ME VAKA ga na kena ivakarau ena veimataka ena Ra kei Aferika, e robota na vanua na iboi ni sauce e saqa tiko e matadravu kei na raisi. Era tavali na marama e taqa tu e uludra e levu na nodra iyaya. Carubi na veidredrevaki, bau voqa tale tu ga mai na veicudruvi. Dua na ka na katakata ni matanisiga dina ga ni se qai mataka lailai.

Ra maqusa na gone mera lagasere ra qai meke ena gauna era raica kina ni gole yani e dua na kai valagi se Yovo. A tekivu na qaqanisere ena “Yovo, Yovo, bon soir” qai tini ena “E bau dua na iloloma me baleta na veivakamarautaki?” Ia a sega ni veitomani ena lagasere e dua na gone tagane lailai. Niu tomana na noqu ilakolako, a muri au tiko ga na tagane lailai qori qai matanataka na ka e via tukuna. Au kidava sara ni qo na vosa vagalu. Niu se tiko mai Merika, au vulica kina na vosa vagalu ni Merika (ASL), ia e vosataki e Benin na vosa vakaVaranise.

Sega ni rawarawa noqu saga meu matanataka vua na gone qori na walu na matanivola ni yacaqu, ia au raica ni matadredredre ena levu ni nona marau. E tara na ligaqu, keirau qai muria na veisala lalai me yaco i nodratou, e dua toka ga na vale buloko e rua na kena rumu. Eratou gole kece mai na nona vuvale, ratou qai veivosaki kece vagalu. Cava au sa na cakava qo? Au mani matanataka ga na yacaqu qai vola ena dua na tikinipepa niu dua na daukaulotu e dau veivakavulici ena iVolatabu, au na qai lesuvi ratou tale mai. Era oso tale ga mai eso era tiko veitikivi era sega ni galu, era vakadonuya tale ga meu lesu mai. Au mani vakasamataka, ‘Na cava meu sa na cakava?’

Niu lesu e vale, au lai vakasamataka tu, ‘E dodonu me tiko e dua me rawa ni vukei ira qo mera kila na veika e yalataka tu na Kalou: “[Ena] rogo na daligadra na didivara.”’ (Aisea 35:5) Au cakava eso na vakadidike. Ena wili lewenivanua a caka wale ga qo mai Benin, e laurai ni 12,000 na kedra iwiliwili na galu wili kina o ira era sega ni dau rogoca vinaka na ka. Dua na ka noqu kurabui niu sa qai kila ni vakavulici ena nodra koronivuli na galu na vosa vagalu ni Merika, sega ni vosa vagalu ni Varanise. Ia ka ni rarawa ni sega ni dua na iVakadinadina i Jiova e kea e kila na vosa vagalu ni Merika. Ena noqu yalolailai, au tukuna kina vua e dua na iVakadinadina e kea, “Au diva mada ga me mai veivuke e dua e kila na vosa vagalu ni Merika.” E qai tukuna vei au, “O iko sara ga sa tu qo, se cava?” E dina sara ga na ka e tukuna! Au otataka e dua na ivola meu  vuli ga kina vakataki au kei na DVD ni vosa vagalu ni Merika era tabaka na iVakadinadina i Jiova. A qai saumi na noqu masu ena gauna e biuti Cameroon kina e dua na iVakadinadina yalewa me toki mai Benin, e kila vinaka tale ga na vosa vagalu ni Merika.

Levu era rogoca niu sa vulica tiko na vosa vagalu. Mani tukuni vei au meu lai raici Brice, e dau droini. Na nona vale ni droini e caka mai na drauniniu qai tali wavoki, e batabata vinaka tu e loma ni katakata na draki. Sa robota kece na lalaga ni nona vale na iboro ni sa vakayabaki na nona dau savata kina na barasi e dau vakayagataka ena droini. A qua sara e rua na idabedabe qai mai vakaraici au tu yani, waraka tu meu tekivu. Au biuta na CD ena DVD player lailai e rawa ni veikauyaki. E dreta mai nona idabedabe me voleka ina mata ni DVD player. E matanataka sara: “Au kila! Au kila!” Era osota na vanua qori na gone era tiko veitikivi mera sarava tale ga. Tukuna sara mai e dua, “Na cava era sarava tiko kina na iyaloyalo e sega na kena rorogo?”

Ena gauna kece au lesuvi Brice kina, sa qai levu tiko ga era mai sarava na DVD. Toso na gauna sa tekivu tiko ena soqoni vaKarisito o Brice kei na so tale. Au dau vakadewa vei ratou, qori e vukei au meu vulica totolo na vosa vagalu. Ni tubu tiko na lewe ni iwasewase lailai qo, eso mada ga era via mai raici au. Kena ivakaraitaki, dua na siga a vakaloloma sara ga na noqu lori makawa ni ciciva na gaunisala era tu kina na qara ena gauna au via levei ira kina na me kei vuaka era lako tu vakaveitalia. Vakasauri noqu rogoca e dua na ka e coqa na muaimuri ni motoka. Au mani kaya lo: ‘O sobo, me kua ni baci leqa tale na motoka!’ Mai vei, qo e dua na galu a cici muria tiko mai na noqu motoka, mani tukia noqu motoka meu rawa niu kauaitaki koya yani!

Sa tauyavu tale ga ena so tale na siti na iwasewase lailai ni vosa vagalu ni Merika. Au bau dua vei ira na kerei mera vakadewa ena gauna ni soqo ni tikina ni iVakadinadina i Jiova ena vosa vagalu. Ena gauna au duri kina ena buturara meu waraki koya e vunau, au vakanananu lesu na gauna se qai tekivu kina na noqu ilesilesi. Au dau vakasamataka, ‘Au na vakarabailevutaka vakacava na noqu cakacaka vakadaukaulotu e Aferika?’ Au sa qai kila na isaunitaro qori ena gauna au raici ira kina na vakarorogo​—meu daukaulotu e dau vukei ira na galu. Au sa sega tale ni dau taroga, ‘Na cava meu sa na cakava?’