“Gbɛwema” e è nɔ lɛ́ ylɔ́ ɖɔ “wema-mlámlá gbɛ̀ tɔn,” alǒ “flǐn-wema” é ɔ, mɛ ɖěɖee ɖó nukúnɖiɖó bo na mɔ gbɛ̀ mavɔmavɔ lɛ é sín nyikɔ wɛ ɖ’emɛ. (Nǔɖexlɛ́mɛ 3:5; 20:12, nwt; Malacíi 3:16, nwt) Gbeji e mɛɖé nɔ nú Mawu, bo lɛ́ setónú n’i é jí wɛ É nɔ zɔ́n dó bo nɔ wlan nyikɔ enɛ lɛ.—Jaan 3:16; 1 Jaan 5:3.

 Mawu hɛn mɛsɛntɔ́ tɔn gbejinɔtɔ́ lɛ ɖokpo ɖokpo sín nyikɔ dó tamɛ, cí nú ɖɔ é wlan nyikɔ yetɔn lɛ dó wema ɖé mɛ sín “bǐbɛ̌mɛ gbɛ̀ ɔ tɔn” wɛ ɖɔhun. (Nǔɖexlɛ́mɛ 17:8) Gbejinɔtɔ́ Abɛli wɛ na ko nyí mɛ nukɔntɔn e sín nyikɔ è wlan dó gbɛwema ɔ mɛ é. (Eblée 11:4) É nyí wema e jí è slɛ́ nyikɔ lɛ ɖó kplɛlɛ é ɖé kpowun ǎ, ɖó gbɛwema ɔ xlɛ́ mǐ ɖɔ Jehovah ɔ, Mawu wanyiyinɔ e “tuùn mɛ e nyí étɔn lɛ é” ɖé wɛ.—2 Timɔtée 2:19; 1 Jaan 4:8.

È ka sixu súnsún nyikɔ lɛ sín “gbɛwema ɔ” mɛ à?

 Ganji. Mawu ɖɔ dó tótlítɔ́ e ɖò Izlayɛli hwexónu tɔn lɛ é wu ɖɔ: “Mɛ e hu hwɛ dó mì ɔ sín nyikɔ jɛn un na súnsún sín wema ce mɛ.” (Tíntɔ́n 32:33) Amɔ̌, nú mǐ nɔ gbeji ɔ, nyikɔ mǐtɔn na nɔ “wema-mlámlá gbɛ̀ tɔn ɔ” mɛ.—Nǔɖexlɛ́mɛ 20:12, nwt.