E sega ni rawarawa ke drau dau veiba kei luvemu itabagone, ena vinakati vakalevu kina na vosota. E tukuna o Maria e dua na tina mai Brazil e yabaki 14 o luvena, “Au dau cudru sara ga ni saqata na noqu lewa o luvequ yalewa. Qai vakavuna na neirau veiba.” E va tale ga qori o Carmela mai Itali, e kaya, “Dau katakata sara na neirau veiba kei luvequ tagane, qai cegu ga ni sa sogoti koya ina nona rumu.”

Na cava era dau vakavu veiba kina eso na itabagone? Me beitaki beka o ira na nodra icaba? De dua, ni tukuna na iVolatabu ni nona ilala e dua e rawa ni vakamuai koya me cakava na ka e vinaka se ca. (Vosa Vakaibalebale 13:20; 1 Korinica 15:33) E levu tale ga na ka ni veivakamarautaki nikua e uqeti ira na itabagone mera dau talaidredre se beca na lewa.

Ia eso tale na ka e rawa ni vakavuna​—ke o kila ya, kei na sala ena tarai luvemu kina, o na kila na ka mo cakava. Raica mada qo eso na kena ivakaraitaki.

A vola na yapositolo o Paula: “Niu se gone, au dau vosa vagone, au vakanananu vagone, au vakasama vagone; ia qo niu sa qase mai, au sa sega tale ni qai vagonegonea.” (1 Korinica 13:11) E duidui na nodra ivakarau ni vakasama na gonelalai  kei ira na uabula, me vaka e tukuna o Paula. E duidui vakacava?

O ira na gonelalai era na cakava na cava ga e tukuni vei ira, e vinaka se ca. Ia o ira na uabula era dau vakasamataka vakavinaka na ka e tukuni ra qai vakatulewa. Kena ivakaraitaki, era na vakalewa vinaka eso na ka mera vakatulewataka ra qai vakasamataka se na tarai ira vakacava eso tale na nodra vakatulewa. De dua sa matau mera dau vakasama va qori. Ia se sega ni va ya na nodra rai na itabagone.

E uqeti ira na itabagone na iVolatabu mera bucina na “lomavuku.” (Vosa Vakaibalebale 1:4) E uqeti ira tale ga na lotu vaKarisito kece mera “yalomatua.” (Roma 12:​1, 2; Iperiu 5:14) Ena so na gauna na duidui ni nona rai o luvemu itabagone ena rairai vakavuna nomudrau veibataka eso mada ga na ka e sega na betena. Se na rairai tukuna e dua na ka o sega ni duavata kina. (Vosa Vakaibalebale 14:12) Ena ituvaki qori, na cava o na tukuna mo drau kua kina ni veiba?

Me qarauni: Ni o veivosaki kei luvemu, kua ni vakaraitaka vua ni donu tu ga na ka kece o tukuna. Ke sega mada ga ni taleitaka, e sa rogoca na ka o tukuna, ena rairai vakasamataka tale na nomu vosa. Mo kua ni kurabui ni dua na siga sa na muria tale ga o luvemu na ivakarau ni nomu rai, qai tukuna ni ya ga na ka e nanuma tu e liu.

“So na gauna keirau dau veibataka kei luvequ tagane eso na ka lalai​—me vaka na nona dau vakasabusabu se na nona dau vakanini ganena. Ia ena levu na gauna e vinakata meu taroga na nona rai, se meu tukuna, ‘Oi ya na ka e yaco’ se ‘Oi ya na vuna e va kina qori na nomu rai.’ Au lai vakasamataka kina, keu cakava ya sa wali makawa e levu na ka keirau dau veibataka.”​—Kenji, Japani.

Na itavi bibi ni veisusu oya na nona vakavulici na itabagone me dua na uabula nuitaki ni sa biubiu e vale. (Vakatekivu 2:24) E okati tale ga ena veisusu na nona tuberi ena ivakatagedegede ena kilai tani kina​—me vaka na itovo, vakabauta, kei na ivakarau me muria. Ni temaki me caka ca, na itabagone e kila vinaka na ivakarau a susu mai kina ena sega wale ga ni vakasamataka na leqa ena yaco. Ena taroga tale ga: ‘Na cava e kilai me baleti au? Na ivakatagedegede cava au muria? Na cava ena cakava ena ituvaki qo e dua e muria na ivakatagedegede ya?​—2 Pita 3:11.

