Sinsɛn Katolika tɔn mɛ wɛ è jì mì dó ɖò Rochester, ɖò New York. Xwè tantɔn ɖó wɛ un ɖè bɔ mɛjitɔ́ ce lɛ gbɛ́ yeɖée. Enɛ wu ɔ, ɖò aklunɔzán gbla lɛ mɛ ɔ, nɔ ce gɔ́n wɛ un nɔ nɔ ɖò xwè ɖěɖee è gbá bɔ mɛ e ɖě ma ɖò ɖě na ǎ lɛ é nɔ nɔ lɛ é gbè; bɔ ɖò aklunɔzán gblamɛ fifó lɛ ɔ, un nɔ nɔ tɔ́ ce gɔ́n ɖò dɔkunnɔ lɛ sín xá ɖé mɛ. Ee un mɔ lee nɔ ce ɖò gǎn dó wɛ sɔ cobo na kplɔ́n vǐ ayizɛ́n bɔ ye na sù é ɔ, un nɔ lin ɖɔ un ɖó na jɛ dɔkun dó d’alɔ xwédo ce.

 Tɔ́ ce ba ɖɔ má yì nukɔn ɖò gbɛ̀ ɔ mɛ, enɛ wu ɔ, é bló tuto bɔ un yì ba wemaxɔmɛ e nɔ kplɔ́n nǔ mɛ dó nukúnkpíkpé dó otɛli wu é nukúnɖeji ɖé kpɔ́n. É dɔn mì, bɔ un dó nyikɔ wema mɛ, bo vɛ́sin ɖɔ Mawu wɛ ɖò sinkɔn na nú ɖɛ e un xò bá jɛ dɔkun, lobo lɛ́ ɖ’awǎjijɛ é wɛ sín. Un kplɔ́n nǔ dó lee è nɔ kpé nukún dó otɛli wu gbɔn é, sɛ́n e kúnkplá ajɔ̌wiwa é kpo lee è nɔ kpé nukún dó akwɛzinzan azɔ̌xwé ɖé tɔn wu gbɔn é kpo wu nú xwè atɔ́ɔ́n, bɔ hwe ɖokpo ɔ nu ɔ, un nɔ lɛ́ w’azɔ̌ ɖò otɛli e mɛ è nɔ lɛ́ nyi akɔ ɖè é (hôtel-casino) ɖé ɖò Las Vegas ɖò Nevada.

 Hwenu e un ɖó xwè 22 é ɔ, un huzu alɔgɔtɔ́ nú gǎnbɔdógǎnwu otɛli mɔ̌hun ɖé tɔn. Mɛ lɛ nɔ mɔ mì dó mɔ mɛ e jɛ dɔkun bɔ nǔ bǐ ɖò yiyi na wɛ ganji é ɖé, bɔ hwɛhwɛ ɔ, nǔɖuɖu ɖagbe hugǎn lɛ wɛ un nɔ ɖu, bo nɔ lɛ́ nu vɛ̌ɛn kpo ahan kpo e v’axi hugǎn lɛ é. Azɔ̌gbɛ́ ce e kpo nyi kpo zun xɔ́ntɔn lɛ é nɔ ɖɔ: “Flín ɖɔ akwɛ wɛ ɖò taji hugǎn ɖò gbɛ̀ ɔ mɛ.” Nú yedɛɛ lɛ ɔ, akwɛ wɛ nɔ zɔ́n bɔ è nɔ ɖó awǎjijɛ adodwé ɔ.

