Mfịna Nicolas ye Céline ekedi n̄kpọ efen. N̄kọk itieutom France ẹkedọhọ mmọ ẹwọrọ ẹka obufa esop, mmọ ẹma ẹnyụn̄ ẹnyịme. Mmọ ẹdọhọ ẹte: “Nsonso oro, idem eketie nnyịn urua urua, edi aka ko iketiehe aba sia mme ufan nnyịn ẹma ẹtọn̄ọ ndidọn̄ nnyịn itọn̄. Ini oro nnyịn ikenen̄ekede ikpere nditọete ke obufa esop emi kan̄a.” a Sia esitiede ntem ye mbon emi ẹwọrọde ẹka obufa itie, nso idin̄wam fi okop inem obufa esop mbufo onyụn̄ enyene ufọn ọnọ nditọete do? Didie ke mbon en̄wen ẹkeme ndin̄wam fi? Didie ke ekeme ndisọn̄ọ nditọete do idem, mmọ ẹnyụn̄ ẹsọn̄ọ fi idem?

N̄KPỌ INAN̄ EMI ẸDIN̄WAMDE FI

1. Beri edem ke Jehovah. (Ps. 37:5) Kazumi ke Japan ama ọkpọn̄ esop emi enye okodude ke n̄kpọ nte isua 20 ini itieutom mme ebe esie ẹkenọde ebe esie aka itieutom mmọ efen ke itie efen. Didie ke Kazumi ‘akakpat usụn̄ esie ọnọ Jehovah’? Enye ọdọhọ ete: “Mma nsibọn̄ akam ediwak ini ndọhọ Jehovah nte idem enyekde mi, nte etiede mi ikpọn̄ ikpọn̄ ke idem, ye nte esịt etịmerede mi. Kpukpru ini emi mbọn̄de akam oro, enye ama esisọn̄ọ mi idem.”

Akpanam nso man enen̄ede eberi edem ke Jehovah? Mmọn̄ emi ẹduọkde ke se ẹtọde ye nti n̄kpọ emi ẹdude ke isọn̄ ẹsinam se ẹtọde ọkọri. Ukem oro ke edi ye mbuọtidem nnyịn; ana inam n̄kpọ man itetịm ibuọt idem ye Abasi. Se ikan̄wamde Nicolas emi ima iketetịn̄ iban̄a enen̄ede enịm ke Jehovah ayan̄wam imọ edi enye ndiketie n̄kere uwụtn̄kpọ mme owo nte Abraham, Jesus, ye Paul, emi ẹkeyakde ediwak n̄kpọ ẹtak mmọ man ẹnam se Jehovah oyomde. Afo ndinyene ini ntie ke idemfo n̄kpep Bible ayan̄wam fi ọyọ n̄kpọ ekededi emi  okpụhọrede ke uwem fo, onyụn̄ anam enyene nti n̄kpọ ke Ikọ Abasi se adade ọsọn̄ọ nditọete ke obufa esop mbufo idem.

2. Kpọn̄ ndimen obufa esop n̄kodomo ye akani. (Eccl. 7:10) Ini Jules otode Benin aka United States, enye ama okụt ke nte ẹnamde n̄kpọ ke itie mbiba oro edi ata isio. Enye ọdọhọ ete: “Eketie mi nte edi kwa owo emi nsobode, ami n̄kpọhọde mbụk uwem mi nnọ.” Sia owo mîkesinamke n̄kpọ ntre ke edem mmọ, oro ama anam enye ọtọn̄ọ ndidụri idem ndian̄ade n̄kpọn̄ nditọete ke obufa esop mmọ. Ke enye ama ekenen̄ede ọdiọn̄ọ nditọete, iketiehe enye ntre aba. Enye ọdọhọ ete: “Se n̄kụtde edi ke ebiet ekededi emi ikade ke ererimbot emi, kpukpru owo ẹdi ukem. N̄kukụre ukpụhọde edi nte ẹnamde n̄kpọ ye nte ẹtịn̄de ikọ. Ọfọn ida mme owo nte mmọ ẹtiede.” Ke ntak oro, ọfọn ọkpọn̄ ndimen obufa esop emi n̄kodomo ye akani. Sista Anne-Lise emi edide asiakusụn̄ ọdọhọ ete: “N̄kọwọrọke ndi obufa itie emi man ndikụt mme n̄kpọ emi n̄kọkpọn̄de ke akani itie emi n̄kodude. N̄kedi man ndikụt mbufa n̄kpọ.”

