Mark 6;1-56
6 Ndien enye adaha ọkpọn̄ do onyụn̄ edi obio emana esie, mme mbet esie ẹnyụn̄ ẹtiene enye.+
2 Ke ini esịmde sabbath, enye ọtọn̄ọ ndikpep n̄kpọ ke synagogue; ndien idem akpa ata ediwak owo ke otu mmọ eke ẹkpan̄de utọn̄, mmọ ẹnyụn̄ ẹdọhọ ẹte: “Owo emi ada mme n̄kpọ emi ke m̀mọ̀n̄?+ Ndien ntak emi ẹnọde owo emi ọniọn̄ emi ye mme utọ utom odudu eke ubọk esie anamde?
3 Nte enye idịghe anamusọ eto+ eyen Mary+ ye eyeneka James+ ye Joseph ye Judas ye Simon?+ Nte nditọeka esie iban inyụn̄ idụhe mi ye nnyịn?” Ntre mmọ ẹtuak ukot ẹduọn̄ọ ke ntak esie.+
4 Edi Jesus ọdọhọ mmọ ete: “Prọfet inanake ukpono ke mîbọhọke ke obio emana esie+ ye ke otu iman esie ye ke ufọk esie.”+
5 Ntre enye ikanamke utom odudu do ibọhọke ndidori owo ifan̄ emi ẹdọn̄ọde ubọk nnyụn̄ n̄kọk mmọ udọn̄ọ.
6 Ke akpanikọ, idem ama akpa enye aban̄a unana mbuọtidem mmọ. Ndien enye asan̄a akanade mme obio-in̄wan̄ emi ẹdude ke n̄kann̄kụk, ekpep mme owo n̄kpọ.+
7 Ekem enye okot mbet duopeba ẹdi, onyụn̄ ọtọn̄ọ ndisio mmọ ndọn̄ ẹsan̄a iba iba+ ẹwọn̄ọ, onyụn̄ ọnọ mmọ odudu ndikan ndedehe spirit.+
8 N̄ko, enye ọnọ mmọ uyo ete ẹkûkama baba n̄kpọ kiet ẹka isan̄ emi ke mîbọhọke esan̄ kpọt, ẹkûkama uyo, ekpri ekpat udia,+ okụk* ke ekpatokụk emi mmọ ẹbọbọde ke isịn,+
9 edi ẹsịne ikpaukot, ẹkûnyụn̄ ẹsịne ọfọn̄ idakidem iba.+
10 N̄ko-n̄ko, enye ọdọhọ mmọ ete: “Ebiet ekededi eke mbufo ẹdụkde ufọk,+ ẹdu do tutu mbufo ẹwọn̄ọ ke ebiet oro.+
11 Ndien ebiet ekededi eke owo mîdidarake mbufo mînyụn̄ ikpan̄ke utọn̄ inọ mbufo, nte mbufo ẹwọn̄ọde do ẹken̄ ntan ikpat mbufo ẹbon man edi ntiense ọnọ mmọ.”+
12 Ntre mmọ ẹdaha ẹkekwọrọ ikọ man mme owo ẹkpekabade esịt;+
13 ndien mmọ ẹbịn ediwak demon+ ẹnyụn̄ ẹyet ediwak mbon udọn̄ọ aran+ ẹnyụn̄ ẹkọk mmọ udọn̄ọ.+
14 Ekem n̄kpọ emi odụk Edidem Herod utọn̄, koro ẹdiọn̄ọde enyịn̄ Jesus an̄wan̄wa, mme owo ẹnyụn̄ ẹdọhọ ẹte: “John andinịm owo baptism emeset ke n̄kpa, ndien ntak edi oro enye ekemede ndinam mme utom odudu emi.”+
15 Edi mbon en̄wen ẹdọhọ ẹte: “Edi Elijah.”+ Mmọ efen ẹdọhọ ẹte: “Edi prọfet ukem nte kiet ke otu mme prọfet.”+
16 Edi ke ini Herod okopde emi enye ọdọhọ ete: “John emi n̄kebịghide ibuot emeset.”+
17 Koro Herod ọkọdọn̄ ẹkemụm John onyụn̄ ọkọbi enye ke ufọk-n̄kpọkọbi ke ntak Herodias n̄wan Philip eyenete esie, koro enye ekemende n̄wan oro ọdọ.+
18 Koro John ọkọdọhọde Herod ndien ndien ete: “Ibet inyịmeke afo ndida n̄wan eyenete fo nnyene.”+
19 Edi Herodias ada enye udu+ onyụn̄ oyom ndiwot enye, edi ikemeke.+
20 Koro Herod efehede+ John, sia ọfiọkde ete enye edi edinen ye edisana owo;+ onyụn̄ ekpeme enye. Ndien ke ama akakpan̄ utọn̄+ ọnọ enye, enye ifiọkke se akpanamde, edi aka iso ndikpan̄ utọn̄ nnọ enye ke idatesịt.