 Azɔ̌ ce nɔ byɔ ɖɔ má kpé nukún dó hudo dɔkunnɔ ɖaxó ɖaxó e nɔ tɔ́n akɔ nyi gbé bo nɔ wá Las Vegas lɛ é tɔn wu ɖò nǔɖuɖu kpo ahan kpo linu. Ye jɛ dɔkun có, é ka cí ɖɔ ye kún ɖó awǎjijɛ ó ɖɔhun. Nyi lɔ jɛ mimɔ jí ɖɔ un kún ɖó awǎjijɛ ó. Nǔgbo ɔ, lě dò un jɛ dɔkun sɔ é ɔ, mɔ̌ dò wɛ un nɔ ɖò adohu adohu jí, bo nɔ lɛ́ gɔn amlɔ dɔ́ zǎnmɛ sɔ. Un jɛ linlin jí bo na hu nyiɖée. Un flú bǐ ɖó gbɛ̀ e zán wɛ un ɖè é wu, bo xoɖɛ sɛ́dó Mawu lobo kanbyɔ ɛ ɖɔ: “Fitɛ un ka sixu mɔ awǎjijɛ adodwé ɔ ɖè?”

 Hwenɛnu ɔ, nɔví ce nyɔnu we ko huzu Kúnnuɖetɔ́ Jehovah tɔn, bo sɛ̀ tɛn wá Las Vegas. Un gbɛ́ ɖɔ un kún na yí wema yetɔn lɛ ó có, un ka yí gbè bá nɔ kpɔ́ xá ye lobo xà Biblu ceɖesunɔ. Ðò Biblu ce mɛ ɔ, fí ɖěɖee Jezu ɖɔ xó ɖè lɛ é ɔ, sinmɛ vɔvɔ wɛ è dó wlán na. Ðó un yí gbè nú nǔ e Jezu ɖɔ lɛ é bǐ wutu ɔ, xó tɔn lɛ wu wɛ nɔví ce nyɔnu lɛ nɔ ɖɔ xó nú mì dó hugǎn. Un nɔ lɛ́ xà Biblu hwenu e un ɖò nyiɖokpo é.

 Nǔ gegě tíìn bɔ un xà b’ɛ kpaca mì tawun. Ði kpɔ́ndéwú ɔ, Jezu ɖɔ: “Enyi mi ɖò ɖɛ xò wɛ hǔn, mi ma nɔ ɖò nǔ ɖokpo ɔ lɛ vɔ́ ɖɔ wɛ lee akɔta lɛ sín mɛ lɛ nɔ bló gbɔn é ó, ɖó ye nɔ lin ɖɔ xó gegě ɖiɖɔ wɛ na zɔ́n bɔ è na sè ɖɛ yetɔn.” (Matie 6:7) É ka ɖò mɔ̌ có, yɛhwenɔ ɖé na mì ɖiɖe Jezu tɔn ɖé, bo ɖɔ nú mì ɖɔ nyi ni nɔ sɔ́ ɖiɖe ɔ ɖó nukɔn, bo nɔ xà Tɔ́ Mǐtɔn E Ðò Sɛxwé Ɔ kpo Un Dó Gbè We Malia kpo azɔn wǒ, enɛ ɔ, nyi ɖò akwɛ ɖebǔ ba wɛ ɔ, Mawu na na bǐ mì. Amɔ̌, un mɔ ɖɔ nǔ ɖokpo ɔ lɛ vivɔ́ ɖɔ na cí nǔwlíɖɔ ɖɔhun. Un lɛ́ xà xó Jezu tɔn elɔ lɛ: “Mi ma ylɔ́ mɛ ɖebǔ ɖò ayikúngban jí fí ɖɔ: ‘Tɔ́’ ó, ɖó Mawu e ɖò jixwé ɔ ɖokponɔ géé wɛ nyí Tɔ́ mitɔn.” (Matie 23:9) Enɛ wu ɔ, un lɛ́ kanbyɔ nyiɖée ɖɔ: ‘Aniwu nyi kpo sinsɛngbɛ́ ce Katolika tɔn ɖevo lɛ kpo ka nɔ ylɔ́ yɛhwenɔ lɛ ɖɔ “Tɔ́”?’

