Ke ibuotikọ oro ekebede, ima ineme iban̄a idiọn̄ọ oro Jesus ọkọnọde. Idiọn̄ọ oro owụt ke Obio Ubọn̄ Abasi ke akara ke heaven, ndien ke Jesus Christ edi Edidem.

Bible ọdọhọ ke ini Jesus ọkọtọn̄ọde ndikara, ke enye ama osio Satan ye mme demon ke heaven ọduọk. Satan ye mme demon ẹnyene odudu ke isọn̄ emi kpọt, ntak edi oro n̄kpọ enen̄erede ọdiọk ke isọn̄ toto ke 1914.—Ediyarade 12:7, 9.

Kpa ye oro ererimbot ọdiọkde-diọk aka iso, Jesus emi edide Edidem Obio Ubọn̄ Abasi anam n̄kpọ man an̄wam mme owo ke ofụri ererimbot. Enye ke anam ẹkpep mme owo Bible ke ofụri ererimbot nte enye ọkọdọhọde, ndien oro anam ediwak owo ẹfiọk se Bible ekpepde ẹnyụn̄ ẹda oro ẹdu uwem kpukpru usen. (Isaiah 2:2-4) Se mmọ ẹkpepde ke Bible an̄wam mmọ ẹkûnam utom uwot idem, ẹnam ubon mmọ enem, ẹkûnyụn̄ ẹda okụk ye inyene nte ata akpan n̄kpọ. Mbon oro ẹnamde item Bible emi ke ẹdia ufọn idahaemi ke ẹnyụn̄ ẹdomo ndidi utọ mbon oro Abasi oyomde ẹdụn̄ ke Obio Ubọn̄ esie.

Kpa ye oro edide Jesus ama ọtọn̄ọ ndikara ke heaven, mme owo ke ẹkara mi ke isọn̄. Edi Abasi ama ọdọhọ Jesus ete: “Ka kakan ke otu mme asua fo.” (Psalm 110:2) Ibịghike Jesus ayakan kpukpru mme asua esie onyụn̄ anyan̄a mbon oro ẹsụkde ibuot ẹnọ Abasi.

Yak ineme se Obio Ubọn̄ Abasi edinamde ini oro.

• Oyosobo nsunsu ufọkabasi. Ẹyesobo kpukpru ufọkabasi ye ido ukpono emi ẹkpepde mme owo nsu ẹban̄a Abasi ẹnyụn̄ ẹnamde uwem ọsọn̄ ye mme owo. Bible okot nsunsu ido ukpono, akpara. Idem ayakpa ediwak owo ndikụt ẹsobode mmọ.—Ediyarade 17:15, 16.

• Eyetre ukara owo. Obio Ubọn̄ Abasi oyosobo kpukpru ukara owo.—Ediyarade 19:15, 17, 18.

• Oyosobo ndiọi owo. Nso ke ẹdinam mbon oro ẹkade iso ndinam idiọkn̄kpọ mînyụn̄ imaha ndinam se Abasi ọdọhọde? Bible ọdọhọ ke “ẹyesobo mme idiọkowo ẹfep ke isọn̄.”—Mme N̄ke 2:22.

• Oyosobo Satan ye mme demon. Satan ye mme demon idikemeke ‘nditụn mme idụt usụn̄ aba.’—Ediyarade 20:3, 10.

Nso ufọn ke kpukpru emi edinam inọ mbon oro ẹnyịmede Abasi akara mmọ?

Ke ini Jesus editiede ke heaven ikara isọn̄, enye ayanam se andikara ndomokiet ke isọn̄ emi mîkemeke ndinam. Owo 144,000 emi ẹmekde ẹsio ke isọn̄ ẹyetiene enye ẹkara. (Ediyarade 5:9, 10; 14:1, 3) Enye oyokụt ete ke ẹnam uduak Abasi ke ofụri isọn̄. Nso ke Obio Ubọn̄ Abasi edinam inọ mme owo mi ke isọn̄?

• Ayanam udọn̄ọ ye n̄kpa ẹtre. “Baba andidụn̄ kiet ididọhọke ite: ‘Ndọdọn̄ọ.’” “N̄kpa idinyụn̄ idụhe aba.”—Isaiah 33:24; Ediyarade 21:4.

• Ayanam emem ye ifụre odu ke ofụri ererimbot. “Emem nditọ fo oyokpon,” “ndien mmọ ẹyetie ke idak vine mmọ ye ke idak eto fig mmọ, ndien ididụhe owo eke edinamde mmọ ẹdịghe.”—Isaiah 54:13; Micah 4:4.

• Ayanam mme owo ẹnyene eti utom. “Ndimek ikọt mi ẹyedia ufọn utom ubọk mmọ ọyọhọ ọyọhọ. Mmọ idikpaha utom ke ikpîkpu.”—Isaiah 65:22, 23.

• Ayanam isọn̄ eye onyụn̄ ọfọn n̄kpọ. “Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.”—Isaiah 35:1.

• Ekpep mme owo se ẹkpenamde man ẹdu uwem ke nsinsi. “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Abasi oyom fi etiene odu ke ini mme n̄kpọ emi ẹditịbede. (Isaiah 48:18) Ibuotikọ oro etienede etịn̄ se akpanamde man etiene odu uwem ini oro.