21 Edikem ke ediye usen+ kiet, Herod anam udia mbubreyo ke usen emana esie+ ọnọ mme akama ikpọ itie ye mme etubom ekọn̄ esie ye ikpọ owo Galilee.
22 Ndien eyen Herodias an̄wan emi odụk edinek unek onyụn̄ anam esịt enem Herod ye mbon emi ẹtiede+ ye enye. Edidem ọdọhọ n̄kaiferi oro ete: “Ben̄e mi se ededi eke afo oyomde, ndien nyọnọ fi.”
23 Ih, enye ọn̄wọn̄ọ ọnọ enye ete: “Se ededi eke afo eben̄ede, nyọnọ fi,+ ekpedi ubak edem kiet ke obio ubọn̄ mi.”+
24 Ndien enye ọwọrọ okobụp eka esie ete: “Nso ke n̄kpeben̄e?” Enye ọbọrọ ete: “Ibuot John andinịm owo baptism.”+
25 Kpa idaha oro enye awara odụk ebịne edidem ekeben̄e, ete: “Nyom afo ọnọ mi ibuot John Andinịm Owo Baptism ke usan idahaemi.”
26 Okposụkedi edidem okopde mfụhọ etieti, enye iyomke ndifụmi eyenan̄wan emi, ke ntak un̄wọn̄ọ oro ye mbon emi ẹtiede ke okpokoro.+
27 Ntre kpa idaha oro edidem osio owo ukpeme kiet ọdọn̄ onyụn̄ ọnọ enye uyo ete ada ibuot esie edi. Ndien enye aka ekebịghi enye ibuot ke ufọk-n̄kpọkọbi+
28 onyụn̄ ada ibuot esie ke usan edi, edinọ n̄kaiferi oro, ndien n̄kaiferi oro ada ọkọnọ eka esie.+
29 Ke ini mme mbet esie ẹkopde emi mmọ ẹdi ẹdimen okpo esie ẹkebụk ke udi.+
30 Ndien mme apostle ẹsop idem ọtọkiet ke iso Jesus ẹnyụn̄ ẹtịn̄ ẹnọ enye kpukpru n̄kpọ emi mmọ ẹkenamde ẹnyụn̄ ẹkpepde.+
31 Ndien enye ọdọhọ mmọ ete: “Mbufo ẹdi ke idem mbufo ikpọn̄ ke ndobo ndobo ebiet+ ẹdiduọk odudu esisịt.”+ Koro ekedi ediwak owo ẹdedi ẹnyọnyọn̄ọ, mmọ inyụn̄ inyeneke ini nduọkodudu ndikam ndia udia.+
32 Ntre mmọ ẹdiere ke ubom ẹdaha ẹka ndobo ndobo ebiet ndidu ke idemmọ.+
33 Edi mme owo ẹkụt mmọ nte ẹkade, ediwak owo ẹnyụn̄ ẹfiọk ẹban̄a emi, ndien mmọ ẹto kpukpru obio ẹfehe ukot ukot ẹbem mmọ iso ẹkesịm do.+
34 Ndien ke ini enye ọwọrọde ke ubom, enye okụt akwa otuowo, ndien mbọm+ mmọ anam enye, koro mmọ ẹbietde erọn̄ eke mînyeneke andikpeme.+ Ndien enye ọtọn̄ọ ndikpep mmọ ediwak n̄kpọ.+
35 Etisịm idahaemi eyo ọsọn̄, ndien mme mbet esie ẹdi ẹbịne enye ẹdidọhọ ẹte: “Ebiet emi odu nsannsan, ndien eyo ọsọn̄.+
36 Dọhọ mmọ ẹnyọn̄ọ, man mmọ ẹkpeka n̄kpri obio ye mme obio-in̄wan̄ ke n̄kann̄kụk ẹkedep udia eke mmọ ẹdidiade.”+
37 Enye ọdọhọ mmọ ete: “Mbufo ẹnọ mmọ n̄kpọ ẹdia.” Ndien mmọ ẹdọhọ enye ẹte: “Nte nnyịn idika ikedep uyo ke denarius ikie iba inọ mme owo emi ẹta?”+
38 Enye obụp mmọ ete: “Mbufo ẹnyene uyo ifan̄? Ẹka ẹkese!” Ke ẹma ẹkefiọk ibat, mmọ ẹdọhọ ẹte: “Uyo ition, ye iyak iba.”+
39 Ndien enye eteme kpukpru owo ete ẹsụhọde ẹtetie ke otu ke otu+ ke awawa mbiet.+
40 Ndien mmọ ẹsụhọde ẹtetie ke mme otu emi ẹdide owo ikie ikie, ye mme otu emi ẹdide aba ye duop aba ye duop.+
41 Ndien enye emen uyo ition ye iyak iba oro, emenede enyịn ese enyọn̄ onyụn̄ ọdiọn̄ mmọ,+ onyụn̄ obụn̄ uyo+ ayak mmọ ọnọ mme mbet, ete mmọ emi ẹda mmọ ẹnịm mme owo ke iso; ndien enye edeme iyak iba oro ọnọ kpukpru owo.