 Ee un xà wema Biblu tɔn e nɔ nyí Jaki é gudo é ɔ, un jɛ tamɛ lin dó nǔ e sɔ́ gbɛzán ce dó wà na wɛ un ɖè é jí jí dó nǔjɔnǔ mɛ. Ðò wemata 4gɔ́ ɔ mɛ ɔ, Jaki wlán ɖɔ: “Mi tuùn ɖɔ è zun xɔ́ntɔn xá gbɛ̀ ɔ, Mawu sín kɛntɔ́ wɛ è nyí à cé? Mɛ e jló na nyí gbɛ̀ mɛ fí sín nǔ lɛ sín xɔ́ntɔn ɔ nɔ sɔ́ éɖée dó huzu Mawu sín kɛntɔ́.” (Jaki 4:4) Wemafɔ 17gɔ́ ɔ wɛ tlɛ dɔn mì hugǎn, é ɖɔ: “Enɛ ɔ, mɛ e tuùn nǔ ɖagbe e é ɖó na wà ɔ, bo ma ka nɔ wà ǎ ɔ, hwɛ hu wɛ é ɖè.” Un ylɔ́ nɔví ce nyɔnu lɛ bo ɖɔ nú ye ɖɔ un na ɖó azɔ̌wiwa ɖò otɛli ɔ te, ɖó é nɔ byɔ nǔ ɖěɖee un wá mɔ ɖɔ ye kún sɔgbe ó lɛ é wiwa ɖò así è, ɖi akɔnyinyi kpo nukúnkɛ́ndidó kpo.

 Un ba na bló bɔ kancica e ɖò nyi kpo Mawu kpo tɛntin é kaka jɛ kancica e ɖò nyi kpo mɛjitɔ́ ce lɛ, gɔ́ nú nɔví ce lɛ kpo tɛntin é na lidǒ. Enɛ wu ɔ, un wá gbeta ɔ kɔn bo na hɛn gbɛzán ce bɔkun bá dó mɔ hwenu gegě bo kpé enɛ wu. Amɔ̌, huzuhuzu lɛ blobló d’ayihun ǎ. Ði kpɔ́ndéwú ɔ, è xwlé mì azɔ̌ taji hugǎn e dɔn mɛ é ɖé ɖò otɛli e mɛ è nɔ lɛ́ nyi akɔ ɖè é kpáxwé, bɔ enɛ byɔ ɖɔ un na nɔ ɖu sunzánfókwɛ e un ko nɔ ɖu ɖ’ayǐ é mɔ̌hunkɔtɔn donu we alǒ atɔn dìn. Amɔ̌, ee un xoɖɛ dó xó ɔ takúnmɛ gudo é ɔ, un wá gbeta ɔ kɔn ɖɔ gbɛzinzan mɔ̌hun kún sɔ́ jɛxa mì ó. Un jó azɔ̌ ce dó, bo sɛ̀ tɛn jɛ fí e nɔ ce nɔ gán mɔ̌to ɖó é, bo jɛ azɔ̌ klewun ɖé wà jí, enɛ wɛ nyí ɖɔ un nɔ dó akpa nú wema e mɛ è nɔ slɛ́ nǔɖuɖu e è sixu ɖu ɖò nǔbaɖutɛn lɛ é dó lɛ é.

 Biblu d’alɔ mì bɔ un wá gbeta ɖagbe lɛ kɔn ɖò gbɛzán ce mɛ có, un ka ko bɛ́ kplé Kúnnuɖetɔ́ Jehovah tɔn lɛ tɔn yiyi ǎ. Nɔví nyɔnu ce lɛ kanbyɔ mì ɖɔ aniwu Kúnnuɖetɔ́ lɛ sín nǔ ma nɔ jɛ ce jí ǎ é jí. Un yí gbè nú ye ɖɔ: “Ðó xwédo lɛ e Mawu mitɔn Jehovah nɔ gbà é wutu wɛ. Natáaxwe kpo jijizánxwe lɛ kpo sín hwenu kɛɖɛ jɛn un sixu nɔ kpɔ́ xá xwédo ce, amɔ̌ midɛɛ lɛ ka nɔ ɖu xwè enɛ lɛ ǎ.” Nɔví ce lɛ ɖokpo bɛ́ avǐ, bo kanbyɔ mì ɖɔ: “Bɔ azǎn ɖě lɛ e kpò ɖò xwè ɔ mɛ é ka ló? Mǐ ba na ɖò kpɔ́ xá we hwebǐnu. Amɔ̌, xwè enɛ lɛ hwenu kɛɖɛ jɛn a nɔ wá, bo ka nɔ lɛ́ mɔ ɖɔ dandannú wɛ.” Xó tɔn lɛ byɔ ayi mɛ nú mì tawun, bɔ nyi lɔ bɛ́ avǐ.

