Ihih, Bible idọhọke ke Mary edi eka Abasi, inyụn̄ idọhọke mme Christian ẹkpono m̀mê ẹtuak ibuot ẹnọ Mary. a Kere ise:

•   Mary ikọdọhọke ke idi eka Abasi. Bible ọdọhọ ke Mary akaman “Eyen Ata Edikon̄”—“Eyen Abasi”—idịghe Abasi.—Luke 1:32, 35.

•   Jesus Christ ikọdọhọke ke Mary edi eka Abasi m̀mê ke odot ẹnọ enye san̄asan̄a ukpono. Ke ini n̄wan kiet ọkọnọde Mary eka Jesus san̄asan̄a ukpono, Jesus ama enen̄ede n̄wan oro. Jesus ama ọdọhọ ete: “Baba, akam edi mbon oro ẹkopde ikọ Abasi ẹnyụn̄ ẹnamde enye ẹkop inemesịt!”—Luke 11:27, 28.

•   Ikọ oro “Eka Abasi” ye “Theotokos” (andiman Abasi) idụhe ke Bible.

•   Idịghe Mary ke Bible okot “Ọbọn̄ An̄wan heaven,” nsunsu abasi-an̄wan oro nditọ Israel emi ẹma ẹkekpọn̄ ata Abasi ẹkesituakde ibuot ẹnọ, ke Bible okot ntre. (Jeremiah 44:15-19) Etie nte abasi-an̄wan mbon Babylon, emi ẹkesikotde Ishtar m̀mê Astarte, ekedi “Ọbọn̄ An̄wan heaven” emi.

•   Mme Christian eyo mme apostle ikesituakke ibuot inọ Mary, ikonyụn̄ inọhọ enye san̄asan̄a ukpono. Ewetmbụk eset kiet ọdọhọ ke mme Christian eyo mme apostle “ikpenyịmeke nditiene n̄kpono n̄kpọ en̄wen, ke anaedi mmọ ẹkeda nte ke ndinọ Mary san̄asan̄a ukpono emi mîdotke ekeme ndinam ẹkere ke mmimọ imọtọn̄ọ ndikpono abasi-an̄wan.”—In Quest of the Jewish Mary.

•   Bible owụt ke Abasi inyeneke ntọn̄ọ, ke enye ama ododu mbemiso n̄kpọ ekededi. (Psalm 90:1, 2; Isaiah 40:28) Sia Abasi mînyeneke ntọn̄ọ, ọwọrọ owo ikamanke-man enye—ntre enye inyeneke eka. Mary ikpokonyụn̄ ikemeke ndikama Abasi ke idịbi esie nsan̄a sia Bible ọdọhọ ke heaven ikam ikemke Abasi.—1 Ndidem 8:27.

Mary Ekedi Eka Jesus Idịghe “Eka Abasi”

 Mary ekedi eyen Jew; enye okoto ubon Edidem David. (Luke 3:23-31) Mary ama ọbuọt idem ye Abasi onyụn̄ esịn idem ke n̄kpọ Abasi, oro akanam Abasi enen̄ede ama enye. (Luke 1:28) Abasi ekemek enye ete edi eka Jesus. (Luke 1:31, 35) Mary ye ebe esie, Joseph, ẹma ẹnyene nditọ en̄wen.—Mark 6:3.

 Kpa ye oro Bible owụtde ke Mary ama akabade edi mbet Jesus, Bible itịn̄ke ediwak n̄kpọ iban̄a enye.—Utom 1:14.