Eski nou devret priy avek Zezi?

EN serser ti resaman kestyonn apepre 800 zenn ki sorti dan plis ki en dizenn diferan group relizye, konsernan si zot krwar ki Zezi i reponn lapriyer. Apepre 60 poursan ti dir ki zot totalman krwar ki Zezi i reponn lapriyer. Par kont, en zenn ti bar non Zezi lo sa kestyonner e plito ekri “Bondye.”

Ki ou panse? Eski nou devret adres nou bann lapriyer avek Zezi oubyen Bondye? * Pour trouv larepons, premyerman annou vwar ki mannyer Zezi ti ansenny son bann disip pour priye.

AVEK LEKEL ZEZI TI ANSENNY NOU POUR PRIYE?

Zezi ti ansenny e montre nou avek lekel nou devret priye.

SON LANSENNYMAN: Kan enn son bann disip ti demann Zezi, “Senyer, montre nou fer lapriyer,” Zezi ti dir zot: “Kan zot priye dir: ‘Papa.’” (Lik 11:1, 2) Pli tar, dan son gran Sermon lo Montanny, Zezi ti ankouraz bann ki ti pe ekout li pour priye. I ti dir: “Priy ou Papa.” I ti osi reasir zot par dir: “Zot Papa i konnen sa ki zot bezwen avan menm ki zot demann li.” (Matye 6:6, 8) Lo son dernyen zour konman en imen, Zezi ti dir son bann disip: “Tou sa ki zot pou demann mon Papa an mon non i pou donn zot.” (Zan 16:23) Alor, Zezi ti ansenny nou pour priy avek sa enn ki son Papa e nou Papa, Bondye Zeova.​—Zan 20:17.

SON LEGZANP: Lo menm laliny avek lafason ki i ti ansenny lezot pour priye, Zezi ti personnelman priye: “Mon Papa, Senyer lesyel ek later, mon rann ou glwar.” (Lik 10:21) Lo en lot lokazyon, Zezi ti get anler e dir, “Papa, mersi ki ou’n ekout mwan.” (Zan 11:41) Ler i ti pe mor, Zezi ti priye: “Papa, dan ou lanmen, mon remet mon lespri!” (Lik 23:46) Par priy avek son Papa dan lesyel, “Senyer lesyel ek later,” Zezi in kit en bon legzanp pour tou dimoun swiv. (Matye 11:25; 26:41, 42; 1 Zan 2:6) Eski koumsa ki bann premye disip Zezi ti konpran son bann lenstriksyon?

AVEK LEKEL BANN KRETYEN DAN PREMYE SYEK TI PRIYE?

Zis dan bann semenn apre ki Zezi ti’n retourn dan lesyel, son bann disip ti ganny maltrete e menase par sa bann ki ti opoz zot. (Akt 4:18) Byensir, zot ti priye pour ganny led. Me avek lekel zot ti priye? “Bann krwayan ti met zot ansanm pour priy Bondye,” pour ki I kontinyen ed zot “o non [son] sen serviter Zezi.” (Akt 4:24, 30) Alor bann disip ti swiv bann gidans Zezi konsernan lapriyer. Zot ti priy avek Bondye me pa avek Zezi.

Plizyer lannen pli tar, zapot Pol ti dekrir lafason ki li ek son bann konpanyon ti priye. Ler i ti pe ekri bann Kretyen, i ti dir: “Ler nou priy pour zot nou touzour remersi Bondye, Papa nou Senyer Zezi-Kri.” (Kolosyen 1:3) Pol ti osi dir zot pour “Remersi Bondye, nou Papa tou letan pour tou o non nou Senyer Zezi-Kri.” (Efezyen 5:20)  Atraver sa bann parol, nou kapab vwar ki Pol ti ankouraz lezot pour priy avek “nou Papa tou letan pour tou” me fer li o non Zezi.​—Kolosyen 3:17.

Parey bann Kretyen dan premye syek, nou kapab demontre lanmour pour Zezi par met an pratik son konsey konsernan lapriyer. (Zan 14:15) Anmezir ki nou priy avek zis nou Papa tousel dan lesyel, sa bann parol dan Psonm 116:1, 2 pou annan plis lenportans pour nou: “Mon kontan Zeova akoz i tann mon lavwa . . . Mon pou koz avek li osi lontan ki mon vivan.” *

[Not anba lo paz]

[Bwat lo paz 11]

Eski zot ti priy avek Zezi?

Dan Labib i annan detrwa sityasyon kot bann imen fidel in koz avek Zezi ki dan lesyel e menm parfwa avek bann lanz. (Akt 9:4, 5, 10-16; 10:3, 4; Revelasyon 10:8, 9; 22:20) Me eski sa bann zonm ti pe priy avek sa bann kreatir dan lesyel? Non. Dan tou sa bann sirkonstans, ti sa bann kreatir dan lesyel ki ti konmans sa konversasyon. Bann zonm ek fanm fidel ti priy zis avek Bondye tousel.​—Filipyen 4:6.

[Portre lo paz 10, 11]

Par priy avek son Papa dan lesyel Zezi ti kit en bon legzanp pour tou dimoun swiv