“O koya gona, moni vakamalumalumutaki kemuni ena liga kaukaua ni Kalou, ena qai vakacerecerei kemuni ena gauna lokuci, moni biuta vua na nomuni lomaocaoca kece, ni kauaitaki kemuni o koya.”—1 Pita 5:6, 7, Vakadewa ni Vuravura Vou.

 “O koya oqo mo dou qai vakamalumalumutaki kemudou e ruku ni liga kaukauwa ni Kalou, me vakalevulevui kemudou cake ko koya e na gauna sa lokuci: ka dou biuta vei koya na nomudou lomaocaoca kecega ni sa daunanumi kemudou ko koya.”—1 Pita 5:6, 7, New King James Version.

 E vakayaloqaqataki ira na lotu vaKarisito na yapositolo o Pita. E kaya ni rawa nira masulaka ena nuidei vua na Kalou na nodra leqa kei na lomaocaoca. Na Kalou e taleitaki ira na yalomalumalumu, e dau vakalougatataki ira vakalevu.

 “Moni vakamalumalumutaki kemuni ena liga kaukaua ni Kalou.” Ena iVolatabu, na liga ni Kalou e dau vakaibalebaletaki vakalevu ena nona kaukaua me veivakabulai qai veitaqomaki. (Lako Yani 3:19; Vakarua 26:8; Esera 8:22) Era vakamalumalumutaki ira ena liga ni Kalou na lotu vaKarisito nira vakararavi vua. Era kila ni vakaiyalayala na ka era rawata qai dredre mera vosota vakataki ira na ituvaki dredre. (Vosa Vakaibalebale 3:5, 6; Filipai 4:13) Era nuidei ni tu vua na Kalou na kaukaua me vukei ira ena gauna donu kei na sala vinaka duadua.—Aisea 41:10.

 “Ena qai vakacerecerei kemuni ena gauna lokuci.” Era nuidei o ira na vosota tiko na veika dredre, ni Kalou ena vakacerecerei ira, ya me vakaicovitaki ira. Ena sega ni vakalaiva me sivia na ka era vakatovolei kina na nona dauveiqaravi, se mera sega ni taqea rawa. (1 Korinica 10:13) Ke ra cakava tiko ga na ka vinaka, ena vakaicovitaki ira dina na Kalou ena “gauna lokuci.”—Kalatia 6:9.

 “Moni biuta vua na nomuni lomaocaoca kece, ni kauaitaki kemuni o koya.” Era biuta se viritaka vua na Kalou na nodra lomaocaoca na lotu vaKarisito nira masu vua ena yalomalumalumu. E tukuni ena dua na ivola: “Na vosa vaKirisi ni “biuta” e tiko kina na vakasama ni noda saga vakaukaua meda viritaka tani e dua na ka. E vakaibalebaletaka e dua na ka eda nakita meda cakava.” Ni dua na lotu vaKarisito e biuta se viritaka vua na Kalou nona lomaocaoca, ena vakalailaitaka nona lomaleqa qai vakila na ka e vakatoka na iVolatabu me “vakacegu ni Kalou.” (Filipai 4:6, 7) E nuidei ni Kalou e via vukei koya. Na vuna? E kila ni kauaitaki koya na Kalou, qai tu vua na kaukaua levu me vukei koya.—⁠Same 37:5; 55:22.

 Na wase 5 e itinitini ni nona ivola na yapositolo o Pita vei ira na lotu vaKarisito. (1 Pita 1:1) Me vakataki keda ena gauna qo, era sotava tale ga na lotu vaKarisito ena gauna ya na ituvaki dredre e vakatovolei kina nodra vakabauta qai vakavu lomaocaoca. (1 Pita 1:6, 7) Qori na vuna e vola kina o Pita na ivola veiuqeti qai veivakayaloqaqataki qo ena rauta na 62-64 G.V.—1 Pita 5:12.

 E tinia o Pita na nona ivola ni vakayaloqaqataki ira na vakatovolei tiko nodra vakabauta. Ke ra yalomalumalumu tiko ga qai nuitaka na Kalou, ena vukei ira o koya mera tudei. (1 Pita 5:5-10) Na ka e vola o Pita e rawa ni vakayaloqaqataki ira tale ga na lotu vaKarisito era vakacacani ena gauna qo.

 Sarava na ivakamacala lekaleka ni ivola na 1 Pita.