 Un wá mɔ nǔ jɛ wu dìn ɖɔ Kúnnuɖetɔ́ Jehovah tɔn lɛ yí wǎn nú xwédo yetɔn tawun, bɔ linlin e ɖó wɛ un ɖè ɖ’ayǐ é kún sɔgbe ó. Enɛ wu ɔ, un wá gbeta ɔ kɔn bo na yì kplé yetɔn lɛ ɖokpo ɖò Kpléxɔ Axɔ́suɖuto ɔ tɔn xá ɔ mɛ tɔn ɖé mɛ. Un xò gò Kevin ee nyí Biblu kplɔnmɛtɔ́ e ko mɔ nǔ kpɔ́n é ɖé é ɖò finɛ, b’ɛ jɛ Biblu kplɔ́n xá mì jí.

 Kevin kpo asì tɔn kpo nɔ zán gbɛ̀ e bɔkun é ɖé, bo na dó sixu zán hwenu gegě lee ye kpéwú gbɔn é dó d’alɔ mɛ ɖevo lɛ bonu ye na mɔ nukúnnú jɛ Biblu mɛ. Ye nɔ lɛ́ zán akwɛ e ye nɔ mɔ é dó yì Aflika kpo Tɛntin Amɛlika tɔn kpo. Fí enɛ lɛ wɛ ye d’alɔ bɔ è gbá alaxɔ lɛ nú Kúnnuɖetɔ́ lɛ ɖè. Ye ɖ’awǎjijɛ tawun, bo lɛ́ yí wǎn nú yeɖée. Un lin nǔ gbɔn lě, ‘Gbɛ̀ alɔkpa e ba wɛ un ɖè bo na zán é nɛ.’

 Kevin xlɛ́ video ɖé mì, bɔ video ɔ ɖɔ xó dó awǎjijɛ e è nɔ mɔ ɖò mɛsɛ́dózɔ́ ɔ mɛ é wu, lobɔ un wá gbeta ɔ kɔn ɖɔ un na wà mɛsɛ́dózɔ́. Ðò 1995 ɔ, un kplɔ́n Biblu ganji nú sun ayizɛ́n, enɛ gudo ɔ, un bló baptɛm, bo huzu Kúnnuɖetɔ́ Jehovah tɔn ɖé. Un sɔ́ nɔ byɔ Jehovah ɖɔ é ni bló bonu ma jɛ dɔkun ǎ, loɔ, un nɔ bɛ́ ɖɛxixo gbɔn lě: “Ma na ya mì ó, ma ka na dɔkun mì ó.”—Nǔnywɛxó 30:8.

 Un jɛ dɔkun dìn tawun; é ka nyí ɖò akwɛ lixo ǎ, loɔ, gbigbɔ lixo wɛ. Un xò gò wanyinamɔ ce Nuria ɖò Honduras bɔ mǐ wà mɛsɛ́dózɔ́ ɖò Panama kpo Mexique kpo. Xó elɔ e Biblu ɖɔ é nyí nǔgbo tawun: “Nyɔna e Jehovah nɔ kɔn dó mɛ jí é wɛ nɔ dó dɔkun nú mɛ, É ka nɔ sɔ́ wuvɛ̌ ɖebǔ gɔ́ na ǎ.”—Nǔnywɛxó 10:22, nwt.