È jì mì ɖò xwédo yatɔ́nɔ tɔn ɖé mɛ ɖò Tirana, ee nyí azinkan Albanie tɔn é. Nya nǔgboɖɔtɔ́ ɖé wɛ tɔ́ ce nyí, bo nɔ w’azɔ̌ syɛnsyɛn dó kpé nukún mǐ wu. Amɔ̌ mǐ ɖó nǔ kaka ɖé kpɔ́n gbeɖé ǎ. Hwenu e un kpò ɖò vǔ é ɔ, é nɔ vɛ́ nú mì tawun ɖɔ mǐ nyí yatɔ́nɔ. Ðò ɖibla nyí yɔkpɔvu xwè ce bǐ mɛ ɔ, un nɔ ɖó afɔkpa e un na dó é ǎ, un nɔ mɔ nǔɖuɖu sukpɔ́ bá ɖu ǎ.

 Un jɛ ajo ja jí hwenu e un kpò ɖò vǔ é. Un nɔ mɔ ɖɔ alɔ dó xwédo ce wɛ un ɖè gbɔn mɔ̌. Wǎgbɔ tɔn ɔ, kponɔ lɛ wlí mì. Enɛ wu ɔ, ɖò 1988 ɔ, hwenu e un ɖò xwè 14 ɖó wɛ é ɔ, tɔ́ ce sɛ́ mì dó fí e è nɔ kplɔ́n yɔkpɔvu lɛ ɖè é ɖé. Un kplɔ́n gancicázɔ́ ɖò finɛ nú xwè we. Ee un gosin finɛ é ɔ, jlǒ ce wɛ nyí ɖɔ má nɔ ɖɔ nǔgbo, amɔ̌, un mɔ azɔ̌ ǎ. Azɔ̌mamɔ syɛn ɖò Albanie tawun, ɖó tagba e toxóɖiɖɔ nɔ dɔn wá lɛ é wu. Awakanmɛ kú mì, un lɛ́ jɛ gbɛ̌ dó xá xɔ́ntɔn ce xóxó lɛ jí bo lɛ́ jɛ ajo ja jí. Wǎgbɔ tɔn ɔ, è wlí xɔ́ntɔn ce lɛ kpo nyi kpo bɔ mǐ na sɛn gan nú xwè atɔn.

 Ee è ɖè mì tɔ́n sín ganmɛ gudo é ɔ, un lɛ́ jɛ sɛ́n gbà jí. Akwɛzinkan Albanie tɔn j’ayǐ bɔ tò ɔ byɔ ya mɛ. Ðò táan ayimajayǐ tɔn enɛ mɛ ɔ, un mɔ akwɛ gegě, gbɔn azɔ̌ e sɛ́n gbɛ́ lɛ é wiwa gblamɛ. Xɔ́ntɔn ce lɛ hɛn tú bo yì j’ajo bɔ è wlí ye mɛ we, enɛ gudo ɔ, un hɔn sín tò ɔ mɛ, bo ma wá yì sɛn gan nú xwè gegě ó. Un ko d’asì hwenɛnu, Julinda wɛ é nɔ nyí, bɔ mǐ ɖó vǐ sunnu ɖokpo.

 Mǐ wá yì Grande-Bretagne. Un nɔ lin hwebǐnu bá bɛ́ gbɛzinzán yɔyɔ̌ ɖé xá asì ce kpo vǐ ce kpo, amɔ̌, walɔ ce xóxó ɔ ko dó ɖɔ dò bǐ ɖò fɛn ce nu. Zaanɖé kpowun ɔ, un lɛ́ jɛ sɛ́n gbà jí. Dìn tɔn ɔ, un jɛ azɔ gblégblé sà jí bo nɔ lɛ́ zán akwɛ gegě.

