AYÈGÈ 01
Akia afé ayègè Bibel a ne wò dzam vòli?
Bi bese bia kare sili minsili mia bebe énying, mindzug, awu, ngeki asu melu ma zu. Bia sang’en fe asu énying bia nying amos ose: ane akia afé bi ne dzali meyang’en ya nda bot dzaan ai na be nying a mebuguben. Abui bot a nga yen na Bibel a bele biyalen ya ngul minsili ya énying ai na a vòli bia asu énying dzaan ya mmos ose. Mfaa woé ye wò tsog na Bibel a ne wò dzam vòli ngaa?
1. Bibel a ve biyalen ya minsili mifé?
Bibel a yalen minsili mi: Éye énying é nga kèè ya? Amu dzé bi ne a si mu? Amu dzé mimbembe mibot mia toben ai mindzug? Dzé ya lot amvus awu mot? Mot ose a yi na a nying a mvòè, ve asu dzé bita bia nemen a si? Si ya yi veng’en dzé melu ma zu? É ne nfi na bi sili biabeben minsili mité. Abui a nga sòm biyalen ya minsili mité a Bibel.
2. Ye Bibel a ne wò dzam vòli énying dzoé ya mmos ose?
Bibel a ve bia abeng melebega. Mvulna dzia é ne na, a vòli menda mebot na me tòbò a mintak. A ve fe melebega asu yi na te bia dang sang’en, ai akia afé bi ne bi mintak ésié dzaan. Ayègè di da yi bia vòli na bi bi biyalen Bibel a ve asu mam meté ai mam mefe fe. Bia yem na “ntilen ose [nala a tilen na é dzom ése é ne a Bibel] ya yi . . . wò bò nfi” (2 Timotéus 3:16).
Nsò kalara wi wa yi wò vòli asu ayègè Bibel doé. Dzam da, a seki Bibel. Asu té ndò, bia banda wò na o lang bifus bi Bibel bise wò yi kòb a ayègè ase ai o yen fe akia ya bia toben ai é mam wò yègè.
TUENE FAG
Yene akia afé Bibel a nga vòli abui bot, dzé o ne dzam bò asu yi na o ding nyè lang, ai asu dzé a ne ébugubu ya wog éyòng mot a vòli wò.
3. Bibel a ne bi tòng’lò
Bibel a ne ane alamba la fiè abui. A vòli bia na bi nòng mimbembe mintsigen, a lerege fe bia mfiè asu melu ma zu.
Lang’a Salmen 119:105 ai yalen minsili mi tsaa mi:
-
Akia afé ntil Salmen nyi a mbe yene Bibel?
-
Akia afé wò yen Bibel?
4. Bibel a ve biyalen ya minsili miaan
Ai zen ya Bibel, mininga zing a nga bi biyalen ya minsili a mbe siligi émen abui mimbu ana. Bebege VIDÉO ai yalen minsili mi tsaa mi:
-
Ane vidéo a he lere, minsili mifé mininga té a mbe siligi émen?
-
Akia afé ayègè Bibel a nga vòli nyè?
Bibel a tindi bia na bi sili biabeben minsili. Lang’a Matéus 7:7 ai yalen a nsili hi:
-
Minsili mifé wò yi na wò bi biyalen bia sò Bibel?
5. Nlang’en Bibel o ne bò na o bi mintak
Abui bot ba ding be lang’a Bibel ai ba nòng nfi été. Bebege VIDÉO ai yalen minsili mi tsaa mi:
-
Ane é vidéo nyi a he lere, ye binanga bia ding nlang’en?
-
Amu dzé bia ding lang Bibel?
Minyegelen ya Bibel mia wono bia mi vaa fe bia ndi. Lang’a Romani 15:4 ai yalen a nsili hi:
-
Ye wò yi na wò yem ngaaga dzia ya Bibel a ya ve awono ai ndi?
6. Mot mfe a ne wò dzam vòli na o tuene wog Bibel
Abui da ding lang Bibel, veda ba yen fe nfi ya kat é bot bevòk é mam ba yègè. Lang’a Mimbòen mi apostel 8:26-31 ai yalen a nsili hi:
-
Ai zen fé bi ne tuene wog Bibel?—Bebege fe bifus 30 ai 31.
Miak Étiopia a nga yang’en ai nvòlen asu yi na a wog é mam a lang’a. Melu maan ma, abui da yen nfi na bot befe be vòli bò a wog Bibel
ABUI BOT DA DZO NA: “A yègè Bibel o ne édzèè abog.”
-
Mfaa woé, ntsogen woé o ne mbé? Ai amu dzé?
OBALBAS
Bibel a bele abeng melebega asu énying ya mmos ose, biyalen ya boro minsili, a vaa fe bia awono ai ndi.
Dzé bia baala
-
Akia melebega afé bia kòb a Bibel?
-
Kan minsili mifé Bibel a yalen?
-
Dzé wò yi na wò yègè ai zen ya Bibel?
O NE FE BEBE
Melebega ya Bibel me ngene nfi asu daan melu ma.
“Une sagesse à—l’épreuve du temps” (La Tour de Garde n° 1 2018)
Bebege akia afé Bibel a nga vòli mot zing na a tséndé bebé mintsogen a mbe bele a kèèle mòngò.
Bebege abeng melebega Bibel a ve asu menda mebot.
Za a dzoé é si nyi? Bibel a yi wò ve mfang éyalen ya été a ya selen ai minnal abui bot ba tié.
