Xaxa gã la ahe ɣeyiɣi sesẽtɔ kekeake ava ameƒomea dzi. Biblia gblɔe ɖi be ɣeyiɣi sia ava le “ŋkeke mamlɛawo” alo “nuwuɣi” la me. (2 Timoteo 3:1; Daniel 12:4) “Anye xaxa si tɔgbi meva kpɔ tso esime Mawu wɔ xexea va se ɖe fifi o, eye etɔgbi megale vava ge ake o.”​—Marko 13:19; Daniel 12:1; Mateo 24:21, 22.

Nu siwo adzɔ le xaxa gã la me

•   Alakpasubɔsubɔhawo tsɔtsrɔ̃. Woatsrɔ̃ alakpasubɔsubɔhawo alɔ tsɔtsɔe wòawɔ nuku na amewo. (Nyaɖeɖefia 17:​1, 5; 18:​9, 10, 21) Dunyaheŋusẽ siwo katã le megbe na Dukɔ Ƒoƒuawo ye Mawu azã atsɔ awɔ esia.​—Nyaɖeɖefia 17:3, 15-18. a

•   Subɔsubɔha vavãtɔ dzi dzedze. Dukɔwo ƒe ƒuƒoƒo si woyɔ le Ezekiel ƒe ŋutega me be “Gog, si tso Magog-nyigba dzi” la adze agbagba be yeatsrɔ̃ ame siwo le subɔsubɔha vavãtɔ me. Gake Mawu akpɔ esubɔlawo ta tso tsɔtsrɔ̃ ma me.​—Ezekiel 38:​1, 2, 9-​12, 18-​23.

•   Ʋɔnudɔdrɔ̃ anyigbadzinɔlawo. Yesu adrɔ̃ ʋɔnu amewo katã, eye “wòama amewo me tso wo nɔewo gbɔ, abe ale si alẽkplɔla maa alẽwo tso gbɔ̃wo gbɔe ene.” (Mateo 25:31-​33) Nu si dzi Yesu anɔ te ɖo adrɔ̃ ʋɔnu amee nye nenye be amea na kpekpeɖeŋu ‘nɔviawo,’ siwo nye ame siwo aɖu fia kplii le dziƒo, alo mena kpekpeɖeŋu wo o.​—Mateo 25:34-​46.

•   Ame siwo aɖu dzi le Fiaɖuƒea me nu ƒoƒo ƒu. Nuteƒewɔla siwo wotia be woaɖu fia kple Kristo la awu woƒe anyigbadzigbenɔnɔ nu eye woafɔ wo ɖe tsitre woayi dziƒo.​—Mateo 24:31; 1 Korintotɔwo 15:50-53; 1 Tesalonikatɔwo 4:15-17.

•   Armagedon. Wogayɔ “Mawu Ŋusẽkatãtɔ la ƒe ŋkeke gã la ƒe aʋawɔwɔ” la be “Yehowa ƒe ŋkeke la.” (Nyaɖeɖefia 16:14, 16; Yesaya 13:9; 2 Petro 3:12) Kristo atsrɔ̃ ame siwo woabu fɔ le ʋɔnudɔdrɔ̃ mamlɛa me. (Zefaniya 1:18; 2 Tesalonikatɔwo 1:6-10) Esiawo dometɔ aɖee nye xexea me katã ƒe dunyahenuɖoanyia, si woɖɔ le Biblia me be lã wɔadã si ta adre li na la.​—Nyaɖeɖefia 19:19-​21.

Nu siwo adzɔ le xaxa gã la megbe

•   Satana kple gbɔgbɔ vɔ̃wo lelé ade aʋli me. Mawudɔla sẽŋu aɖe alé Satana kple gbɔgbɔ vɔ̃wo ade “aʋli me,” si fia dɔmawɔmawɔ ƒe nɔnɔme si sɔ kple ku. (Nyaɖeɖefia 20:​1-3) Woate ŋu atsɔ nɔnɔme si me Satana anɔ le aʋlia me asɔ kple gamenɔnɔ; magate ŋu akpɔ ŋusẽ ɖe naneke dzi le teƒe aɖeke o.​—Nyaɖeɖefia 20:7.

•   Ƒe Akpa Ðeka Dziɖuɖua dze egɔme. Mawu Fiaɖuƒea adze eƒe ƒe 1,000 dziɖuɖua, si ahe yayra manyagblɔwo vɛ na amegbetɔwo la gɔme. (Nyaɖeɖefia 5:​9, 10; 20:​4, 6) “Ameha gã” aɖe si xexlẽme meli na o ado “go tso xaxa gã la me,” si fia be woatsi agbe eye woakpɔ Ƒe Akpe Ðeka Dziɖuɖua ƒe gɔmedzedze le anyigba dzi.​—Nyaɖeɖefia 7:​9, 14; Psalmo 37:​9-​11.