Hell (emi edide “Sheol” ye “Hades” ke usem Hebrew ye Greek oro ẹkedade ẹwet Bible) ọwọrọ Udi, iwọrọke ebiet emi ẹsitụhọrede owo ke ikan̄. Mmanie ẹsika hell? Nti owo ye mme idiọkowo ẹsika. (Job 14:13; Psalm 9:17) Bible okot Udi emi, ‘ufọk emi kpukpru mme odu-uwem ẹdisopde idem.’—Job 30:23.

 Jesus ama aka hell ke ini enye akakpade. Edi “enye ikatakke ke hell,” koro Abasi ama anam enye eset.—Utom 2:31, 32, The Bible in Basic English.

Ndi mme owo ẹdidu ke hell ke nsinsi?

 Jesus ayada odudu oro Abasi ọnọde enye anam kpukpru mbon emi ẹdude ke hell ẹfiak ẹdidu uwem. (John 5:28, 29; Utom 24:15) Prọfesi emi odude ke Ediyarade 20:13 owụt se iditịbede ini oro. Enye ọdọhọ ete: “N̄kpa ye hell ẹnyụn̄ ẹsana mme akpan̄kpa emi ẹdude mmọ ke esịt ẹyak.” (King James Version) Ke ẹma ekenam mme akpan̄kpa ẹset ẹwọrọ do, hell ididụhe aba. Owo ndomokiet idikaha do aba sia ‘n̄kpa ididụhe aba.’—Ediyarade 21:3, 4; 20:14.

 Edi idịghe kpukpru mbon emi ẹkpade ẹsika hell. Bible owụt ke odu mbon emi esịt idiọkn̄kpọ ọsọn̄de, emi mînyụn̄ imaha ndikabade esịt. (Mme Hebrew 10:26, 27) Ke ini utọ mme owo oro ẹkpade mmọ isikaha hell, edi ẹsika Gehenna emi adade aban̄a nsinsi nsobo. (Matthew 5:29, 30) Ke uwụtn̄kpọ, se Jesus eketịn̄de aban̄a ndusụk mme adaiso ido ukpono eyo esie emi ẹkedide mbubịk, okowụt ke mmọ ẹdika Gehenna.—Matthew 23:27-33.