John 15;1-27
15 “Ami ndi ata vine,+ Ete mi onyụn̄ edi anditọ.+
2 Enye esịbe kpukpru n̄kọk eke mîn̄wụmke mfri ke idem mi efep,+ onyụn̄ ọdiọn̄+ kpukpru n̄kọk eke ẹn̄wụmde mfri, man mmọ ẹkpen̄wụm ediwak mfri.+
3 Mbufo ẹmesasana oto ke ikọ oro n̄ketịn̄de nnọ mbufo.+
4 Ẹka iso ẹbuana n̄kpọ ye ami, ndien ami nyaka iso mbuana n̄kpọ ye mbufo.+ Kpa nte n̄kọk mîkemeke ndin̄wụm mfri ke idemesie ibọhọke enye odu ke vine, kpasụk ntre ke mbufo mîkemeke ndin̄wụm mfri, ibọhọke mbufo ẹbuana n̄kpọ ye ami.+
5 Ami ndi vine, mbufo ẹdi mme n̄kọk. Owo eke abuanade n̄kpọ ye ami, ami nnyụn̄ mbuanade n̄kpọ ye enye, enye emi on̄wụm ata ekese mfri;+ koro ke ẹsiode mi ẹfep mbufo ikemeke ndinam n̄kpọ ndomokiet.
6 Edieke owo ekededi mîbuanake n̄kpọ ye ami, ẹsịbe enye ẹduọk nte n̄kọk ndien enye asat; mme owo ẹnyụn̄ ẹtan̄ mme n̄kọk oro ẹtomo mmọ ẹdọn̄ ke ikan̄ ndien ikan̄ ata mmọ.+
7 Edieke mbufo ẹbuanade n̄kpọ ye ami, mme ikọ mi ẹnyụn̄ ẹdude mbufo ke esịt, ẹben̄e se ededi oro mbufo ẹyomde, ndien ẹyenam ẹnọ mbufo.+
8 Ete mi ọbọ ubọn̄ ke emi, nte mbufo ẹkade iso ẹn̄wụm ekese mfri ẹnyụn̄ ẹwụtde ke mbufo ẹdi mbet mi.+
9 Kpa nte Ete amade mi+ ami nnyụn̄ mmade mbufo, ẹka iso ẹdu ke ima mi.
10 Edieke mbufo ẹnịmde mme ewụhọ mi,+ mbufo ẹyeka iso ẹdu ke ima mi, kpa nte ami nnịmde mme ewụhọ Ete+ mi nnyụn̄ ndude ke ima esie.
11 “Ntịn̄ mme n̄kpọ emi nnọ mbufo, man idatesịt mi okpodu ke esịt mbufo, ẹkpenyụn̄ ẹnam idatesịt mbufo ọyọhọ.+
12 Ewụhọ mi edi emi, ete mbufo ẹma kiet eken kpa nte ami mmade mbufo.+
13 Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.+
14 Mbufo ẹdi mme ufan mi edieke mbufo ẹnamde se ami n̄wụkde mbufo.+
15 Ami n̄kotke mbufo aba mme ifịn, koro ofụn mîfiọkke se eteufọk esie anamde. Edi n̄kot mbufo mme ufan,+ koro kpukpru n̄kpọ oro n̄kopde nto Ete mi mmanam mbufo ẹfiọk.+
16 Idịghe mbufo ẹkemek mi, edi ami n̄kemek mbufo, nnyụn̄ nsio mbufo nnịm nte ẹka iso ẹn̄wụm mfri,+ nte mfri mbufo okponyụn̄ aka iso odu; man se ededi oro mbufo ẹdiben̄ede Ete ke enyịn̄ mi enye ọkpọnọ mbufo.+
17 “Mmowụk mbufo mme n̄kpọ emi, nte mbufo ẹma kiet eken.+
18 Edieke ererimbot asuade mbufo, mbufo ẹmefiọk ẹte enye ama asua mi mbemiso edisua mbufo.+
19 Edieke mbufo ẹkpedide ubak ererimbot, ererimbot akpama se idide esie.+ Edi sia mbufo mîdịghe ubak ererimbot,+ edi n̄kemekde mbufo nsio ke ererimbot, ke ntak oro ererimbot asua mbufo.+
20 Ẹti ikọ oro n̄kọdọhọde mbufo nte, Ofụn ikponke ikan eteufọk esie. Edieke mmọ ẹkekọbọde mi, mmọ ẹyekọbọ mbufo n̄ko;+ edieke mmọ ẹkenamde ikọ mi, mmọ ẹyenam eke mbufo n̄ko.
21 Edi mmọ ẹdinam mbufo kpukpru n̄kpọ emi ke ntak enyịn̄ mi, koro mmọ mîfiọkke enye emi ọkọdọn̄de mi.+
22 Edieke mmen̄kpedịghe nditịn̄ ikọ nnọ mmọ, mmọ ikpenyeneke idiọkn̄kpọ;+ edi ke emi mmọ inyeneke n̄kpọ nditịn̄ nnyan̄a idem ke idiọkn̄kpọ mmọ.+
23 Owo eke asuade mi asua Ete mi n̄ko.+
24 Edieke mmen̄kpokodụhe ke otu mmọ nnam mme utom emi akanam owo efen mînamke,+ mmọ ikpenyeneke idiọkn̄kpọ;+ edi ke emi mmọ ẹkụt ẹnyụn̄ ẹsua mi ọkọrọ ye Ete mi.+
25 Emi edi man ikọ emi ẹkewetde ke Ibet mmọ okposu, ‘Mmọ ẹsua mi ke unana ntak.’+
26 Ke ini andin̄wam oro ndibọde Ete nnọ ẹsọk mbufo edide edisịm, kpa spirit akpanikọ, emi otode Ete,+ enye oro eyetie ntiense aban̄a mi;+
27 ndien mbufo, n̄ko, ẹnyene nditie ntiense,+ koro mbufo ẹkedude ye ami toto ke ini emi n̄kọtọn̄ọde.
