YETE̱NA moto o to̱ndino̱ a wedi, we ná o be̱ne̱ pat’a besengedi jita, ka ndutu, muso̱lo̱ki, na si be̱ne̱ la ngudi. Yen ebe we pe̱ ná o linga, mulema mu kaise̱ wa, o bwa bo̱ngo̱. We ná na o baise̱ wame̱ne̱ nga ye njo̱m o benga be̱ longe̱.

Be̱ mbaki ná e titi bobe ná o bwe ndutu, to̱ e be̱ nde ná nika e no̱ngi pond’a bwaba. Nika e malee̱ nde nate̱na njika dikala o tano̱ o to̱ndo̱ mot’ango̱. Nde we so̱ ná o kusa lo̱ko̱mea ońola ses’ango̱ e?

To̱ e be̱ nde ná o mo̱nge̱le̱ ná ndut’ango̱ e si me̱nde̱ bo̱, we ná o kusa lo̱ko̱mea yete̱na o bupe̱ man malea:

NO̱NGO̱ PONDA O JEYA MOT’ANGO̱

Bato be̱se̱ ba si malembe̱ ndut’a kwedi ńai po̱. To̱ na nika, mbembe ńe ná ńo̱ngwane̱ wa o busise̱ ndut’ango̱. Vanessa, di kwaledino̱ o mo̱ń mo̱ ná: “Na ta na be̱ne̱ ńo̱ng’a jeya; e ta e pula ná na busise̱ ndut’am.” Sofia, ńena nu wese̱ munańango ńa muto epańpań, a kwali ná: “Ye ndutu jita o jo̱nge̱le̱ nje e tombi. Nika ńe nde ka tele̱ na bolea pola. Sese e tombise̱ bonde̱ne̱, nde nik’e mongwane̱ o bo̱lise̱ ebango.”

TO̱PEA OŃOLA MO̱NGE̱LE̱ NA BESENGEDI BO̱NGO̱

E te̱nge̱n ná ponda iwo̱ o be̱ne̱ ńo̱ng’a ja na wame̱ne̱. Nde jane̱ la ndut’ango̱ na wame̱ne̱ le nde  ka pula bambe̱ na wame̱ne̱ mūna mwe bodilo jita. Jared nu be̱n dom la mbu na samba, ńena nu bo̱lo̱ne̱ sango, mo̱ ná: “Na ta na langwea bape̱pe̱ ne̱ni na masengano̱. Na mo̱nge̱le̱ ná na si ta na tele̱ye̱ ná se̱ṅse̱ṅ ne̱ni na tano̱ na senga, nde na ta muńe̱nge̱ o kwala na babo̱.” Janice di kwaledino̱ o dongo laboso, a to̱pedi ońola tombwane̱ dipe̱pe̱: “Kwala na bato bape̱pe̱ di wanedi mba lo̱ko̱mea dinde̱ne̱. Na so̱ṅtane̱ ná bape̱pe̱ ba maso̱ṅtane̱ mba, na ná na si ta muso̱lo̱ki.”

EMEA JONGWANE̱ LA BANE̱

Do̱kita diwo̱ di kwali ná: “Bato ba kusi te̱ kwedi nde bese̱le̱ ná mako̱m na mbia mabu mongwane̱ babo̱ ke̱ kwedi ńe o wa ko̱, e yo̱ki be̱ babo̱ lambo di wam o lembe̱ ndut’abu na mo̱me̱ne̱ buka mo̱.” Langwea mako̱m mo̱ngo̱ nje beno̱ ná ba bola o jongwane̱ wa; be ná ba pula jongwane̱ wa nde ba si bie ne̱ni bola nika.​—Minia 17:17.

SISEA BE̱BE̱ NA LOBA

Tina a kwali ná: “Ponda mom’am a wedino̱ epańpań na kanse̱r, na si wusa pe̱ langwea mo̱ mitaka mam na nika; Loba so̱ nde na tano̱ nangame̱n langwea mambo me̱se̱! Idiba te̱ na ta na baise̱ mo̱ ná ongwane̱ mba ońola bo buńa. Na titi ná na bo̱le̱ langwa jongwane̱ Loba a wanedino̱ mba.” Tarsha, ńena nu ta nu be̱ne̱ 22 mbu ponda ńango a wedino̱, a kwali ná: “Langa la Bibe̱l buńa te̱ di ta di lo̱ko̱ mba. Nik’e boli mba ná no̱nge̱le̱ mambo mena ma malo̱ke̱.”

BE̱NE̱ BEPUMBWEDI O MO̱NGE̱LE̱

Tina a bati ná: “O bebotedi, dipita la bepumbwedi di si ta di lo̱ko̱ mba ebanja na ta na be̱ne̱ ńo̱ng’a mom’am, bana bam pe̱ ba ta ba be̱ne̱ ńo̱ng’a sango abu. Nde tatan, ombusa mbu mine̱i, na matingame̱ o di dipita. Mo̱ nde di masue̱le̱ mba. Na mo̱nge̱le̱ ponda na me̱nde̱no̱ pe̱te̱ je̱ne̱ mom’am, nje e mawaneye̱ mba musango na muńe̱nge̱!”

Yen ebe ndut’ango̱ e si me̱nde̱ bo̱ dibokime̱ne̱. Nde to̱ e be̱ nde nika, myango ma Vanessa me ná mi wanea wa lo̱ko̱mea. A kwali ná: “O mo̱nge̱le̱ ná e si me̱nde̱ wala to̱ buńa, nde son na son ndut’ango̱ e mabotea wo̱ye̱.”

O si dimbea ná, to̱ e be̱ nde ná o titi ná o dimbea moto o bo̱lo̱ne̱no̱, ye njo̱m o benga be̱ longe̱. Na jongwane̱ la ndolo la Loba, we ná pe̱te̱ o be̱ne̱ mako̱m ma bwam na longe̱ di be̱n janda. Son a ponda pe̱ Loba a me̱nde̱ pumbwe̱le̱ bawedi. A mapula ná o we̱le̱ pe̱te̱ sokane̱ bandolo bo̱ngo̱. Niponda so̱, ni ndutu e me̱nde̱ bo̱ ná bambam!