Ana mbiowo n̄ko ẹkpọn̄ ndimen obufa esop mmọ n̄kodomo ye akani. Nte ẹnamde n̄kpọ ke obufa esop emi okpokpụhọde ye eke akani esop mbufo, iwọrọke ke inenke. Ọfọn ọdiọn̄ọ nte ẹsinamde n̄kpọ ke obufa itie emi odude mbemiso ọnọde ekikere. (Eccl. 3:1, 7b) Afo ndida eti uwem fo n̄kpep nditọete se ẹkpenamde ọfọn akan ndidọhọ ke akpana ẹnam n̄kpọ nte afo ekerede.​—2 Cor. 1:24.

3. Tiene sịn idem nam se ẹnamde ke obufa esop emi. (Phil. 1:27) Ndiwọrọ n̄ka obufa itie okpon utom, esinyụn̄ ada owo ini. Edi enen̄ede ọfọn abak ọtọn̄ọ odụk mbono esop ke obufa esop mbufo. Ekpekeme ndinam ntre ndondo emi esịmde do, ọkpọfọn. Idem n̄kpọ, mbon obufa esop emi mîkwe fi akanam mîdịghe isisọpke ikụt fi, mmọ ẹdinam didie in̄wam fi? Sista Lucinda emi ọkọwọrọde okodụn̄ ke akwa obio ke South Africa ye nditọ esie iban iba ọdọhọ ete: “Mme ufan mi ẹma ẹnọ mi item ẹte mma nsịm obufa esop oro, yak nnen̄ede ndomo ndikpere mme owo, nsan̄a ye mmọ n̄kwọrọ ikọ, nnyụn̄ mbọrọ mbụme ke mbono esop. Ima idọhọ ke ẹkeme ndisidinịm mbono an̄wautom ke ufọk nnyịn.”

Bible ọdọhọ: “Ẹn̄wana ọtọkiet ẹban̄a mbuọtidem oro odude ke eti mbụk.” Oro ọwọrọ ke edieke adianade ye nditọete ke obufa esop oro anam n̄kpọ, oro ọyọsọn̄ọ fi idem oyonyụn̄ ọsọn̄ọ nditọete oro idem. Mbiowo esop mme Anne-Lise emi ima iketetịn̄ iban̄a ẹma ẹdọhọ enye odomo ndisan̄a ye kpukpru owo n̄kwọrọ ikọ. Utịp ekedi nso? Enye ọdọhọ ete: “Ikebịghike mma ntọn̄ọ ndikop inem esop oro.” N̄kpọ en̄wen edi ke ẹkpeyom ndinam Ufọkmbono Obio Ubọn̄ mbufo asana ẹnyụn̄ ẹyom ndidiọn̄ mme n̄kpọ do ndien afo ọdọhọ ke imọ iyetiene in̄wam, oro oyowụt ke afo edida obufa esop oro nte esop mbufo. Adan̄a nte enen̄erede esịn idem ke se ẹnamde do, ntre ke mme owo ẹdisọp ẹmehe ye afo, edinyụn̄ etie fi nte odu ye ata nditọeka fo.

4. Nyene mbufa ufan. (2 Cor. 6:11-13) Afo ndiwụt mme owo ke emekere aban̄a mmọ edi mfọnn̄kan n̄kpọ emi edin̄wamde fi enyene ufan. Ntre,  mbemiso mbono esop ọtọn̄ọde ye ke ama akasuana, da ini neme nneme ye mme owo man enen̄ede ọdiọn̄ọ mmọ. Nen̄ede domo ndidiọn̄ọ enyịn̄ mmọ. Ama eti enyịn̄ mme owo, etie ufan ufan, onyụn̄ edi se ẹkemede ndidian idem, mme owo ẹyeyom ndikpere fi, oro oyonyụn̄ anam enyene nti ufan.

Utu ke nditie ntịmede esịt n̄kere m̀mê nditọete ẹyema ndikpere fi, nyene ime yak nditọete ẹnen̄ede ẹdiọn̄ọ fi. Nam se Lucinda akanamde. Enye ọdọhọ ete: “Se inamde inyene nti ufan idahaemi edi ke ima isikot mme owo ufọk.”

“ẸDARA KIET EKEN”

Ndịk ekeme ndinam ndusụk owo ndisan̄a ndụk Ufọkmbono Obio Ubọn̄ emi mmọ mîdiọn̄ọke owo ndomokiet ke esịt. Ntre nso ke ekeme ndinam man emem mbufa mbon emi ẹdide esop mbufo utom? Apostle Paul ọkọdọhọ ete: “Ẹdara kiet eken, kpa nte Christ n̄ko akadarade nnyịn.” (Rome 15:7) Mbiowo ẹma ẹkpebe Christ, mmọ ẹkeme ndinam esop enenem mbufa owo. (Se ekebe emi, “ Se Isitienede Inam Esop Enem Mbufa Owo.”) Edi kpukpru owo ke esop, sịm nditọwọn̄, ẹkeme ndidian ubọk nnam esop enem mbufa owo.

