E sega ni bau cavuti ena iVolatabu na Shroud of Turin. Qori e dua na siti lineni era nanuma e levu ni a bulu kina o Jisu Karisito. E levu gona na lotu ni Veivanua vaKarisito era raica na siti qori me vaka e dua na ka tabu. E lai maroroi sara ena dua na kisi e taqomaki vinaka tu ena dua na valenilotu mai Turin, e Itali.

 Vakacava e tokona na iVolatabu ni tiko dina na Shroud of Turin? E sega.

 Dikeva mada na veika me baleta na isulu qori e duidui mai na ka e vakamacalataka na iVolatabu.

1.   Na shroud e dua ga na isulu, na kena balavu e 442 na sedimita qai 113 na sedimita na kena raba. E cula tale ga vakababa e 8 na sedimita na tikinisulu balavu.

    Ka e kaya na iVolatabu: A sega ni viviraki na yago i Jisu ena dua ga na isulu se siti, ia ena vica vata na isulu balavu. A viviraki tale ga na uluna ena duatani na isulu. Ena gauna sa vakaturi oti kina e gole e dua nona yapositolo ena nona ibulubulu sa lala tu qai “raica . . . ni sa tu e ra na isulu lineni.” E tomana na iVolatabu: “Na isulu a viviraki e ulu i Jisu sa sega ni biu vata tu kei na ivovo ni tikinisulu, ia e sa vivi qai biu toka vakatikitiki.”​—Joni 20:​6, 7.

2.   Na shroud era tu kina eso na maka e nanumi ni dra mai na yagomate e sega ni vakasavasavataki.

    Ka e kaya na iVolatabu: Na gauna e mate kina o Jisu eratou vakarautaka na yagona na nona tisaipeli “me vaka ga na nodra ivakarau ni veibulu na Jiu.” (Joni 19:39-​42) E kena ivakarau vei ira me dau sava na yago ni mate, lumu ena waiwai kei na ivakaboivinaka, oti qai bulu. (Maciu 26:12; Cakacaka 9:​37) Eratou na vakasavasavataka gona na yagoi Jisu na nona tisaipeli ni bera ni viviraki ena isulu.

3.   Na shroud e tukuni ena Encyclopædia Britannica ni tiko kina na ivakatakilakila ni dua na turaga e “vakadavori vakanatutu ena veimama ni siti, ia na kena veimama tale adua e viviraki kina vakarua na uluna me ubi kina na yagona kece e liu.”

    Ka e kaya na iVolatabu: Ratou a veivosakitaka na tisaipeli i Jisu na nona mate na kena sa lala tu na ibulubulu, kei na nodratou ivakadinadina na yalewa ratou raica “na agilosi qai tukuna vei ratou ni sa bula tale o koya.” (Luke 24:15-​24) Ke a tiko na isulu (shroud) qo ena ibulubulu i Jisu, macala ga ni ratou na veivosakitaka na nona tisaipeli kei na veika e laurai ena isulu qori. Ia e sega ni dua na veivosaki va qori me volaitukutukutaki ena iVolatabu.

 Sega. Kevaka mada ga e dina na veika me baleta na shroud e sega ga ni dodonu me sokaloutaki. Dikeva mada na ivakavuvuli vakaivolatabu e vakamacalataka na vuna.

1.   E sega ni dodonu qori. E kaya o Jisu: “E yalo na Kalou, o ira na sokalou vua e dodonu mera sokalou vakayalo, mera dina tale ga ena nodra sokalou.” (Joni 4:​24) Na sokalou dina e sega ni vakayagataki kina na ivakatakarakara ni lotu se ivakatakilakila.

2.   E vakatabui. E vakatabui na qaravi matakau ena iVunau e Tini. (Vakarua 5:​6-​10) E vakaroti ira tale ga na lotu vaKarisito na iVolatabu: “Ni qarauna na qaravi matakau.” (1 Joni 5:​21) Era na rairai kaya eso ni sega ni matakau na shroud, e ivakatakilakila ga se ivakatakarakara ni nodra vakabauta vakalotu. Ia ke sokaloutaki, sa vaka ga na matakau. a O koya gona e via vakamarautaka na Kalou ena sega ni qarava se doka e dua tale na ka, wili kina na shroud.