Qo e dua na mataqali tovuto e rawa ni nunuva sobu e 2,992 na mita. Na bi ni wai (pressure) ena vanua titobu qori e rauta ni 4,390 na kilopascal. E rawa tale ga ni nunu tu vakabalavu. E laurai ni dua mada ga na tovuto va qori e rawa ni nunu tu me 3 na aua 42 na miniti, oti ena lesu i delaniwai me vaqara cagi. E rawa vakacava vua na manumanu qo me tu dede i lomaniwai qai lailai na cagi e vakayagataka?

 Me vakataki ira na vo ni manumanu era bula i wai, na tovuto tale ga e dau lobika na sui ni sarisarina qai vakalailaitaka sara nona yatevuso. Era raica na dauvakadidike ni gauna e berabera kina na pamu ni nona uto ena lailai na cagi e vakayagataka, qai drodro ga na dra ina nona mona, uto, kei na masela.

 E tiko tale ga e yagodra na manumanu ni wai e dua na protein e vakatokai na myoglobin, e dau maroroya na cagi ena nodra masela. Nira nunu gona ena vanua titobu era na qai vakayagataka tiko na cagi qori. E levu duadua na myoglobin e tiko ena nodra masela na tovuto, ni vakatauvatani kei keda kei na manumanu ni vanua.

 Qo na ka e kaya e dua na dauvakadidike ni tovuto qo: “E vakasakiti na titobu ni vanua era nunuva. Mai na ka keimami kila me baleti ira na manumanu, na tovuto qo e titobu duadua na vanua e nunuva qai dede duadua nona tu i lomaniwai.” Era saga na saenitisi mera kila vinaka na iwalewale ni nona nunu na tovuto qo. De dua ena rawa ni vukei ira na vuniwai mera vakavinakataka na ivakarau ni veiqaravi vei ira e vakaleqai nodra yatevuso.

 Cava o nanuma? E buli se bula vakaidewadewa nona rawa ni nunu tu vakadede na cuvier beaked whale?