E tukuni ena iVolatabu na itukutuku me baleti Josefa e dua na cauravou e kauaitaka na ka e kilai tani kina. Kena ivakaraitaki, ni cikevi koya na wati Potifa me rau veiyacovi, e kaya o Josefa: “Au na qai cakava rawa vakaevei na ka ca vakaidina oqo, kai valavala ca vua na Kalou?” (Vakatekivu 39:9) Ena gauna ya a se bera ni soli vei ira na Isireli e dua na lawa ni tabu na veibutakoci, ia a vakasamataka rawa o Josefa na rai ni Kalou ena ituvaki ya. Ni tukuna ‘e rawa vakacava meu,’ e vakaraitaka ni vinakata o Josefa me kilai tani ena nona bulataka sara ga na ivakatagedegede ni Kalou.​—Efeso 5:1.

Se vulica tale tiko ga o luvemu itabagone na ivakarau ni bula ena kilai tani kina. E vinaka qori baleta na ka ena vakatulewataka ena vukei koya me vorata na nodra veitemaki na nona icaba. (Vosa Vakaibalebale 1:​10-15) Ena rairai vakavuna tale ga qori me saqata ena so na gauna na ka o tukuna. Na cava o na cakava ke yaco qori?

 E bibi na noda kauaitaka na ivakarau ni bula eda na kilai tani kina kei na vakatulewa eda na cakava. E tukuna na iVolatabu ni o ira na lotu vaKarisito era sega ni vagonegonea mera “kuitaki voli ena biau se veikauyaki ena cagi kece ni ivakavuvuli.” (Efeso 4:14) Saga mo uqeti luvemu itabagone me bulataka na ivakarau ena kilai tani kina qai dei ena nona vakatulewa.

“Ni ratou raica na luvequ yalewa niu dau rogoca na ka eratou tukuna, eratou tu vakarau tale ga me ratou vakasamataka na noqu rai, so na gauna ena duidui sara mai na ka eratou nanuma. Au na qarauna meu kua ni vakasaurarataki ratou me ratou muria na ka au nanuma, ia me ratou vakadeitaka ga vakataki ratou.”​—Ivana, Czech Republic.

Eso na itabagone era vakataki ira na gonelalai ena nodra daucike me yaco na lomadra. Me qarauni ke dau yaco qo ena nomu vuvale. Ena ruru beka vakalekaleka na veiba, ia sa na kila tiko o luvemu ni na yaco na lomana ke veiba. Na cava mo cakava? Mo muria na ivakasala i Jisu: “Me Io ga na Io, me Sega na Sega.” (Maciu 5:37) Ke sega ni dau veiveisau na nomu lewa ena sega ni veiba vakalevu kei iko na luvemu itabagone.

Mo yalorawarawa tale ga. Kena ivakaraitaki, ke nanuma o luvemu me veisau na vakatatabu e caka vua, vakarogoci koya me vakamacalataka na vuna. E sega ni kena ibalebale ni o sa soro vei luvemu, ia o muria ga na ivakasala ena iVolatabu: “Me kilai na nomuni yalorawarawa.”​—Filipai 4:5.

Sa macala tu ga ni sega ni dua na itubutubu e uasivi. E kaya na iVolatabu: “Eda dau tarabe kece.” (Jemesa 3:2) Ke o kila ni bale vei iko na nomudrau veiba kei luvemu itabagone, mo kere veivosoti. Qori e ivakaraitaki ni yalomalumalumu, ena muria tale ga o luvemu na nomu ivakaraitaki.

“Ni sa ruru na noqu cudru ni oti na neirau veiba, au kere veivosoti vei luvequ tagane ena noqu katakatataki koya. E malumu kina na nona cudru qai rawa kina ni rogoci au.”​—Kenji, Japani.