Vakatakila e Vola o Joni 14:1-20
14 Niu rai yani, au raica sara na Lami+ ni tucake tu e Ulu i Saioni,+ era tucake vata tu kei koya e 144,000,+ e volai e yadredra na yacana kei na yaca i Tamana.+
2 Au rogoca e dua na rorogo mai lomalagi e vaka na vakere ni wai levu, e vaka na vadugu ni kurukuru, na rorogo au rogoca qo e vaka na domodra na daulagasere era qiria tale tiko ga na nodra api.
3 E vaka mera lagata tiko e dua na sere vou+ ena mata ni idabedabe vakaturaga, e matadratou na va na kabula,+ e matadra tale ga na qase,+ e sega tale ni dua e kenadau ena sere ya, o ira ga na 144,000+ era voli mai vuravura.
4 O ira qo era sega ni vakadukadukalitaki ira kei na yalewa, era se sega ni veiyacovi.+ Era muria tiko ga na Lami se mani vanua cava e lako kina.+ Era voli mai+ ena kedra maliwa na kawatamata mera isevu+ vua na Kalou kei na Lami,
5 e sega ni kune e gusudra na lasu, era sega ni tauvi duka.+
6 Au qai raica e dua tale na agilosi ni vuka voli e macawa, e kacivaka tiko na itukutuku vinaka tawamudu vei ira na tiko e vuravura, vei ira na veimatanitu, na veiyavusa, na duivosavosa, kei na tamata kece.+
7 E kaya tiko ena domolevu: “Moni rerevaka na Kalou, moni vakalagilagi koya, ni sa yaco mai na aua me veilewai kina o koya,+ moni qaravi koya gona e bulia na lomalagi, na vuravura, na wasawasa,+ kei na ivurevure ni wai.”
8 E muri koya e dua tale na agilosi, na kena ikarua, e kaya: “Sa bale o koya! Sa bale+ o Papiloni na Ka Levu,+ o koya e vagunuvi ira na matanitu kece ena waini ni cudru, na waini ni nona veiyacovi tawadodonu!”*+
9 E muri rau yani e dua tale na agilosi, na kena ikatolu, e kaya ena domolevu: “Ke dua e qarava na manumanu kila+ kei na kena ivakatakarakara, e vakatakilakilataki tale ga na yadrena se ligana,+
10 ena gunuva tale ga na waini ni cudru ni Kalou, e sosoko tu ga ni livi ina bilo ni nona cudru,+ ena qai vakararawataki ena bukawaqa kei na sulifure+ e matadra na agilosi yalosavasava kei na mata ni Lami.
11 Ena tawamudu na kena kuvu cake tiko na kubou ni nodra rarawa,+ era na sega ni vakacegu ena siga kei na bogi o ira na qarava na manumanu kila kei na kena ivakatakarakara, vaka kina o koya e vakatakilakilataki ena yacana.+
12 Qo na vuna e vinakati kina vei ira na yalosavasava na vosota,+ nira muria na ivunau ni Kalou, ra qai dei ena nodra vakabauti+ Jisu.”
13 Au qai rogoca ni kaya e dua na domo mai lomalagi, “Mo vola: Tekivu qo, era na marau o ira na mate nira duavata kei na Turaga.+ Io, e kaya na yalo tabu, mera vakacegu mai na nodra cakacaka, ni na salavata kei ira na ka era cakava.”
14 Niu rai yani, au raica sara e dua na o vulavula, e dabe tiko ena o e dua e vaka na luve ni tamata,+ e toka e uluna e dua na isalanitui koula, e taura tu e ligana e dua na iseletakelo gata.
15 E basika mai ena rumu tabu ni valenisoro e dua tale na agilosi, e kacivaka ena domolevu vei koya e dabe tiko ena o: “Taura mai na nomu iseletakelo mo tatamusuki sara, ni sa yaco mai na aua ni tatamusuki, ni sa matua vinaka na ka me tamusuki e vuravura.”+
16 E mani dodoka i vuravura na nona iseletakelo o koya e dabe tiko ena o, qai tamusuki vuravura.
17 E qai basika mai ena rumu tabu ni valenisoro mai lomalagi e dua tale na agilosi, e taura tale tiko ga e dua na iseletakelo gata.
18 E basika mai na icabocabonisoro e dua tale na agilosi, e lewa na bukawaqa. E kacivaka ena domolevu vei koya e taura tiko na iseletakelo gata: “Taura mai na nomu iseletakelo gata, mo kumuna mai na isoso vaini kei vuravura, ni sa dreu na vuanivaini.”+
19 E mani dodoka i vuravura na nona iseletakelo na agilosi, e kumuna mai na vaini kei vuravura, e qai kolotaka ina ikeliniwaini levu ni cudru ni Kalou.+
20 E butulaki sara na ikeliniwaini ena taudaku ni koro, qai drodro mai na ikeliniwaini na dra, na levu ni dra e yacova na varaele ni ose na kena cere, na kena raba e rauta ni 1,600 na sitadia.*
iVakamacala e ra
^ Kirisi por·neiʹa. Raica na iVakamacala ni Vosa.
