Siantsir a odzidzi do yi na ɔmma Jehovah Adasefo nnkɔ akodzi:

1. Setsie ma Nyankopɔn. Bible no kã Nyankopɔn asomfo ho asɛm dɛ “wɔdze hɔn mfõwa abobɔ nsɔw . . . eso worunnsũa akodzi bio.”​—Isaiah 2:4.

2. Setsie ma Jesus. Jesus kãe kyerɛɛ ɔsomafo Peter dɛ: “Fa wo nkrantsee hyɛ ne hyɛbea bio, na hɔn a wɔfa nkrantsee nyina, nkrantsee anomu na wɔbɛhera.” (Matthew 26:52) Ntsi Jesus daa no edzi dɛ n’ekyirdzifo nnkɛfa akodze edzi dwuma.

   Jesus n’esuafo no dzi n’ahyɛdze a ɔnye dɛ “wommfi wiadze” no do, dze nam dɛ wonngyina ɔfã biara wɔ amansɛm mu. (John 17:16) Wɔnnsoɛr nntsia akodzi ho nhyehyɛɛ ahorow, na hɔn a wɔpaw dɛ wɔbɛyɛ nsordaafo no so, yenntwitwa hɔn akwan mu.

3. Ɔdɔ ma afofor. Jesus hyɛɛ n’esuafo no dɛ; “hom ndodɔ homho nkorkor.” (John 13:34, 35) Iyi kyerɛ dɛ, wɔbɛyɛ amanaman ntamu enuayɛ kuw a no munyi biara nnkɔsoɛr nye no nua akõ.​—1 John 3:10-12.

4. Christianfo a wodzi kan no hɔn nhwɛdo. Encyclopedia of Religion and War nwoma no kã dɛ: “Jesus n’ekyirdzifo a wodzi kan paa no poow akodzi nye nsordaafo edwuma,” na wobuu dɛm ndzeyɛɛ ahorow no dɛ “ɔnnye ɔdɔ ho ngyinadosɛm a Jesus dze mae nye kã a ɔkãe dɛ yɛndɔ hɛn atamfo no nnhyia.” Dɛmara so na Germannyi Peter Meinhold a ɔyɛ nyamesom ho ɔbemfo no kãa Jesus n’esuafo a wodzi kan no ho asɛm dɛ: “Nna wobu no dɛ, obi runntum nnyɛ Christiannyi na ɔnnsan so nnyɛ sordaanyi.”

Jehovah Adasefo yɛ ɔman mba pa a hɔn ho wɔ mfaso, na wɔmmfa ɔman a wɔtse mu no hɔn asomdwee anaa eyiedzi nnto esian mu. Yɛkyerɛ obu ma aban no tumdzi, na iyi nye Bible mu ahyɛdze ahorow yi hyia:

• “Hom mma akra nyina mbrɛ hɔnho adze mma etum a ɔkrɔn.”​—Romefo 13:1.

• “Ntsi hom ndan dza ɔyɛ Caesar dze mma Caesar, na dza ɔyɛ Nyankopɔn dze mma Nyankopɔn.”​—Matthew 22:21.

Ntsi yedzi mbra no do, yetua hɛn tow, na yɛpen mbɔdzen a aban no bɔ dɛ ɔbɛma ɔman no enya hɔn ehiadze anaa woeedzi yie no do.