AYÈGÈ 03

Ye wò tsog na é dzam Bibel a dzo a ne tutué?

VOGOLO A

Bibel a bele abui melebega ai mengaaga. Dzam bò na wò yi na wò yem é mam a yegele, ve o ne fe ntsel. O ne dzam sili wòmen na: Ye wò yeane furi afiri doé a nnomo kalara nyi ngaa? Ye é dzam Bibel a dzo a ne fò bia bò ai nfi melu maan ma? Ngeki na ye wò yeane yebe é mam Bibel a dzo me bebege melu ma zu? Bizug bibot bia yebe dò. Bia banda fe wò na o zu yen ai wòmen nge mam me ne nala.

1. Ye minlang ya Bibel mi ne fò bebela?

Bibel émen a lere a sang na “bibug bi ne été bi ne susuo bi tò fe bebela” (Ékklésiast 12:10). A kòbò abui mam ya me nga bòben a mfang mfang ai bot bezing fe ya be nga nying abog té (Lang’a Lukas 1:3; 3:1, 2). Abui beyem mam be nga boala na Bibel a kat bebela éyòng a kòbò dzam mimbu, bot, mefola ai mam mezing ya me nga bòben.

2. Amu dzé bi ne dzo na Bibel a ne bia nfi tò a ne nnom kalara?

Bia kòb abui mam a Bibel a nga dzo, a ma toben melu ma. Bi ne nòng mvulna ai é mam beyem mam ba dzo, Bibel nyè a nga kareya mò. Éyòng be nga til mam meté abui a mbeki a yebege na me ne tutué. Ve melu ma, beyem mam ba yebe na é mam Bibel a nga dzo me ne été. A ne hm été na, Bibel “a tié he é mam me nga teleben kòm ya kòm ése, ma yeane bòben ai fulu afiri ai susuo” (Salmen 111:8).

3. Amu dzé bia yeane bi afiri ai é mam Bibel a dzo me bebege é melu ma zu?

Bibel a bele minkulen medzo * “ya é mam me mbeya ki bòben” (Yésaya 46:10). A nga béndé abui mam abui mimbu osusua yi na ma bòben. A nga kat fe a sang akia ya énying ya yi bò melu maan ma. Ayègè di, bia zu yen abui minkulen medzo ya Bibel. Wò yi yeane kam abui éyòng wò yi yen akia ya mia toben tegè selen!

TUENE FAG

Yene akia afé Bibel a toben ai é mam beyem mam ba dzo, ai yègè na o yem minkulen medzo ya Bibel.

4. Ye Bibel a ne king ai é mam beyem mam ba dzo?

Melu ya mvus, abui bot a nga be a tsog na si é bere a nguma dzom. Bebege VIDÉO.

VIDÉO: Si é kele a mòmò dzom (1:13)

Bebege é dzam kalara Yiob a nga dzo mimbu 3500 ana. Lang’a Yiob 26:7 ai yalen a nsili hi:

Amu dzé a ne dzam minkamen na Bibel a dzo na si é “kele a mòmò dzom”?

A mimbu 1800 ngò beyem mam be nga wog akia ya mendim ma wulu a si. Veda Bibel a nga kulen dò betoyina mimbu osusua. Lang’a Yiob 36:27, 28 ai yalen minsili mi tsaa mi:

Amu dzé akia ya Bibel a tié ane mendim ma wulu a si a ne éyegen dzam?
Ye bifus bi Bibel bi he lang bia yemede afiri doé a Bibel?

5. Bibel a kulen é mam me ne bia nfi abui

Lang’a Yésaya 44:27–45:2 ai yalen a nsili hi:

Asu é dzam la bebe ntsamen Babilon, mam mefé Bibel a nga kulen mimbu 200 osusua?

Bebege VIDÉO.

VIDÉO: Bibel a nga béndé na Babilon a yi tsameben (0:58)

Minlang mi bot mia boala na Nkukuma Cyrus ya Persia ai nkan bita woé be nga nòng Babilon a mbu 539 O.A.D. * Be nga bò na é moro osoé a nga be a bomena tisòn a hélé. Ndò be nga nyii a mimbè mi nga ligi mi yoo, be nga nòng tisòn tegè lumen bita. Tò amvus mimbu 2500, Babilon a ngene bilig. Bi tam yen é mam Bibel a nga kuli.

Lang’a Yésaya 13:19, 20 ai yalen a nsili hi:

Akia afé nkulen adzo wi o nga dzaleben?

Babilon a dzogo mimbong a si a nnam Irak

6. Bibel a nga kuli é mam bia toben ai mò melu ma

Bibel a loé abog daan na “melu ya asugelen.” (2 Timotéus 3:1) Bebege é dzam Bibel a nga dzo é bebege melu ya memana.

Lang’a Matéus 24:6, 7 ai yalen a nsili hi:

Ane Bibel a dzo, dzé ya loren a melu ya memana?

Lang’a 2 Timotéus 3:1-5 ai yalen minsili mi tsaa mi:

Bibel a lere na kan mefulu mefé bot ba yi bi a melu ya memana?
Ye o yeneya mimbòen mité a ngòra dzoé?

ABUI BOT DA DZO NA: “Bibel a ne kalara minlang ya okoba.”

Mfaa woé mendem mefé o bele na Bibel a ne é kalara bia yeane bi afiri ai nyè?

OBALBAS

Minlang, é mam beyem mam ba dzo, ai minkulen medzo me ne mendem ma lere na wò yeane bi afiri ai Bibel.

Dzé bia baala

Ye Bibel a kat bia é mam me nga loren a mfang mfang ngeki na a ne kalara minkana?
Mam mefé ma lere na Bibel ai é mam beyem mam ba dzo ma toben?
Ye wò tsog na Bibel a ne bia kuli é mam ma yi loren melu ma zu? Asu dzé?

Ayègè di a man a:

Nsong’en wòmò

Asu yi na me yemede ndi dzama é mam Bibel a dzo, ma yi lang ngeki a bebe é vom o ne ntilen na: O NE FE BEBE.

Nsong’en mfe:

Nsong’en mfe