 Nɛ̌ nǔ ka nɔ cí nú asì ce Julinda dó azɔ gblégblé e un nɔ sà é wu? Mi nú éɖesunɔ ni ɖɔ nú mi: “Albanie wɛ un sù ɖè, bɔ dlɔ̌ e un nɔ kú é wɛ nyí ɖɔ má tɔ́n sín ya mɛ gbè ɖokpo. Un nɔ sɔ́ jlǒ dó tɛ́n nǔ ɖebǔ e un sixu wà bo ɖó gbɛ̀ fɛɛ ɖé é kpɔ́n. Un nɔ lin ɖɔ akwɛ na bló gbɛ̀ mǐtɔn ɖó, enɛ wu ɔ, un nɔ nɔ gudo nu asú ce Artan ɖò adingbanɖiɖó, ajojija, azɔ gblégblé sisa, alǒ nǔ ɖebǔ e é sixu wà bo mɔ akwɛ é kɔn bǐ mlɛ́mlɛ́.”

 Nukɔnmɛ ɖò 2002 ɔ, gbɛzán mǐtɔn ɖyɔ ajijimɛ bɔ ninɔmɛ akwɛzinzán tɔn mǐtɔn kpo nǔ e ɖó nukún wɛ mǐ ɖè lɛ é kpo bǐ cifo. È lɛ́ wlí mì azɔn ɖevo kpo azɔ gblégblé sín agban ɖaxó ɖé kpo, bo sɔ́ mì dó gankpá mɛ.

 Biblu ko jɛ gbɛzán ce huzu jí xóxó có nyiɖesunɔ tlɛ wá ɖ’ayi wu. Jɛ nukɔn hwɛ̌ ɔ, ɖò 2000 ɔ, asì ce Julinda xò gò Kúnnuɖetɔ́ Jehovah tɔn asú kpo asì kpo ɖé bo jɛ Biblu kplɔ́n xá ye jí. Xó ɖiɖɔ dó Biblu jí nɔ jló mì ɖ’ayǐ ǎ, ɖó un lin ɖɔ é ko cá. Amɔ̌, asì ce Julinda yí wǎn na. Éɖesu ni ɖɔ lee nǔ cí n’i é: “Xwédo e nɔ sɛn Mawu é ɖé mɛ wɛ un gosin, bɔ un yí wǎn Biblu bo nɔ lɛ́ ɖó sísí na. Un nɔ ba hwenu na tuùn nǔ e é kplɔ́n mɛ é, kplɔnkplɔn tɔn xá Kúnnuɖetɔ́ lɛ nɔ sɔ́ akpakpa mì tawun. Nǔ e Biblu kplɔ́n mɛ é gegě nɔ sɔgbe ɖò nukún ce mɛ. Nǔ e kplɔ́n wɛ un ɖè é d’alɔ mì bɔ un bló huzuhuzu ɖé lɛ ɖò gbɛzán ce mɛ. É ɖò mɔ̌ có, linlin e un nɔ ɖó dó akwɛ wu é ɖyɔ ǎ, nǔ ɖò mɔ̌ kaka jɛ hwenu e è wlí asú ce Artan é. Enɛ huzu linlin e un nɔ ɖó é bǐ mlɛ́mlɛ́. Ðò ajijimɛ ɔ, un wá mɔ nǔ jɛ wu ɖɔ nǔ e Biblu ɖɔ dó akwɛ wu lɛ é nyí nǔgbo. Mǐ wà nǔ e wu mǐ kpé é bǐ bá dó jɛ dɔkun, amɔ̌, é na mǐ awǎjijɛ ǎ. Un wá mɔ nǔ jɛ wu ɖɔ un ɖó na xwedó nǔgbododó Mawu tɔn lɛ bǐ mlɛ́mlɛ́.”

 Ðò 2004 ɔ, è ɖè mì sín gankpá mɛ, un tɛ́n kpɔ́n bá lɛ́ lɛkɔ yì azɔ gblégblé sisa kɔn azɔn ɖokpo. Amɔ̌, asì ce Julinda sín linlin ko ɖyɔ. É ɖɔ nǔɖe b’ɛ zɔ́n tamɛ lin mì tawun. É ɖɔ: “Un sɔ́ ba akwɛ towe ɖě ǎ. Asú ce ba wɛ un ɖè, bo ba ɖɔ vǐ ce lɛ sín tɔ́ ni nɔ kpɔ́ xá ye.” É cí ɖě nú mì, amɔ̌ hwɛ tɔn jɔ. Un zán xwè gegě ɖò zɔ nú xwédo ce. Un lɛ́ lin tamɛ dó wuvɛ̌ tobutobu e un mɔ ɖó un ba na ɖó akwɛ ɖò ali e ma sɔgbe ǎ é nu wu é jí. Enɛ wu ɔ, un wá gbeta ɔ kɔn bá huzu gbɛzán ce lobo sɛ́n kan nú hǎdidó xá xɔ́ntɔn ce xóxó lɛ.

