó lěe Jezu nɔ lin nǔ kpó wǎnyíyí kpó gbɔn é sín kpɔ́ndéwú, bɔ mɔ̌ mɛ ɔ, yě ná kpé wú bo tuun wǎnyíyí Klísu tɔn; nǔ ɖokpó ɔ wɛ klisánwun lɛ́ bǐ ɖó ná wa. Pɔ́lu sú ta nú ɖɛ tɔn gbɔn susu kpikpa nú Mawu kpó xó e ɖo Efɛ́zinu lɛ́ 3:20, 21 mɛ lɛ́ é ɖiɖɔ kpó gblamɛ.

 Kpɔ́n video kléwún élɔ́ bo ná dó mɔ nǔ tawun tawun e jí wěma Efɛ́zinu lɛ́ tɔn ɖɔ xó dó lɛ́ é.