42 Ntre kpukpru owo ẹdia ẹyụhọ;+
43 ndien mmọ ẹtan̄ mben̄e ẹyọhọ akpasa duopeba, ke ẹsiode iyak ẹfep.
44 N̄ko-n̄ko, mbon oro ẹtade uyo ẹkedi owo tọsịn ition.+
45 Ndien, ye unana ubiatini, enye akpak mme mbet esie ete ẹdiere ke ubom ẹbem iso ẹka edem inyan̄ eken ke n̄kan̄ Bethsaida, ke adan̄aemi enye osiode otuowo unyọn̄.+
46 Edi ke ama ọkọkọm mmọ unyọn̄ enye adaha aka obot ndikọbọn̄ akam.+
47 Ke esịmde mbubreyo, ubom odu ke ufọt inyan̄, edi enye odu ikpọn̄ ke obot.+
48 Ndien ke ini enye okụtde nte ọsọn̄de+ mmọ ndiwat, koro ofụm ọbiọn̄ọde mmọ, ke ekperede ndisịm usiere enye asan̄a ke enyọn̄ inyan̄ etiene mmọ; edi enye oyom ndisan̄a mbe mmọ.
49 Ke ini mmọ ẹdade ẹkụt nte enye asan̄ade ke enyọn̄ inyan̄ mmọ ẹkere ẹte: “Edi mbiet!” ndien mmọ ẹfiori n̄kpo.+
50 Koro kpukpru mmọ ẹma ẹkụt enye, esịt onyụn̄ etịmede mmọ. Kpa idaha oro enye etịn̄ ikọ ye mmọ, onyụn̄ ọdọhọ mmọ ete: “Ẹsọn̄ esịt, ami ke edi; ẹkûfehe ndịk.”+
51 Ndien enye ediere ke ubom ye mmọ, ofụm onyụn̄ odobo. Ndien idem akpa mmọ etieti,+
52 koro mmọ mîfiọkke se uyo oro ẹwọrọde, edi esịt osụk ododobi mmọ ndifiọk.+
53 Ndien ke ini mmọ ẹbede ẹdisịm obot, mmọ ẹdibehe ke Gennesaret ẹnyụn̄ ẹyịri ubom ẹkpere.+
54 Edi ndondo oro mmọ ẹwọn̄ọde ke ubom, mme owo ẹdiọn̄ọ enye,
55 ẹnyụn̄ ẹfehe ẹkanade ofụri ikpehe oro ẹnyụn̄ ẹbiom mbon oro idem mîsọn̄ke ke n̄kpọnna ẹka ebiet eke mmọ ẹkekopde ẹte enye odu.
56 Ndien ebiet ekededi eke enye asan̄ade odụk obio-in̄wan̄ m̀mê ikpọ obio m̀mê ekpri obio,+ mmọ ẹyebon mbon udọn̄ọ ke mme an̄waurua, ẹnyụn̄ ẹkpe enye ubọk ẹte mmọ ẹkam ẹtotụk+ ekpedi nyeriye+ ewụra esie. Ndien adan̄a ediwak owo emi ẹtụkde enye ẹkop nsọn̄idem.+
Mme Ikọ Idakisọn̄
^ M̀mê, “okụk okpoho.”
