Ke Bible, ikọ Greek emi ẹsikabarede ndusụk ini nte “ndinam akpanikọ” ọwọrọ ndidu uwem nte ọfọnde. Ikọ emi ekeme n̄ko ndiwọrọ ndinyene ido emi eyede.

Mme Christian ẹda ikọ apostle Paul emi ke akpan n̄kpọ: “Nnyịn [iyom] ndinam akpanikọ ke kpukpru n̄kpọ.” Didie ke ikpanam emi?

Ata ediwak owo ẹsise idemmọ ke ukụtiso kpukpru usenubọk mbemiso ẹwọrọde ẹka n̄kpọ. Ntak-a? Sia mmọ ẹsiyom ndise m̀mê kpukpru n̄kpọ ada ọfọn ke idem mmimọ. Edi enyene se idide akpan n̄kpọ ikan ndifat idet eye m̀mê ndisịne ediye ọfọn̄. Edu-uwem nnyịn ekeme ndinam inen̄ede iye mîdịghe anam ikûye.

Bible ọdọhọ ke idiọkn̄kpọ esesịne nnyịn ke idem. Genesis 8:21 ọdọhọ ke “ekikere esịt owo [ọdiọk] toto ke uyen.” Ntre edieke iyomde ndidi mbon akpanikọ, ana in̄wana ye idiọkn̄kpọ emi ikadade-da imana. Apostle Paul ama etịn̄ nte imọ isin̄wanade ye idiọkn̄kpọ emi esịnede-sịne imọ ke idem. Enye ọkọdọhọ ete: “Mmenen̄ede ndara ibet Abasi ke ọwọn̄esịt mi, edi n̄kụt ibet efen ke ndido idem mi nte an̄wanade ye ibet oro odude mi ke esịt onyụn̄ adade mi nte mbuotekọn̄ ọnọ ibet idiọkn̄kpọ emi odude ke ndido idem mi.”—Rome 7:22, 23.

Ke uwụtn̄kpọ, ke ini esịt nnyịn ọdọhọde inam idiọkn̄kpọ, utọ nte ndisu nsu, ndibian̄a owo, m̀mê ndiyịp n̄kpọ, ikpanaha itiene esịt nnyịn. Edieke isịnde ndinam idiọkn̄kpọ emi odụkde nnyịn esịt, ọwọrọ nnyịn idi mbon akpanikọ okposụkedi emi mme owo mîmaha akpanikọ mfịn.

Edieke anade idi mbon akpanikọ, ana inyene n̄kpọ emi owụtde nte ikpodude uwem. Ediwak owo ẹsida ini ẹdiọn̄ idem ẹnyụn̄ ẹtịm ẹse ọfọn̄ emi mmọ ẹyomde ndisịne, edi mmọ isidọn̄ke enyịn m̀mê mmimọ ikpodu uwem didie. Emi esinam mmọ ẹkere ke mmimọ imekeme ndisu ekpri nsu mbọhọ mfịna. N̄wed kiet emi ẹkotde The (Honest) Truth About Dishonesty ọdọhọ ke mme owo ẹsibian̄a owo, ama akam edi mbon en̄wen idiọn̄ọke. Edi ndi odu n̄kpọ emi ekemede ndin̄wam nnyịn idiọn̄ọ m̀mê ọfọn ndisu ekpri nsu, ndibian̄a nnyụn̄ ntụk owo idem ọkpọkọm mbon en̄wen idiọn̄ọke? Ih, n̄kpọ odu!

Ediwak owo ke ofụri ererimbot ẹdọhọ ke Bible an̄wam mmimọ idi mbon akpanikọ. Bible anam nnyịn idiọn̄ọ nte ikpodude uwem ndien idụhe n̄wed en̄wen emi ọfọnde ntem. (Psalm 19:7) Enye etịn̄ nte ẹkpedude uwem ke ubon, nte ẹkpenamde utom, ye nte ẹkpekponode Abasi. Ndien mme item emi ẹsụk ẹnyenyene ufọn. Idụhe owo, idụt, m̀mê  obio emi Bible mîkemeke ndin̄wam. Edieke iyomde ndidi mbon akpanikọ nnyụn̄ nnam se inende, ana ikpep Bible, itie ikere se Bible ọdọhọde, inyụn̄ inam item esie.

En̄wan emi in̄wanade mi ndidi mbon akpanikọ ikụreke ke ndinyene nnennen ifiọk Bible. Idịghe ọmọdiọn̄ọ ke edieke nnyịn mîkpemeke, ke imekeme nditiene ndu idiọk uwem emi mme owo ẹdude ke ererimbot emi. Ntak edi oro ọfọnde isibọn̄ akam idọhọ Abasi an̄wam nnyịn idi mbon akpanikọ. (Philippi 4:6, 7, 13) Edieke inamde emi, iyekeme ndisọn̄ọ nda nnam se inende nnyụn̄ nnam akpanikọ ke kpukpru n̄kpọ.