Ndidara mbon en̄wen esịne ndikot mmọ ufọk, onyụn̄ ekeme ndidi n̄ko se inamde-nam n̄kpọ in̄wam mmọ. Ke uwụtn̄kpọ, sista kiet ama ada ini esie emen sista en̄wen emi ọkọwọrọde edi esop mmọ obufa owụt nsio nsio n̄kpọ ke obio, onyụn̄ etịn̄ nte ẹsinamde ẹdụk bọs ye tren ẹka n̄kpọ do. Se enye akanamde oro ama enem sista oro etieti, onyụn̄ anam obufa itie oro enenem enye.

EYENYENE IFET NDINEN̄EDE NSỊN IDEM NNAM N̄KPỌ ABASI

Esidi nte n̄kukun̄kpọyọriyọ okponde aka, ntre ke enye ọfọrọde ikpaidem esie ediwak ini mbemiso mba esie ẹkemede ndidi se enye emende efe. Ukem oro ke edi ama ọwọrọ aka obufa esop. Afo ndinen̄ede nsịn idem nnam n̄kpọ Jehovah etie nte ndife. Ndien ukem nte n̄kukun̄kpọyọriyọ oro, ama ọwọrọ aka obufa esop, ana ọfọrọde n̄kpọ ekededi emi mîdiyakke fi enen̄ede esịn idem anam n̄kpọ  do efep. Nicolas ye Céline ẹdọhọ ẹte: “Ndiwọrọ n̄ka obufa itie esikpep owo n̄kpọ etieti. Se ikan̄wamde nnyịn imehe ye mbufa owo ke obufa itie emi ikakade ekedi ndinyene mbufa edu.” Jean-Charles emi ima iketetịn̄ iban̄a ke ntọn̄ọ ntọn̄ọ etịn̄ ufọn emi ubon esie ẹdiade ete: “Ke obufa esop emi, nditọ nnyịn ẹnen̄ede ẹsọn̄ idem ke esop ẹnyụn̄ ẹnen̄ede ẹkpere Jehovah. Ke ọfiọn̄ ifan̄ ama ekebe tọn̄ọ nte ikọwọrọ idi, adiaha nnyịn ama enyịme ndisinam n̄kpọ ke mbono esop ufọturua, akpan nnyịn onyụn̄ akabade asuanetop emi mînaha baptism.”

Edieke nte n̄kpọ etiede ye afo idahaemi mîyakke ọwọrọ aka itie efen utọ nte itie emi ẹnen̄erede ẹyom mme ọkwọrọ ikọ, edinam didie? Nam ndusụk se ẹnemede ke ibuotikọ emi man esop emi odude idahaemi etie fi obufa obufa. Ka iso beri edem ke Jehovah, edi kpa ke ukem ini oro domo ndinen̄ede nsịn idem ke se ẹnamde ke esop. Nte edinamde oro edi ndisan̄a ye nditọete n̄kwọrọ ikọ ndinyụn̄ nnyene mbufa ufan. Ekpedi ama enyenyene ufan, domo ndinen̄ede n̄kpere mmọ idem. N̄wam mbon emi ẹwọrọde ẹdidu ke esop mbufo. Okponyụn̄ odu mbon en̄wen emi ẹyomde un̄wam, mbọk n̄wam. Sia edide ima ke ẹda ẹdiọn̄ọ ata mme Christian, afo ndima mbon efen ayan̄wam fi etetịm ekpere Jehovah. (John 13:35) Nịm ke “orụk uwa emi [enen̄ede] enem Abasi esịt.”​—Heb. 13:16.

Kpa ye emi mîmemke ndiwọrọ n̄ka obufa esop, ediwak nditọete emi ẹkewọrọde ẹka ẹkop inem obufa esop mmọ, afo n̄ko omonyụn̄ ekeme ndikop! Anne-Lise ọdọhọ ete: “Ami ndikpụhọ esop ama an̄wam mi nnen̄ede mma mme owo.” Eke Kazumi edi ke enye enen̄ede enịm idahaemi ete ke owo ama ọwọrọ aka ebiet en̄wen ke ‘enye eyenen̄ede okụt ubọk Jehovah ke usụn̄ emi enye mîkwe akpa.’ Eke Jules-e, etie enye didie ke idem idahaemi? Enye ọdọhọ ete: “Mme ufan emi nnyenede iyakke etie mi ikpọn̄ ikpọn̄ aba ke idem. Mmenen̄ede n̄kpere mmọ tutu ọyọsọn̄ mi ndikpọn̄ esop emi.”