Miiri k’a filɛ: Karen sera ɲɛnagwɛ dɔ la a miniti tan ye nin ye ani a y’a lɔnbaga dɔ kaan mɛn a kɔfɛ.

Karen yɛlɛmana ani a y’a ye ko a terimuso Jessica lo. Biɛri buteli fila yɛlɛnin b’a bolo. A ye biɛri buteli kelen sin Karen ma k’a fɔ a ye ko: “Nin minɛ! O tuma na i t’a fɛ k’i yɛrɛ ɲɛnagwɛ wa?”

Karen b’a fɛ ka ban sabu a tɛ baliku ye fɔlɔ. Jessica do y’a terimuso ye. Karen t’a fɛ a terimuso k’a miiri ko ale t’a fɛ k’a yɛrɛ ɲɛnagwɛ. Ka fara o kan, Jessica ye mɔgɔ ɲuman lo ye. Ni ale be biɛri min, o kɔrɔ ko koo jugu tɛ. Karen y’a miiri ko: “Biɛri dɔrɔn tɛ wa? A ma kɛ komi dɔrɔgi lo.”

N’i tun be Jessica nɔɔ na, i tun bena mun lo kɛ do?

N’i b’a fɛ ka desizɔn ɲuman ta o koo ɲɔgɔn na, i ka ɲi k’a lɔn i ye mɔgɔ sifa min ye, o kɔrɔ, min kɔrɔtanin lo i fɛ ani i ka lannakow ye min ye. O lo bena see di i ma ka koow latigɛ i yɛrɛ ma sanni k’a to mɔgɔ wɛrɛw k’o kɛ i ye.—1 Korɛntikaw 9:26, 27.

I be se k’o setigiya sɔrɔ cogo di? Ɲiningali nunu jaabi fɔlɔ, u bena i dɛmɛ.

N’i b’i ka jogo ɲumanw lɔn, o bena i dɛmɛ i be la i yɛrɛ la.

ƝƐYIRALI DƆ, BIBULU KƆNƆ: Ciden Pol y’a sɛbɛ ko: “Hali ni ne te se kuma na, lɔnniya faan fɛ kɔni, ne be se.” (2 Korɛntikaw 11:6). Komi Pol tun be Ala ka Kuma lɔn ka ɲɛ, o lo y’a dɛmɛ ka to kantigiya la gwɛlɛyaw bɛɛ n’a ta. A m’a to mɔgɔw ka kuma juguw k’a fari faga.—2 Korɛntikaw 10:10; 11:5.

I YƐRƐ SƐGƐSƐGƐ: I be ni setigiya wala lɔnniya min ye, o sɛbɛ.

Sisan i be ni jogo ɲuman min ye, o kofɔ. (Ɲɛyirali fɛ: I b’i janto tɔɔw la wa? I b’i tɛgɛ labila ka mɔgɔw sɔn wa? I ye kankelentigi ye wa? I be to ka kɛ lɛri la wa?)

Jɛnkulu ka fanga be bɔ jɛnkuluden kelen kelen bɛɛ lo la. Jɛnkuluden dɔ ka barikantanya be se ka jɛnkulu kuru bɛɛ ka fanga dɔgɔya. O cogo kelen na, i ye mɔgɔ sifa min ye, o be se ka nagasi n’i y’a to i ka fiɲɛw ye see sɔrɔ i kan.

ƝƐYIRALI DƆ, BIBULU KƆNƆ: Ciden Pol tun b’a ka fiɲɛw kala ma. A ko: “Ne dusu la kɔni, Ala ka sariya koo ka di ne ye. Nga n y’a ye, koo min ka di ne ye ni ne b’a fɛ k’o kɛ, fɛɛn dɔ be ne bali k’o kɛ. Ale lo b’a kɛ hakɛ be fanga sɔrɔ ne kan.”—Ɔrɔmukaw 7:22, 23.

I YƐRƐ SƐGƐSƐGƐ: I b’a fɛ ka see sɔrɔ i ka fiɲɛ jumanw lo kan?

Yala i be sɔn ka takasi dɔ ta ani k’a fɔ takasibolila ye ko a ka to ka munumunu n’i ye i ka kiin kɔnɔ fɔɔ esansi be taga ban wa? O kɔni ye nalomanya lo ye ani i bena i ka wari tiɲɛ gwansan.

O be mun lo yira an na? O b’a yira ko i ka laɲinitaw be se k’i dɛmɛ k’a lɔn i ka ɲi ka min kɛ. O la, i tɛna to ka munumunu i kunfɛ. I bena i tagayɔrɔ lɔn ani k’a lɔn i bena se yen cogo min na.

ƝƐYIRALI DƆ, BIBULU KƆNƆ: Ciden Pol y’a sɛbɛ ko: “Ne te boli n kunfɛ.” (1 Korɛntikaw 9:26). Pol tun tɛ ɲɛnamaya kɛ a kunfɛ. Nka, a tun ye laɲinita dɔw latigɛ ani a ye ɲɛnamaya kɛ ka kɛɲɛ n’u ye.—Filipikaw 3:12-14.

I YƐRƐ SƐGƐSƐGƐ: Laɲinita saba sɛbɛ, i b’a fɛ ka minw dafa yanni saan wɛrɛ.

N’i tɛ ni lannakow ye, i tɛna a lɔn i ka ɲi ka min kɛ. I ko nɔgɔsi, i bena to k’i cogoya yɛlɛma yɛlɛma walisa ka kɛ i n’a fɔ i filankuruw. O b’a yira ko i t’a lɔn i yɛrɛ ye mɔgɔ sifa min ye ani i ka lannakow ye min ye.

Nka, mɔgɔw mana min o min kɛ, n’i be koow kɛ ka kɛɲɛ n’i ka lannakow ye, i ye mɔgɔ sifa min ye, o tɛna yɛlɛma.

ƝƐYIRALI DƆ, BIBULU KƆNƆ: Kira Daniyɛli tun ye kanbele ye tuma min na a ye “ŋaniya ta” ko a bena Ala ka sariyaw labato. A y’o ŋaniya ta k’a sɔrɔ a tun t’a somɔgɔw gɛrɛfɛ (Daniyɛli 1:8). O lo y’a to a ma koow kɛ i n’a fɔ mɔgɔ tɔɔw. Nka, a ye koow kɛ ka kɛɲɛ n’a ka lannakow lo ye.

I YƐRƐ SƐGƐSƐGƐ: I ka lannakow ye jumanw lo ye? Ɲɛyirali fɛ: I lanin lo Ala la wa? N’o lo, mun na i lanin b’a la? Ele fɛ, mun lo b’a yira ko Ala be yen tiɲɛn tiɲɛn na?

Yala i lanin b’a la ko Ala ka sariyaw be se k’i nafa wa? N’o lo, mun na i lanin b’o la?

A laban, i b’a fɛ ka kɛ i n’a fɔ yiri furaburu, fɔɲɔ dennin be min ta wa? Wala i b’a fɛ ka kɛ i n’a fɔ yiri min liliw donna dugukolo kɔnɔ koɲuman, sanfɔɲɔba tɛ se ka min ben wa? I jija k’a lɔn i ye mɔgɔ sifa min ye tigitigi ani i ka lannakow ye min ye. O la, i bena kɛ i n’a fɔ o yiri. O bena i dɛmɛ fana ka ɲiningali nin jaabili sɔrɔ: Ne ye mɔgɔ sifa juman lo ye?