Hitoshi, emi iketịn̄de iban̄a ke akpa ibuotikọ, ama adia ufọn ndidi owo akpanikọ. Idahaemi enye anam utom ọnọ owo emi amade nte enye edide owo akpanikọ. Hitoshi ọdọhọ ete: “Esịt enem mi etieti nte nnamde utom emi esịt mîmiaha mi ufen.”

Mbon en̄wen n̄ko ẹdia ufọn ndidi mbon akpanikọ. Mmọ ẹnam item Bible emi ọdọhọde ‘isinam akpanikọ ke kpukpru n̄kpọ.’ Yak ise ndusụk ufọn emi mmọ ẹdiade.

• Anam Ẹnyene Esịt Emi Mîmiaha Owo Ufen

  “Mma n̄kpọn̄ ufọkn̄wed ke ini n̄kedide isua 13 n̄kanam utom ye mme inọ. Ke ntak emi, ekpere ndidi ofụri se n̄kenyenede ekedi n̄kpọ inọ. Nte ini akade, mma ndọ ebe ndien ami ye ebe mi ima itọn̄ọ ndikpep Bible ye Mme Ntiense Jehovah. Ima ikpep ke Jehovah * Abasi asua inọ, abian̄a, utụk, ye nsu, ntre ima ikpụhọde. Ke 1990, ima iyak idem nnyịn inọ Jehovah inyụn̄ ina baptism ikabade idi Mme Ntiense Jehovah.—Mme N̄ke 6:16-19.

  “Ini akpa, n̄kpọ inọ ẹkesiyọyọhọ ufọk mi, edi idahaemi utọ n̄kpọ oro idụhe aba, esịt inyụn̄ imiaha mi ufen aba. Ke ini ntiede n̄kere mban̄a ofụri ini oro n̄kesiyịpde inọ, mmọkọm Jehovah nte enye atuade mi mbọm. Ndidiọn̄ọ ke mmenem Jehovah esịt idahaemi esinam n̄keme ndide idap ọfọn, ndien idụhe se inemde ntem.”—Cheryl, Ireland.

  “Ke ini eteutom mi ekedide edidiọn̄ọ ke mma nsịn ndibọ ubọkedem, enye ama ọdọhọ mi ete: ‘Abasi fo anam fi edi owo akpanikọ! Ọfọn etieti ndinyene utọ owo nte afo ke kọmpeni nnyịn.’ Ndidi owo akpanikọ iyakke esịt amia mi ufen sia nnam se Jehovah Abasi ọdọhọde ẹnam. Emi n̄ko anam n̄keme ndin̄wam ubon mi ye mbon en̄wen ẹtiene ẹdi mbon akpanikọ.”—Sonny, Hong Kong.

• Anam Esịt Ana Owo Sụn̄

  “Ami ndi udiana esenyịn utom ke ata akamba ban̄k. Ediwak mbon itieutom nnyịn ẹsisu nsu ẹnyụn̄ ẹdia inọ man ẹforo. Mmọ ẹkere ke inyeneke se idiọkde owo ndisu ekpri nsu edieke emi edinamde owo enyene n̄kpọ onyụn̄ anam n̄kpọ ọfọn ke obio. Edi ndidi owo akpanikọ anam esịt ana mi sụn̄. Nyosụk n̄ka iso ndi owo akpanikọ inamke n̄kpọ m̀mê nso iditịbe. Mme eteutom mi ẹdiọn̄ọ ke ndibian̄ake mmimọ ndinyụn̄ mbian̄ake mme owo nnọ mmọ.”—Tom, United States.

• Anam Ẹkpono Owo

  “Esenyịn utom nnyịn ama ọdọhọ nsu nsu mban̄a ndusụk n̄kpọ emi okosopde ke itieutom nnyịn, edi n̄kenyịmeke. Ke ini ẹkedide ẹdidiọn̄ọ mbon oro ẹkeyịpde n̄kpọ oro, eteutom mi ama ọkọm mi nte ndide owo akpanikọ. Ndidi owo akpanikọ ke idiọk ererimbot emi imemke utom. Edi edieke idide mbon akpanikọ, mme owo ẹnyenyene mbuọtidem ke idem nnyịn ẹnyụn̄ ẹkpono nnyịn.”—Kaori, Japan.

Ndidi owo akpanikọ esinam owo enyene esịt emi mîmiaha enye ufen, anam esịt ana owo sụn̄, ọnyụn̄ anam ẹkpono owo. Omokụt do nte ọfọnde ndidi owo akpanikọ!