NA GASTRIC brooding e dua na mataqali boto e kune ga e Ositerelia qai nanumi ni kawaboko ena 2002. E vakasakiti na boto qo ni duatani na iwalewale ni nona dau vakasucu. E dau tiloma qai tu e ketena nona yaloka me ono na macawa, ena qai vakasucuma na luvena mai gusuna.

Ena sega ni kana ni tiko e ketena na yaloka, ena sega tale ga ni drodro na waikama ni kete. Ia e laurai ni wai e kaburaka na yaloka kei na luvena nira sucu e tarova na drodro ni waikama qori.

Na boto qo e rawa ni ovia e ketena e rua na daseni yaloka. Ni voleka ni vakasucu ena levu na yagona qai bi, baleta ni 40 na pasede na bi ni yagona e kedra bi na luvena. E tautauvata qori kei na dua na yalewa e 68 na kilokaramu na kena bi, e buketetaka e 24 na gone qai 1.8 na kilokaramu na bi ni dua na gone. Ni levu na luvena ena vakalevutaka na ketena, lai bikai kina nona yatevuso. Ena dredre nona cegu, ia e vakayagataka na manumanu qo na kuli ni yagona me cegu kina.

Dina ni sa kena gauna me vakasucu kina, ena maroroya tale na luvena e ketena me vica na siga. Ia ena luaraka ke kidava e dua na ituvaki leqataki. Era raica na dauvakadidike e dua na tina ni boto e vakasucuma e gusuna e ono na luvena ena dua ga na gauna, ena nona luaraki luvena me rauta ni dua na mita na yawa ni vanua e tau kina.

Era tukuna eso ni bula mai vakaidewadewa na nona gacagaca ni vakatubukawa, qori ni veisau yadudua qai vakamalua. Ke dina qori, ena rairai gadrevi vei na boto me vakayacora na veisau qori ena dua ga na gauna. Ia e tukuna o Michael J. Tyler, dua na saenitisi e vakabauta na ivakavuvuli ni bula vakaidewadewa: “E dredre me vakabauti ni bula mai vakaidewadewa na nona gacagaca ni vakatubukawa. Baleta ena sega ni rawa ni vakatubukawa ke veisau yadudua tiko na nona gacagaca ni vakatubukawa.” E tomana, “sa na rawa nida tukuna ga ni yaco vakasauri na veisau qori.” Kena ibalebale, ni a buli na boto qo. *

Na cava o nanuma? E bula vakaidewadewa na gacagaca ni vakatubukawa ni boto na gastric brooding se buli?