NODRA VAKACEGUI NA LOLOSI

Vu ni Veivakacegui Yaga Duadua Vei Ira na Lolosi

SARAVA/ROGOCA

E VAKADIKEVI TIKO VAKALEVU NIKUA NA MOSI E VAKILAI NI TAKALI E DUA NA WEKADA SE ITOKANI VOLEKA. Me vaka ga sa vakamacalataki oti, na ivakasala yaga duadua era vakatututaka na kenadau e salavata vinaka kei na dua na ivola ni vuku makawa na iVolatabu. E vakadinadinataki kina ni yaga tawamudu na ivakasala ena iVolatabu. Ia e sega ni nuitaki wale ga na kena ivakasala, e tiko tale ga kina na itukutuku e sega ni kunei ena dua tale na vanua. E sega ni vakatauvatani rawa na itukutuku veivakacegui e vutucoqa kina vei ira na lolosi tiko.

Veivakadeitaki nira sega ni rarawa tiko na wekada se itokani voleka era sa takali

E kaya na Dauvunau 9:5: “Na mate era sega sara ga ni kila e dua na ka.” Sa ‘takali na nodra vakanananu.’ (Same 146:4) E vakatauvatana gona na iVolatabu na mate ina mocelutu.—Joni 11:11.
Vakabauta dei ni dau veivakacegui na Kalou dauloloma

E kaya na Same 34:15: “Na mata i Jiova * sa dei tu ga vei ira na yalododonu, na daligana tale ga e rogoca na nodra tagi ni kere veivuke.” Na noda talaucaka na lomada vua na Kalou ena masu, eda na vakacegui kina se da na lewa vinaka na ivakarau ni noda vakasama. Ena vukei keda meda veiwekani vinaka kei koya na Dauveibuli, ni dau vakayagataka nona kaukaua me vakacegui keda.
Veigauna vinaka meda rai vakanamata kina

Vakasamataka mada na gauna se bera mai, era na vakaturi kece o ira ena ibulubulu mera bula e vuravura! E vakamacalataki vakalevu na gauna va qori ena iVolatabu. E vakamatatataki kina na veika ena yaco e vuravura, oya ni na ‘qusia tani na wainimata kece mai na matada’ na Kalou “sa na sega tale na mate, na lolosi, na tagiyaso, kei na mosi.”—Vakatakila 21:3, 4.

E vakavuna na Kalou o Jiova na iVolatabu. O ira na vakabauta qori era dau vakaukauataki sara ga mera vosota nodra lolosi nira nuitaka tiko mera na raici ira tale na wekadra se itokani lomani era sa takali. Kena ivakaraitaki o Ana, e mate o watina ni sa yabaki 65. E kaya: “E vakadeitaka na iVolatabu nira sega tale ni rarawa tiko na noda daulomani era sa takali, e nanumi ira vinaka tu na Kalou, ena vakaturi ira tale ga. E dau votu mai na vakasama qori niu vakananumi koya, kena ilutua, au rawa ni vosota na ituvaki cava ga au sotava!”

E kaya o Tinai, a vakamacalataki ena vica na ulutaga sa oti: “Au vakila na veivakacegui ni Kalou me tekivu mai na siga e mate kina o Timoci. Au vakadinadinataka na veivuke ni liga ni Kalou ena veika dredre au sotava. E vakaibalebale kina vei au na yalayala ni iVolatabu me baleta na veivakaturi. E vakaukauataki au meu toso tiko ga me yacova na siga au raici Timoci tale kina.”

Qori tale ga na ka era duavata kina e vica vata na milioni era vakadeitaka ni nuitaki na itukutuku ena iVolatabu. Kevaka mada ga o nanuma ni sega ni dina se vaka ga na tadra na ka e tukuni ena iVolatabu, e vinaka mo dikeva sara ga na ivakadinadina ni nuitaki na kena ivakasala kei na veika e yalataki kina. De dua o na vulica ni vu ni veivakacegui yaga duadua vei ira na lolosi tiko na veika era volai tu ena iVolatabu.