E veisemati vinaka na lewe ni iVolatabu taucoko. Ena rairai nanumi ni veisaqasaqa na ka e volai kina ena vuku ni so na tikinivolatabu. Ia e dau qai matata na kedra ibalebale ni vakasamataki e vica na idusidusi qo:

1.   Dikeva na ikotokoto. E rawa ni nanumi ni veicalati na ka e vola e dua ke tauri cala na ka e kaya.

2.   Vakasamataka na nona rai o koya e volavola. E rawa ni donu na ka era tukuna o ira na raica na ituvaki a yaco. Ia e duidui na vosa era vakayagataka. Eso tale ga ena rairai matailalai sara na ka era kaya, eso tale e sega.

3.   Kauaitaka na itukutuku makawa kei na ivakarau vakavanua.

4.   Vakadeitaka ke vakatakarakarataka e dua tale na ka na vosa e vakayagataki, se ya sara ga na kena ibalebale dina.

5.   So na gauna e rawa ni cavuti ga e dua ena ka e volatukutukutaki ni yaco, ia e rawa nira vakaitavi tale ga ena ka e yaco qori eso tale. a

6.   Vakayagataka e dua na vakadewa donu ni iVolatabu.

7.   Kua ni moica na ka e kaya na iVolatabu me tokona na ivakavuvuli lasu.

 Qo eso na kena ivakaraitaki e rawa ni vakamatatataka eso na ka e nanumi ni veisaqasaqa kina na lewe ni iVolatabu.

iMatai ni idusidusi: Tikina Wavolita

  Ke a vakacegu na Kalou ena ikavitu ni siga, e rawa vakacava ni tukuni ni se cakacaka tiko ga? Ni laurai na ikotokoto a vakamacalataki kina na bulibuli ena Vakatekivu, na nona “vakacegu ena ikavitu ni siga mai na ka kece e cakava” na Kalou e vakaibalebaletaka na nona bulibuli me baleta na vuravura. (Vakatekivu 2:2-4) E sega ni veisaqasaqa kina na nona tukuna o Jisu ni ‘cakacaka tiko ga na Kalou me yacova mai qo,’ baleta e vakaibalebaletaki tiko qori ina so tale na cakacaka ni Kalou. (Joni 5:17) E okati ena cakacaka ni Kalou na nona veiuqeti me volai na iVolatabu, na nona dusimaka, kei na nona karona na kawatamata.—Same 20:6; 105:5; 2 Pita 1:21.

iKarua kei na ikatolu ni idusidusi: iVakarau ni rai kei na itukutuku makawa

  Na vanua cava a vakabula kina o Jisu na tagane mataboko? E tukuni ena Luke ni a vakabula o Jisu e dua na turaga mataboko “ni volekati Jeriko.” Dua tale na kena ivolatukutuku ena Maciu e cavuti kina e rua na tagane mataboko, qai tukuni ni veivakabulai o Jisu ni “biuti Jeriko.” (Luke 18:35-43; Maciu 20:29-34) E duidui na ka e tukuni ena rua na ivolatukutuku qori, ia sega ni kena ibalebale ya ni veisaqasaqa. O Maciu e matailalai na ka e vola ni cavuta e rua na mataboko, ia o Luke e cavuti koya ga na tagane a vosa vua o Jisu. Vakacava na vanua a veivakabulai kina o Jisu? Era kaya na dauvakekeli ni rua na Jeriko ena gauna i Jisu, na koro makawa e rauta ni dua veimama na kilomita mai na koro vou a tara donuya nodra veiliutaki na kai Roma. A rairai tiko o Jisu ena kedrau tadrua na koro e rua qori ena gauna a veivakabulai kina.

