Hwɛhwɛ ɔ, è sixu zán kɛ́n e ɖò Biblu mɛ lɛ é tlɔlɔ, amɔ̌, hweɖelɛnu ɔ, ye nɔ nɔte nú nǔɖe. Nú kɛ́n bǔnɔ ɖé nɔte nú nǔɖe kpo é gbɔ kpo ɔ, ninɔmɛ e mɛ è zán ɖè é wɛ nɔ ɖɔ hwɛhwɛ. Kpɔ́n kpɔ́ndéwú elɔ lɛ e mɛ kɛ́n e xó Biblu ɖɔ lɛ é nɔte nú nǔɖe ɖè lɛ é:

•   1 Bǔninɔ. Ði kpɔ́ndéwú ɔ, Jezu xoɖɛ sɛ́dó Mawu dó ahwanvu tɔn lɛ tamɛ bo ɖɔ: “Ye bǐ ni nyí ɖokpo, lee nyɛ kpodo hwi kpo nyí ɖokpo gbɔn é.”—Jaan 17:21; Matie 19:6.

•   2 Ðò hwɛɖiɖɔ linu ɔ, kúnnuɖetɔ́ we nɔ ɖekúnnu ɖɔ xó ɖé nyí nǔgbo. (Sɛ́nflínmɛ 17:6) Mɔ̌ ɖokpo ɔ, dlɔ̌ e è kú dó azɔn we jí é, alǒ nukɛgbe e è ɖɔ dó azɔn we jí é nɔ dó zǒgbe jí ɖɔ xó ɔ ɖó jiɖe bo nyí nǔgbo. Ði kpɔ́ndéwú ɔ, hwenu e Jozɛfu ɖò dlɔ̌ e Falawɔ́ɔn Ejipu tɔn kú é tinmɛ wɛ é ɔ, é ɖɔ: “Ee è bló bɔ mɛ kú nǔ ɖokpo ɔ sín dlɔ̌ dó azɔn we jí mɔ̌ ɔ, é ɖexlɛ́ ɖɔ nǔ e Mawu lin ɖɔ emi na wà ɔ, wà jɛn é na wà dandan.” (Bǐbɛ̌mɛ 41:32) Ðò nǔɖɔɖ’ayǐ linu ɔ, “zo we” sixu nɔte nú acɛkpikpa we, lee gbeyiɖɔ Daniyɛli ɖɔ dó Axɔ́suɖuto Mɛdi kpo Pɛsi kpo tɔn wu gbɔn é.—Daniyɛli 8:20, 21; Nǔɖexlɛ́mɛ 13:11.

•   3 Lee kúnnuɖetɔ́ atɔn na na kúnnuɖenú dó dó zǒgbe xó ɖé jí ɖɔ é nyí nǔgbo gbɔn é ɔ, mɔ̌ ɖokpo ɔ, nǔ e è ɖɔ dó azɔn atɔn jí é nɔ dó zǒgbe xó e è ɖɔ é jí, alǒ tɛɖɛ̌ xó ɔ jí.—Ezekiyɛli 21:32; Mɛsɛ́dó 10:9-16; Nǔɖexlɛ́mɛ 4:8; 8:13.

•   4 É sixu nɔte nú lee nǔɖe cí blebu é, alǒ lee nǔ ɔ blebu nɔ w’azɔ̌ gbɔn é, lee é nyí gbɔn ɖò xógbe “ayikúngban ɔ sín zo ɛnɛ lɛ” mɛ é.—Nǔɖexlɛ́mɛ 7:1; 21:16; Ezayíi 11:12.

•   6 Hwɛhwɛ ɔ, kɛ́n tɛnwe nɔ nɔte nú nǔ e ɖò blebu é. Kɛ́n ayizɛ́n (kɛ́n tɛnwe bɔ è ɖè ɖokpo sín mɛ: [7-1=6]) sixu nɔte nú nǔ e ma ɖò blebu ǎ é, alǒ nǔ e ɖó blɔ̌ é, abǐ nǔ e cá kan xá kɛntɔ́ Mawu tɔn lɛ é.—1 Tan 20:6; Daniyɛli 3:1; Nǔɖexlɛ́mɛ 13:18.

