Ni tauyavutaka o Jiova na vuvale, e lesi ira gona na itubutubu mera qaravi luvedra. (Kolosa 3:20) Ni o itubutubu, e nomu itavi mo tuberi luvemu me lomani Jiova, me yaco tale ga me dua na uabula nuitaki. (2 Timoci 1:5; 3:15) E dodonu tale ga mo saga mo kila na ka e tu e lomadra na luvemu. Ia e bibi duadua na nomu ivakaraitaki. O na rawa ni vakavulici luvemu ena Vosa i Jiova ke o tugana e liu e lomamu.—Same 40:8.

NA KA E TUKUNA NA IVOLATABU: “Me totolo ni vakarorogo na tamata yadua, me berabera ni vosa.” (Jemesa 1:19) O na vinakata me kila o luvemu ni o torovi rawarawa. Me kila ni o dau tu vakarau mo vakarorogo ena gauna e vinakata kina me vosa vei iko. Raica me dau vinaka na veimaliwai e vale, me torovi iko kina vakarawarawa. (Jemesa 3:18) Ke nanuma o luvemu ni sa rui kaukaua nomu ivakarau se o dau veivakalewai, de dua ena sega ni talaucaka vinaka na lomana. Mo yalovosovoso vei luvemu, mo dau vakadeitaka tale ga ni o lomani koya.—Maciu 3:17; 1 Korinica 8:1.

NA KA O RAWA NI CAKAVA:

• Mo dau tu vakarau ni vinakata o luvemu mo drau veitalanoa

• Drau dau veitalanoa vakalevu, sega ni gauna ga e basika kina na leqa

NA KA E TUKUNA NA IVOLATABU: “O koya e yalomatuataka na ka ena kunea na ka vinaka.” (Vosa Vakaibalebale 16:20) Ena so na gauna, ena vinakati mo vakasamataka vinaka na ibalebale ni vosa i luvemu mo kila kina na ka dina e tu e lomana. E dau kena ivakarau mera cavuta na gone eso na ka era sega ni nakita. “O koya e tukuna na ka ni bera ni rogoca, e lialia.” (Vosa Vakaibalebale 18:13) Kua ni dau totolo mo cudruvi koya.—Vosa Vakaibalebale 19:11.

NA KA O RAWA NI CAKAVA:

• Se mani cava e tukuna o luvemu, vakadeitaka mo kua ni vosa takoso se cudru

• Vakasamataka lesu na gauna o se gone kina kei na ka e rairai bibi vei iko ena gauna ya

NA KA E TUKUNA NA IVOLATABU: “Na luvequ, mo rogoca na ivakavuvuli nei tamamu, mo kua ni biuta na ivakasala nei tinamu.” (Vosa Vakaibalebale 1:8) O Jiova e lesi rau na itubutubu me rau lewai ira na gone. E dodonu mo vakavulici luvemu me talairawarawa qai dokai iko. (Efeso 6:1-3) E rawa nira kidava na gone ke ra sega ni ‘duavata na itubutubu ena nodra rai.’ (1 Korinica 1:10) Ke drau sega ni duavata vakaveiwatini, mo drau kua ni cakava qori nira tu na gone, nira na beci kemudrau kina.

NA KA O RAWA NI CAKAVA:

• Veivosakitaka qai duavata ena sala drau na vakavulici luvemudrau kina

• Ke duatani na rai i watimu me baleta na sala me tuberi kina o gone, saga mo kila na vuna e va kina qori na nona rai

NA KA E TUKUNA NA IVOLATABU: “Mo vakavulica na gone ena sala me muria.” (Vosa Vakaibalebale 22:6) E vinakati na sasaga moni vakavulici ira vinaka kina na luvemuni. E bibi me dua na ituvatuva ni veivakavulici, qori e okati kina na veivakadodonutaki. (Same 127:4; Vosa Vakaibalebale 29:17) Na veivakadodonutaki e sega ni vakaibalebaletaka wale ga na itotogi e tau, ia e okati kina na nodra vukei na gone mera kila na vuna e biu kina na lawa. (Vosa Vakaibalebale 28:7) Mo vakavulici ira tale ga mera marautaka na Vosa i Jiova, mera kila na kena ivakavuvuli. (Same 1:2) Qori ena vukei ira mera bucina na lewaeloma vinaka.—Iperiu 5:14.

NA KA O RAWA NI CAKAVA:

• Vakadeitaka vei luvemu ni bula dina tiko o Jiova, e rawa nira nuitaki koya tale ga

• Vukei ira mera kila ra qai qaqarauni ena veika e rawa ni veivakaleqai, me vaka na kena e laurai ena Internet se sala ni veikilai. Vakavulici ira mera qaqarauni vei ira na dau veivaqaseni