iKava ni idusidusi: Vakaivakatakarakara se na kena ibalebale dina

  Ena vakarusai na vuravura? E kaya na Dauvunau 1:4 “na vuravura ena tu ga me tawamudu.” Era nanuma eso ni veisaqasaqa qori kei na kena tukuni tale ga ena iVolatabu ni na “vakamai na vuravura kei na ka e tu kina.” (2 Pita 3:10, Beck) Ia ni vakayagataki ena iVolatabu na vosa na “vuravura,” e dau dusia na vuravura qele, e rawa ni vakatakarakarataka tale ga na kawatamata. (Vakatekivu 1:1; 11:1) Ni tukuni gona ena 2 Pita 3:10 ni na vakarusai na “vuravura,” sega ni kena ibalebale ni na vakamai na vuravura qele. Ia e vakaibalebaletaka tiko ga na nodra “vakarusai .   . o ira na sega ni doka na Kalou.”—2 Pita 3:7.

iKalima ni idusidusi: Kilai se o cei e cakava dina na ka e volatukutukutaki

  O cei a kerekere vei Jisu ena vukuna na turaganivalu? E tukuni ena Maciu 8:​5, 6 ni a gole sara ga vei Jisu na turaganivalu. Na Luke 7:3 e kaya ni tala eso na nodra qase na Jiu na turaganivalu mera lai kerekere ena vukuna. Me kua ni nanumi ni veisaqasaqa e keri na ka e volai ena iVolatabu. Na vuna? A kerekere dina na turaganivalu, a talai ira ga na qase mera lai vakadewataka na nona kerekere.

iKaono ni idusidusi: Vakadewa donu

  Vakacava eda ivalavala ca kece? E kaya na iVolatabu ni vakadewa vei keda kece na ivalavala ca o Atama. (Roma 5:12) Era vakacala qori eso na vakadewa ni iVolatabu nira tukuna ni sega ni “cala” se “valavala ca” na tamata vinaka. (1 Joni 3:6, The Bible in Basic English; King James Version) Ia ena iVolatabu taumada, na vosa vaKirisi e vakadewataki me “valavala ca” ena 1 Joni 3:6 e tiko kina na vakasama ni ka e caka tiko ga. Na ivalavala ca eda sucukaya mai e sega nida cakava rawa kina e dua na ka. Ia e duidui na valavala ca e nakiti, se na nona beca tiko ga e dua na lawa ni Kalou. E kilai vakacava ni sega ni veisaqasaqa na ka e kaya na iVolatabu? Eso tale na iVolatabu e donu na nodra vakadewa nira vakayagataka na matavosa me vaka na “sega ni valavala ca tiko ga” se “sega ni valavala ca wasoma.”—Vakadewa ni Vuravura Vou; Phillips.

iKavitu ni idusidusi: Yavutaki ena iVolatabu

  Vakacava erau tautauvata o Jisu kei na Kalou? A kaya o Jisu ena dua na gauna: “Keirau duavata kei Tamaqu.” Qori e nanumi ni veisaqasaqa kei na nona kaya ‘ni cecere sara vua o Tamana.’ (Joni 10:30; 14:28) E bibi meda kila na ibalebale dina ni tikinivolatabu qori ena noda dikeva na ka e kaya na iVolatabu me baleti rau o Jiova kei Jisu. Meda kua ni moica na tikinivolatabu me tokona na Letoluvakalou, na ivakavuvuli e sega ni yavutaki ena iVolatabu. E kaya na iVolatabu ni o Jiova na Tama i Jisu, na Kalou tale ga qori e qarava o Jisu. (Maciu 4:10; Marika 15:34; Joni 17:3; 20:17; 2 Korinica 1:3) Kena ibalebale erau sega ni tautauvata o Jisu kei na Kalou.

 E laurai ena ikotokoto a tukuna kina o Jisu ni rau ‘duavata kei Tamana,’ ni vakaibalebaletaka tiko na nodrau duavata ena inaki kei na Tamana, na Kalou o Jiova. A kaya ena dua tale na gauna e muri o Jisu: “[E] duavata kei au o Tamaqu, au duavata tale ga kei Tamaqu.” (Joni 10:38) E va tale ga qori na nodratou duavata ena inaki o Jisu kei ratou na nona imuri. A kaya o Jisu ena nona masu vua na Kalou: “Au sa vakalagilagi ira me vaka na nomuni vakalagilagi au, mera duavata me vaka nodaru duavata. Au duavata kei ira, oni duavata kei au.”—Joni 17:22, 23.