Se ndusụk mme anam-ndụn̄ọde ẹketịn̄de edi oro ẹban̄a isọn̄ nnyịn emi. Edieke enịmde ke Abasi emi okobotde nnyịn ekere aban̄a nnyịn, oyokụt ke se ntaifiọk ẹtịn̄de emi owụt ke Abasi akanam isọn̄ ke usụn̄ emi n̄kpọ mîdinamke enye.

Edi sia mme owo ẹnen̄erede ẹbiat n̄kpọ ke isọn̄, oro anam isọn̄ ikemeke ndifiak n̄ketie nte eketiede ke idemesie. Nso inam inịm ke Abasi ayanam isọn̄ afiak ọfọn?

Se mme itie Bible oro ẹsiakde ẹsịn ke ekebe emi oro owụtde ke n̄kpọ ndomokiet idinamke isọn̄ emi, ke isọn̄ oyonyụn̄ ọfọn akan emi.

• Abasi okobot isọn̄ emi. “Ke editọn̄ọ, Abasi okobot enyọn̄ ye isọn̄.”​—Genesis 1:1

• Abasi enyene isọn̄ emi. “Isọn̄ a ye se iyọhọde ke esịt ẹnyene Jehovah.”​—Psalm 24:1

• Nte Abasi okobotde isọn̄ idiyakke n̄kpọ anam enye. “Enye owụk isọn̄ ke itie esie; idisehekede tutu amama, m̀mê ke nsinsi.”​—Psalm 104:5

• Abasi ọn̄wọn̄ọ ke mme odu-uwem n̄kpọ ẹyedu ke isọn̄ ke nsinsi. ‘Ata Abasi, kpa Andibot isọn̄ ye Andinam enye, . . . ikobotke enye ke ikpîkpu, edi okobot enye man ẹdụn̄ ke esịt.’​—Isaiah 45:18

• Abasi ọn̄wọn̄ọ ke mme owo ẹyedụn̄ ke isọn̄ emi ke nsinsi. “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”​—Psalm 37:29

Abasi okobot isọn̄ emi man mme owo ẹkeme ndidụn̄ ke esịt inyụn̄ ibiatke n̄kpọ. Bible ama etetịn̄ ke Jehovah Abasi ayanam kpukpru se mme owo ẹnamde man ẹbiat isọn̄ etre ke nnennen ini esie.​—Ediyarade 11:18

Bible ọdọhọ ke Abasi ọn̄wọn̄ọ ndinam isọn̄ nnyịn edi paradise, eye onyụn̄ ọfọn̄ se ẹdụn̄de. Ndien enye ayatat ubọk esie “oyụhọ udọn̄ kpukpru mme odu-uwem n̄kpọ.”​—Psalm 145:16