 Nǔ e byɔ lanmɛ nú mì tawun é jɛ hwenu e nyi kpo asì ce kpo kpodo vǐ sunnu mǐtɔn we lɛ kpo yì kplé Kúnnuɖetɔ́ Jehovah tɔn lɛ tɔn ɖé é. Lee sunnu kpo nyɔnu kpo e un xò gò ɖò finɛ lɛ é jɔ gbɛtɔ́ sɔ é sɔ́ akpakpa mì. Wǎgbɔ tɔn ɔ, un jɛ Biblu kplɔ́n jí.

 Un kplɔ́n ɖò Biblu mɛ ɖɔ “wǎn yí nú akwɛ mɛ wɛ nǔ nyanya tɛnmɛ tɛnmɛ lɛ bǐ nɔ tɔ́n sín; mɛɖé lɛ ɖò gbě tɔn mɛ kaka . . . bo dɔn nǔgbomɛ gegě dó kɔ.” (1 Timɔtée 6:9, 10) Nǔ e gbò mì lɛ é zɔ́n bɔ un mɔ nǔ jɛ wu ganji ɖɔ nǔgbo wɛ xó enɛ e Biblu ɖɔ é nyí! Gbɛ̀ e un zán jɛ nukɔn é kpo wuvɛ̌ e é hɛn wá nú nyi kpo xwédo ce kpo lɛ é vɛ́ nú mì tawun. (Galatinu lɛ 6:7) Hwenu e un lin tamɛ dó wanyiyi e Jehovah kpo Vǐ tɔn Jezu Klisu kpo ɖó nú mǐ é jí é ɔ, un jɛ gbɛzán ce huzu jí. Nǔ mɛ ɖevo lɛ tɔn jɛ ayi mɛ ɖu nú mì jí hú nyiɖesunɔ tɔn, bɔ un nɔ zán hwenu gegě xá xwédo.

LÈ E UN MƆ LƐ É

 Un ɖu vivǐ akpágbánúmɛ Biblu tɔn elɔ tɔn tawun: “Mi ma jó miɖée dó nú wǎn yí nú akwɛ ɖu ɖò mi jí ó; nǔ e ɖò mi sí ɔ ni kpé mi.” (Eblée lɛ 13:5) Un ɖó fífá ayi mɛ tɔn kpo ayixa mímɛ́ ɖé kpo dìn. Enɛ na mì awǎjijɛ e sín vivǐ un ma ko ɖu kpɔ́n gbeɖé ǎ é. Alɔwliwli ce lidǒ, bɔ mǐ lɛ́ sɛkpɔ́ mǐɖée hugǎn ɖò xwédo ɔ mɛ.

 Un nɔ lin ɖ’ayǐ ɖɔ enyi mǐ ɖó akwɛ gegě ɔ, mǐ na ɖó awǎjijɛ. Dìn ɔ, un mɔ lee sɛ́ngbigba kpo wǎn yí nú akwɛ kpo nɔ hɛn wuvɛ̌ wá nú mɛ sɔ é. Wǎgbɔ tɔn ɔ, mǐ sɔ́ jɛ dɔkun ǎ, amɔ̌, un mɔ ɖɔ mǐ ɖó nǔ ɖevo b’ɛ ɖò taji hugǎn ɖò gbɛzán mǐtɔn mɛ, é wɛ nyí, xɔ́ntɔn zunzun xá Jehovah Mawu. Sɛn e sɛn ɛ wɛ mǐ ɖè ɖó kpɔ́ xwédo ɖé ɖɔhun é nɔ na mǐ awǎjijɛ tawun.