Miiri k’a filɛ: Fanta ye dugalen filɛ ani a y’a ye ko ale ka bon kojugu. A b’a fɔ a yɛrɛ ye ko: “Fɔɔ n’ ka fasa.” A bangebagaw n’a teriw do y’a fɔ a ye ko a “fasanin lo.”

A ma mɛɛn, Fanta miirila fɛɛrɛ dɔ la walisa ka fasa dɔɔni. A y’a latigɛ ko a tɛna dumuni kɛ tile damanin . . .

N’i fana be miirila i ko Fanta, i bena mun lo kɛ do?

Koo jugu tɛ ka hami i sawura koo la. Bibulu yɛrɛ be cɛɛw ni muso dɔw tando u sawura kosɔn: Sara, Arasɛli, Abigayɛli, Yusufu ani Dawuda. Bibulu b’a fɔ fana ko Abisagi “tun cɛɛ ka ɲi kosɔbɛ.”—1 Masacɛw 1:4.

Nka, kanbelew ni sunguru caaman be hami kojugu u sawura koo la. O be se ka gwɛlɛyabaw lase u ma. Kunnafoni nunu lajɛ:

• Sɛgɛsɛgɛri dɔ y’a yira ko sunguru kɛmɛ kan, sunguru 58 b’a jati k’olu ka bon kojugu, k’a sɔrɔ u cɛma, mɔgɔ 17 dɔrɔn lo ka bon tiɲɛn na.

• Sɛgɛsɛgɛri wɛrɛ y’a yira ko muso kɛmɛ kan, muso 45 b’a jati k’olu ka bon kojugu, k’a sɔrɔ u fasanin lo.

• Kanbelew ni sunguru dɔw y’a ɲini ka fasa fɔɔ bana dɔ (anorexie) y’u minɛ k’u niin bila farati la. O bana b’a to dumunikɛ lɔgɔ t’u minɛ.

 N’i ye tagamasiɲɛ dɔw ye minw b’a yira k’o bana wala dumunibaliya bana wɛrɛ b’i la, dɛmɛ ɲini. A daminɛ k’i ka haminankow fɔ i bangebaga dɔ wala baliku sɔbɛ dɔ ye. Bibulu b’a fɔ ko: “Teri sɛbɛ bɛ mɔgɔ kanu tuma bɛɛ, a bɛ kɛ i balimakɛ ye tɔɔrɔ waati la.”—Talenw 17:17, ABM.

Tiɲɛn na, an ye mɔgɔ sifa min ye tigitigi, o lo b’a yira n’an cɛ ka ɲi wala n’an cɛ ka jugu. An ka masacɛ Dawuda dencɛ Abisalɔn ka koo lajɛ. Bibulu b’a fɔ a koo la ko:

“Abisalɔn ɲɔgɔn tun te yen cɛɲa na, ani kodiya la . . . fiɲɛ tun t’a la.”—2 Samuyɛli 14:25.

Nka, o kanbele tun ye kuncɛba, hasiri ani janfanci ye! Bibulu tɛ Abisalɔn tɔgɔɲuman fɔ hali dɔɔni. A b’a fɔ ko Abisalɔn tun tɛ kantigi ye fewu ani mɔgɔfaga dusu tun b’a la.

O kama, Bibulu b’an ladi ko:

Aw “ka jogokura ta.”—Kɔlɔsikaw 3:10.

“Aw kana aw ka cɛɲa yira ni masirifɛnw ye . . . Nga, aw ka kɛ sɔnɲumantigiw ye.”—1 Piyɛri 3:3, 4.

Tiɲɛn lo ko koo jugu tɛ k’a ɲini k’i sawura fisaya. Nka, i ka jogo ɲumanw lo kɔrɔtanin lo ka tɛmɛ i sawura kan. I kɔgɔnin lo wo, i cɛ ka ɲi wo, o lo tɛna i koo diya mɔgɔw ye. A laban, i ka jogo ɲumanw lo bena a to i koo be diya mɔgɔw ye. Phylicia y’a fɔ ko: “N’i cɛ ka ɲi, mɔgɔw ka teli k’i filɛ. Nka, i ye mɔgɔ sifa min ye tigitigi ani jogo ɲuman minw b’i la, o lo be to mɔgɔw hakili la.”

Yala i dusu ka teli ka tiɲɛ i sawura kosɔn wa?

Yala a b’i kɔnɔ ka porodi mɔ wala ka ban ka dumuni kɛ walisa k’i sawura fisaya wa?

N’i tun be se, i tun bena mun lo yɛlɛma i sawura la? (Tagamasiɲɛ kɛ o la.)

• JANYA

• BONYA

• KUNSIGI

• FARIKOLO COGOYA

• ƝƐDA

• FARI

N’i ye ɲiningali fɔlɔ ni 2nan jaabi ko ɔnhɔn ani ɲiningali 3nan na, n’i ye tagamasiɲɛ kɛ fɛɛn saba la, i hakili to nin na: Ele b’a miiri ko i cɛ ka jugu. Nka, n’a sɔrɔ mɔgɔw t’o miiri. A ka nɔgɔ ka koow dama tɛmɛ ani ka hami kojugu i sawura koo la.—1 Samuyɛli 16:7.