•   7 Hwɛhwɛ ɔ, kɛ́n tɛnwe ɔ nɔ nɔte nú nǔ e ɖò blebu é. Ði kpɔ́ndéwú ɔ, Mawu ɖegbe nú Izlayɛli-ví lɛ ɖɔ ye ni ɖi zɔnlin lɛlɛ̌ dó Jeliko toxo ɔ nú azǎn ɖebɔdoɖewu tɛnwe, bo ɖi zɔnlin lɛlɛ̌ dó azɔn tɛnwe ɖò azǎn tɛnwegɔ́ ɔ jí. (Jozuwée 6:15) Kpɔ́ndéwú mɔhun e mɛ è zán kɛ́n tɛnwe ɖè lɛ é gegě ɖò Biblu mɛ. (Levíi ví lɛ 4:6; 25:8; 26:18; Ðɛhan 119:164; Nǔɖexlɛ́mɛ 1:20; 13:1; 17:10) Hwenu e Jezu ɖɔ nú Piyɛ́ɛ ɖɔ é ɖó na sɔ́ hwɛ kɛ nɔví tɔn, lé “é kún nyí azɔn tɛnwe kpowun wɛ ó, loɔ, kaka yì azɔn 77” é ɔ, kɛ́n “tɛnwe” e é vɔ́ ɖɔ é xlɛ́ ɖɔ hwɛsɔ́kɛmɛ “kún ɖó dogbó ó.”—Matie 18:21, 22, nwt.

•   10 Kɛ́n wǒ sixu nɔte nú nǔɖe sín blebu.—Tíntɔ́n 34:28; Luki 19:13; Nǔɖexlɛ́mɛ 2:10.

•   12 É cí ɖɔ kɛ́n wěwe nɔ nɔte nú nǔ e ɖò blebu é, tuto Mawu tɔn. Ði kpɔ́ndéwú ɔ, toxo ɖé ɖò nǔmimɔ jixwé tɔn e è xlɛ́ mɛsɛ́dó Jaan é mɛ, bɔ toxo enɛ ɔ, “awinnya wěwe jí wɛ è dó dò ɖó, bo wlan . . . mɛsɛ́dó wěwe lɛ sín nyikɔ dó awinnya enɛ lɛ wu.” (Nǔɖexlɛ́mɛ 21:14; Bǐbɛ̌mɛ 49:28) Wěwe (12) donu nabi ɖé sixu ɖó tinmɛ ɖokpo ɔ.—Nǔɖexlɛ́mɛ 4:4; 7:4-8.

•   40 Hwɛɖónúmɛ gegě alǒ tódɔnnúmɛ sín táan gegě cá kan xá kɛ́n 40.—Bǐbɛ̌mɛ 7:4; Ezekiyɛli 29:11, 12.

Nǔ kplɔnkplɔn dó kɛ́n bǔnɔ lɛ wu (Numérologie)

 Tinmɛ nǔjlɛdonǔwu tɔn enɛ lɛ e kɛ́n ɖěɖee xó Biblu ɖɔ lɛ é ɖó lɛ é gbɔn vo nú nǔkplɔnkplɔn dó kɛ́n bǔnɔ lɛ wu (numérologie). Numérologie nɔ byɔ ɖɔ è ni zán awovínúwiwa dó ba dò nú nǔ e kɛ́n lɛ nɔte na é, nǔ e è sɔ́ ɖě ɖó ɖě kpá ɔ, é na na é, kpo nǔ e è xò ye kplé ɔ, ye na na é kpo. Ði kpɔ́ndéwú ɔ, numérologie sín wlɛnwín ɖé tíìn bo nɔ nyí guematria bɔ Jwifu kabbaliste lɛ nɔ zán dó gbéjé Akpáxwé Biblu Tɔn E È Wlan Dó Ebléegbe Mɛ É kpɔ́n. Ye nɔ zán dó ba dò nú nǔ dó nǔ e ɖò hwlahwlá ɖò kɛ́n e è na, b’ɛ sɔgbe xá wekwín lɛ é glɔ́ é wu. Numérologie nyí amɔɛkinkan e Mawu gbɛ́ wǎn na é sín nǔwiwa alɔkpa ɖé.—Sɛ́nflínmɛ 18:10-12.