Wiadze mu etumfo nye ahyehyɛdze ahorow a wɔwɔ wiadze yi mu no abɔ hɔn ho mbɔdzen biara dɛ wɔbɛma asomdwee aba wiadze, naaso wonntum. Ofitsi aber a wiadze ko II no baa ewiei no, ako a ɔrokɔ do ndɛ no kyɛn aber biara a abɛsen kɔ. Nyimpa bɛyɛ ɔpepepem ebien na wɔwɔ mbea ahorow a ɔko rokɔ do. Iyi ma yehu dɛ sɛ wɔkyɛ nyimpa dodow a wɔwɔ wiadze yi mu anan a, hɔn mu kor na wɔtse aman a ɔko rokɔ do mu.

 Ebɛnadze ntsi na nyimpa nnyi asomdwee? Ebɛn asɛm na Bible no ka fa ho?

1.  1. Suban a nyimpa da no edzi ndɛ no ma yehu dɛ wɔnnyɛɛ hɔn adwen dɛ wɔnye hɔnho bɛtsena asomdwee mu. Bible no kaa too hɔ dɛ, hɛn aber yi do no, ‘nyimpa bɛyɛ ahopɛfo, sikapɛfo, hɔn a wɔhoahoa hɔnho, ahantanfo, . . . hɔn a wodzi nkorɔfo hweambɔ, . . . hɔn a wonntum nnye hɔn nnyɛ apam, . . . hɔn a wonnyi ahohyɛdo, abɔyafo, . . . etsirmuɔdzemfo, ahomemadofo.’​—2 Timothy 3:2-4.

2.  2. Nyimpa biara runntum nnyi adasamba haw mmfi hɔ. Sɛ nyimpa nyina yɛ adwen kor mpo a worunntum, gyedɛ hɔn bɔfo Jehovah a Nyankopɔn dze no ho gye mu. Bible no ma yehu dɛ “onnyi ɔdasanyi a ɔnam ne nsamu mbrɛ obodua etutu n’anamɔn.”​—Jeremiah 10:23.

3.  3. Tumdzifo tsirmuɔdzemfo bi a wɔfrɛ no Satan Abɔnsam na odzi wiadze yi do tum, na Bible no ka no ho asɛm dɛ ɔno nye “wiadze nyina daadaafo no.” (Nyikyerɛ 12:9) Mber dodow a ‘wiadze nyina hyɛ ɔbɔnfo no tum ase no,’ ɔko na etsim-na-aka-me no tun runntwa da.​—1 John 5:19.

 Bible no ma hɛn awerɛhyɛmu dɛ ɔnyɛ dɛn ara a asomdwee bɛba, naaso ɔnnyɛ nyimpa na ɔdze bɛba mbom Nyankopɔn.

•   ’Na minyim adwen a modwen wɔ homho, Jehovah na ɔse, asomdwee adwen a, na nnyɛ mbusu adwen bi a, dɛ mebɛma hom enyidado wɔ hom ewiei.’​—Jeremiah 29:11.

 Ebɛn kwan do na Nyankopɔn bɛma dɛm bɔhyɛ yi aba mu? “Asomdwee Nyankopɔn bodwuruw Satan.” (Romefo 16:20) Nyankopɔn wɔ aban bi wɔ sor na ɔno na ɔnam do dze asomdwee bɛba wiadze. Bible no frɛ dɛm aban no ‘Nyankopɔn Ahendzi.’ (Luke 4:43) Jesus Christ na ɔyɛ Ahendzi no do Hen, na sɛ ɔhyɛ ase dɛ oridzi tum a, ɔbɛkyerɛkyerɛ nkorɔfo ma wɔnye hɔnho atsena asomdwee mu.​—Isaiah 9:6, 7.

•   Sɛ epɛ dɛ ihu iyi ho nsɛm pii a, kenkan asɛm a wɔato dzin “What Will God’s Kingdom Accomplish?”