E 66 na ivola ena iVolatabu qai volai ena loma ni 1,600 na yabaki. E tiko kina na itukutuku vakalou se “na vosa ni Kalou.”—1 Cesalonaika 2:13.

Ena ulutaga qo

•  Ka dina me baleta na iVolatabu

•  Cava sara mada e tu ena iVolatabu?

•  Sa veisautaki na ka e volai kina?

•  Cava e levu kina na vakadewa ni iVolatabu?

•  O cei e lewa na ka e volai ena iVolatabu?

•  A bau yali eso na ivola ena iVolatabu?

•  O na kunea vakacava na tikinivolatabu?

•  Veitaravi ni ivola ena iVolatabu

•   O cei e vola na iVolatabu? Na Kalou e vakavuna na volai ni iVolatabu. E vakayagataka e 40 na tagane mera vola me vakai Mosese, Tui Tevita, Maciu, Marika, Luke kei Joni. a Na Kalou e biuta na nona rai ena nodra vakasama na dauvola iVolatabu me rawa nira vola na nona itukutuku.—2 Timoci 3:16.

   Kena ivakaraitaki: E tukuna e dua na daunibisinisi vei nona vunivola me vola e dua na ivola. Kena ibalebale, na itukutuku kece e vola o vunivola e nei daunibisinisi. E va sara ga qori na volai ni iVolatabu, e vakayagataki ira na tagane na Kalou mera vola nona itukutuku, ia o koya ga e vakavuna na volai ni iVolatabu.

•   Cava na ibalebale ni vosa “Bible”? Qori e kau mai na vosa vaKirisi na biblia, e kena ibalebale “ivola lalai.” Toso na gauna e vakatokai me biblia na ivola lalai kece era okati ena iVolatabu.

•   E volai ena gauna cava na iVolatabu? Tekivu volai ena 1513 B.G.V. qai oti ena 98 G.V. Kena ibalebale, e rauta ni 1,600 na yabaki na dede ni kena volai.

•   E se tiko na ilavelave taumada ni iVolatabu? Sa sega tale ni kune e dua na ilavelave qori nikua. Na vuna? Ni gauna ya se volai tu na iVolatabu ena iyaya e ca rawarawa me vaka na kuta, kei na kulinimanumanu. Ia vica vata na senitiuri na nodra lavetaka tiko vakavica na vunivola na iVolatabu. Era maroroya vinaka tu me rawa ni wiliki ena veigauna se bera mai.

•   Cava na “Veiyalayalati Makawa” kei na “Veiyalayalati Vou”? Ena iVolatabu na Veiyalayalati Makawa, e dusia na ivola kece era volai taumada ena vosa vakaIperiu. b E vakatokai tale ga me iVolatabu vakaIperiu. Na Veiyalayalati Vou e volai taumada ena vosa vaKirisi, e vakatokai tale ga me iVolatabu vaKirisi vaKarisito. Rau qai okati na rua na iwasewase qori ena dua ga na ivola, ya na iVolatabu. c

•   Cava e okati ena iVolatabu? E tu kina na itukutuku makawa, lawa, parofisai, serekali, vosa vakaibalebale, sere, kei na ivola.—Raica na ulutaga, “ Veitaravi ni iVola ena iVolatabu.”

 E vakamacalataki ena itekitekivu ni vola ena iVolatabu na nona bulia na Kalou Cecere na lomalagi kei na vuravura. E tukuna kina vei keda ni yacana o Jiova, qai vinakata meda kilai koya kece.—Same 83:18.

 E vakamacalataki tale ga kina na nona vakaucacataki na Kalou, kei na sala ena vakalasuya kina na Kalou na veibeitaki e caka vua.

 E vakaraitaka na inaki ni Kalou me baleta na kawatamata, kei na vuravura. E vakamacalataka na sala ena vakaotia kina na ka kece e vakavuna na rarawa ni tamata.

 E tu kina na ivakasala yaga me baleta na bula ni veisiga. Qo eso na kena ivakaraitaki:

•   Vinaka noda veimaliwai. “Na ka kece dou vinakata mera cakava vei kemudou na tamata, dou cakava tale ga vei ira.”—Maciu 7:12.

   Kena ibalebale: Meda cakava vei ira eso tale, na ka eda vinakata me caka vei keda.

•   Nida lomaocaoca. “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca.”—Maciu 6:34.

   Kena ibalebale: Meda kauaitaka ga na bula ni veisiga yadua, da qai kua ni lomaocaocataka vakasivia na veika me baleta na veigauna se bera mai.

•   Marautaki ni bula vakawati. “O kemuni na tagane moni lomana tale ga na dui watimuni me vaka ga nomuni lomani kemuni, ia na yalewa me dokai watina vakalevu.”—Efeso 5:33.

   Kena ibalebale: E bibi na veilomani, kei na veidokai me rawa ni marautaki na bula vakawati.

 Sega. Nira vakatauvatana na dauvakadidike na ilavelave ni iVolatabu makawa kei na iVolatabu ni gauna qo, era raica ni sega ni veisau vakadua na itukutuku ena iVolatabu. Io, qori ga na ka e vinakata na Kalou, ya me wiliki qai kilai na nona itukutuku. E vakadeitaka na Kalou ni na sega ni veisautaki na itukutuku a volai taumada ena iVolatabu. d—Aisea 40:8.

 Levu na dauwiliwili ena gauna qo era sega ni rawa ni wilika na vosa e volai taumada kina na iVolatabu. Ia e tu ena iVolatabu na “itukutuku vinaka” mera kila na “veimatanitu, na veiyavusa kei na duivosavosa.” (Vakatakila 14:6) Ena vinakati gona me vakarautaki na iVolatabu ena nodra vosa ga me rawa nira wilika qai kila na itukutuku ni Kalou.

 Tolu na sala e vakadewataki kina na iVolatabu:

•   Vakadewataki yadudua na vosa.

•   Vakadewataki ga na vakasama ena vosa e volai taumada kina.

•   Vakadewataki vakalekaleka, ya me veisautaki na vosa e volai taumada kina me rawa ni marautaki na kena wiliki. Ia eso na gauna ena rawa ni cala kina na ibalebale dina ni dua na tikinivolatabu

 Me rawa ni vakadewataki donu na Vosa ni Kalou, ena vinakati me veiraurautaki vinaka na vakadewataki vosa yadudua, qai vakayagataki ga na vosa rawarawa. e

 Na Kalou, ni o koya ga e vakavuna na volai ni iVolatabu. E digitaka taumada na matanitu makawa kei Isireli “mera maroroya na vosa ni Kalou.” E lesi ira gona mera taqomaka na iVolatabu vakaIperiu.—Roma 3:2.

 Sega. Era tiko kece na ivola ena iVolatabu, e sega ni dua e “yali.” Eso era kaya ni vunitaki tu eso na ivola e dodonu mera okati ena iVolatabu. f Ia e tu ena iVolatabu na ivakadinadina ni donu na ka e volai kina. (2 Timoci 1:13) E laurai kina sega ni veisaqasaqa na ivola ena iVolatabu. Ia e sega ni laurai qori ena ivola makawa era tukuna eso ni dodonu me okati ena iVolatabu. g