ULUTAGA LEVU | NI YACO NA LEQA—CAVA MO CAKAVA
Takali na Wekamu Lomani
A sotava na vakacalaka o Ronaldo e dua na turaga ni Brazil. Eratou mate kina e lima ena nona vuvale, okati kina o tamana kei tinana. E kaya: ‘Au sega ni kila ni ratou sa mate na noqu lewe ni vuvale, niu sega ni vakilai au tu e valenibula me rua na vula.’
“Au sega ni vakabauta e liu ni ratou sa yali. E rawa vakacava ni ratou mate kece? Ia na gauna au vakadinata kina, au kidacala sara ga. Dua na ka na kena mositi au. Toso na gauna, e vaka me sega ni vakainaki na noqu bula ni ratou sa yali kece. Au tagi e veisiga me vica vata na vula! Au beitaki au niu vakatara me dua e draiva. Keu draiva ga, ke ratou sega ni mate.”
“Sa oti qo e tinikaono na yabaki, sa vinaka tale na noqu bula. Ia au se galili tiko ga.”
KA MO CAKAVA
E vinaka mo tagi ni takali e dua na wekamu lomani. Ni tukuna mada ga na iVolatabu ni tiko na “siga ni tagi.” (Dauvunau 3:1, 4) E kaya o Ronaldo: “Au na tagi ena gauna au via tagi kina. E sega ni vinaka meu kinoca na noqu rarawa, niu dau vakila na vakacegu niu tagi oti.” Ia eso e duidui na sala era dau vakaceguya kina na nodra rarawa. Ke o sega ni vakaraitaka e matana levu nomu rarawa, e sega ni kena ibalebale ni o kinoca tiko se mo sasaga tagi.
Kua ni vakatikitikitaki iko mai vei ira na tani. (Vosa Vakaibalebale 18:1) E tukuna o Ronaldo: “Au saga meu kua ni dau vakatikitikitaki au vei ira na so tale. Au marautaka na nodra dau sikovi au mai na tamata. Au na talaucaka tale ga na lomaqu vei watiqu kei ira na noqu itokani voleka.”
Kua ni kauaitaka na vosa mosimosi. Qori e okati kina eso na vosa me vaka, “E vinaka cake.” E nanuma lesu o Ronaldo, “Eso na vosa e kena inaki mera vakacegui iko, ia era tini veivakararawataki tale.” Kua gona ni vakasamataka vakalevu na vosa va qori, muria ga na ivakasala vuku ni iVolatabu: “Kakua ni ko nanuma na vosa kece sa vosataki.”—Dauvunau 7:21.
Vulica na kedra ituvaki dina na mate. E kaya o Ronaldo: “E tukuna na Dauvunau 9:5, ni o ira na mate era sega ni rarawa tale tiko, qori e vakacegui au dina. E tukuna na iVolatabu ni na yaco tale ga na veivakaturi. Koya gona, au raici ira na wekaqu lomani era sa mate me vaka era gole tu vagade.”—Cakacaka 24:15.
O bau kila? E yalataka na iVolatabu ni sa voleka ni “vakaotia . . . na mate” na Kalou. *—Aisea 25:8.
^ para. 11 Me ikuri ni ivakamacala, raica na wase 7 ni ivola Na Cava Sara Mada e Kaya na iVolatabu?
Rawa ni o Wilika Tale ga
NA VALE NI VAKATAWA
Era Sotava na Tamata Vinaka na Veika Ca—Na Vuna?
E vakamacalataka na iVolatabu e tolu na ka e vakavuna noda rarawa.
NA VALE NI VAKATAWA
