Nnyịn Mme Ntiense Jehovah isin̄wanake ekọn̄. Ntak edi ke:

1.   Nnyịn ikop uyo Abasi. Bible ọdọhọ ke ikọt Abasi “ẹyeda akan̄kan̄ mmọ ẹdom n̄kpọ ufụn̄isọn̄,” ke mmọ “idinyụn̄ ikpepke aba ekọn̄.”—Isaiah 2:4.

2.   Ikop uyo Jesus. Jesus ọkọdọhọ apostle Peter ete: “Sịn akan̄kan̄ fo ke itie esie, koro kpukpru owo eke ẹmende akan̄kan̄ ẹdikpa ke akan̄kan̄.” (Matthew 26:52) Ikọ Jesus ọkọwọrọ ke mbet imọ idin̄wanake ekọn̄.

    Sia Jesus ọkọdọhọde mbet esie ete mmọ ‘ẹkûdi ubak ererimbot,’ nnyịn isisịnke idem ke mbubehe ukara. (John 17:16) Nnyịn isinyeneke uyo ke se ededi emi ekọn̄ ẹnamde isinyụn̄ idọhọke eke oyomde ndidụk ekọn̄ ite okûdụk.

3.   Imama mbon en̄wen. Jesus ọkọdọhọ mbet esie “ẹma kiet eken.” (John 13:34, 35) Ima emi anam mmọ ẹdiana kiet nte nditọeka ke ofụri ererimbot. Ima emi idinyụn̄ iyakke mmọ ẹn̄wana ye nditọeka mmọ—1 John 3:10-12.

4.   Itiene uwụtn̄kpọ mme Christian eyo mme apostle. N̄wed Encyclopedia of Religion and War ọdọhọ: “Mbet Jesus ke ini oro ikesikaha ekọn̄ inyụn̄ inamke utom ekọn̄. Mmọ ẹkeda ke utom oro iyakke owo ama mbon en̄wen onyụn̄ ama mme asua esie nte Jesus ekekpepde mmọ.” Peter Meinhold, owo Germany emi ekpepde n̄kpọ aban̄a ido ukpono etịn̄ ntem aban̄a mbet Jesus ke ini oro ete: “Owo emi edide Christian ikekemeke ndidi owo ekọn̄.”

 Mme Ntiense Jehovah ẹdu uwem nte nditọ owo inyụn̄ isịnke ntịme ke ebiet ekededi emi mmọ ẹdụn̄de. Mme itie Bible emi ẹnam nnyịn ikpono ukara:

•   “Yak kpukpru ukpọn̄ ẹsụk ibuot ẹnọ mme odudu oro ẹkponde ẹkan.”—Rome 13:1.

•   “Ẹnọ Caesar se inyenede Caesar, ẹnyụn̄ ẹnọ Abasi se inyenede Abasi.”—Matthew 22:21.

 Imesikpe tax nnyịn isinyụn̄ ibiatke ibet ukara. Nnyịn isibiatke se ededi emi ukara anamde ndin̄wam mme owo ke obio.