Zezi ti sov bann imen fidel ler i ti donn son lavi konman en sakrifis. (Matye 20:28) Alor, Labib i apel Zezi sa enn ki “sov lemonn.” (1 Zan 4:14) I osi dir: “Napa en lot dimoun ki kapab sov nou, parski Bondye pa’n donn pouvwar personn ankor lo later pour sov nou apard ki li.”​—Akt 4:12.

 Zezi ti “mor pour tou dimoun” ki demontre lafwa dan li. (Ebre 2:9; Zan 3:16) Apre sa, “Bondye in resisit li” e Zezi in retourn dan lesyel konman en lanz. (Akt 3:15) Dan lesyel, Zezi i kapab “sov bann ki pe priy Bondye atraver li dan en fason parfe, parski i pou touzour la pour pled pour zot.”​—Ebre 7:25.

Akoz nou bezwen Zezi pour pled pour nou?

 Nou tou nou fer pese. (Romen 3:23) Pese i met en baryer ant nou ek Bondye e i anmenn lanmor. (Romen 6:23) Me Zezi i parey “en avoka” pour bann ki demontre lafwa dan son sakrifis. (1 Zan 2:1, not) Zezi i pled pour zot par demann Bondye pour ekout zot lapriyer e pardonn zot pese gras a son sakrifis. (Matye 1:21; Romen 8:34) Bondye i fer sa ki Zezi i demann li parski sa i armoni avek Son lavolonte. Bondye ti anvoy Zezi lo later “pour ki lemonn i ganny sove atraver li.”​—Zan 3:17.

Eski nou bezwen zis krwar dan Zezi pour nou ganny sove?

 Non. Menm si nou devret krwar dan Zezi pour ganny sove, nou bezwen fer plis keksoz. (Akt 16:30, 31) Labib i dir: “Zis parey lekor san lespri i mor, lafwa san aksyon osi i mor.” (Zak 2:26) Pour nou ganny sove, nou bezwen:

•   Aprann lo Zezi ek son papa, Zeova.​—Zan 17:3.

•   Demontre lafwa dan zot.​—Zan 12:44; 14:1.

•   Demontre nou lafwa par obei zot bann lord. (Lik 6:46; 1 Zan 2:17) Zezi ti ansennyen ki pa tou sa ki kriy li “Senyer” ki pou ganny sove, me zis bann ki “pe fer lavolonte [son] Papa ki dan lesyel.”​—Matye 7:21.

•   Kontinyen demontre lafwa malgre difikilte. Zezi ti fer sa kler ler i ti dir: “Sa enn ki’n andire ziska lafen pou ganny sove.”​—Matye 24:13.