Sa ki byen ek sa ki mal: Bann konsey Labib i kapab ed nou
Annou vwar kat laspe dan nou lavi kot Labib in ed plizyer milyon dimoun.
1. Maryaz
Dimoun i annan diferan pwennvi lo maryaz e lo kwa ki neseser pour annan en maryaz ere.
LABIB I DIR: “Sakenn ant zot i devret kontan son madanm parey i kontan son lekor e en madanm li, i devret annan en gran respe pour son msye.”—Efezyen 5:33.
KI SA I VEDIR: Maryaz i en laranzman ki Bondye in fer alor i konnen ki en koup i bezwen pour zot ere. (Mark 10:6-9) Pour en maryaz ere, sa msye oubyen sa madanm pa devret konsantre lo sa ki i pou gannyen dan sa maryaz me lo ki i kapab donnen pour fer sa maryaz vin pli solid. En msye pou montre ki i kontan son madanm par lafason ki i tret li e pran byen swen avek li. En madanm ki kontan son msye, pou siport son msye e demontre respe ler i koz avek li.
BANN KONSEY LABIB I KAPAB ED NOU: Quang ek Thi ki sorti Vietnam, ti krwar ki zot pa ti pou zanmen ere dan zot maryaz. Parfwa Quang pa ti zantiy. I dir: “Mon pa ti enterese avek lafason ki Thi ti pe santi e souvan mon ti anbaras li.” Thi ti anvi divorse. I ti dir: “Mon ti santi ki mon ti nepli kapab annan konfyans oubyen respe pour mon msye.”
Avek letan, Quang ek Thi ti aprann sa ki Labib i ansennyen e ki mannyer pour aplik Efezyen 5:33 dan zot maryaz. Quang i dir: “Sa verse ti ed mwan vwar akoz mon ti bezwen zantiy e fer Thi santi ki mon kontan li e pran swen avek li materyelman, fizikman e emosyonnelman. Ler mon azir koumsa, Thi i annan plis lanmour ek respe pour mwan.” Thi i dir: “Pli mon aplik Efezyen 5:33 e demontre respe pour mon msye, pli i fer mwan santi ki i kontan mwan, ki mon an sekirite e mon anpe.”
Pour plis lenformasyon lo maryaz, lir magazin Veye! No. 2 2018, avek tit “12 Sekre pour en fanmir ere ” lo jw.org.
2. Lafason pour tret lezot
Dimoun i souvan pa tret lezot byen akoz zot ras, nasyonalite, zot laparans, larelizyon oubyen zot konportman seksyel.
LABIB I DIR: “Annan respe pour tou kalite dimoun.”—1 Pyer 2:17.
KI SA I VEDIR: Labib pa ansenny nou pour ay bann dimoun sorti dan lezot ras, nasyonalite oubyen bann omoseksyel. O kontrer, i ankouraz nou pour annan respe pour tou dimoun malgre zot ras, nasyonalite e si zot ris oubyen pov. (Akt 10:34) Menm si nou pa dakor avek sa ki lezot i krwar oubyen avek lafason ki zot azir, kantmenm sa nou bezwen tret zot avek labonte ek respe.—Matye 7:12.
BANN KONSEY LABIB I KAPAB ED NOU: Daniel ti ganny ansennyen pour vwar dimoun sorti Lazi konman en menas pour son pei. I ti ay tou dimoun ki ti sorti Lazi e souvandfwa i ti maltret zot dan piblik. Daniel i dir: “Mon ti krwar ki mon ti pe siport mon pei. Mon pa ti ni menm mazinen si lafason ki mon ti pe azir ti mal.”
Avek letan, Daniel ti aprann sa ki Labib i dir. Daniel i dir: “Mon ti bezwen konpletman sanz mon fason panse. Mon ti bezwen vwar dimoun parey Bondye i vwar zot e ki nou tou nou parey malgre nenport landrwa kot nou sorti.” Daniel i dekri lafason ki i santi konmela ler i zwenn dimoun. I dir: “I pa enportan pour mwan kote zot sorti. Aprezan mon kontan tou sort kalite dimoun e mon annan bann zanmi pros partou dan lemonn.”
Pour plis lenformasyon, lir Awake! No. 3 2020, avek tit “Is There a Cure for Prejudice?” lo jw.org.
3. Larzan
Bokou dimoun i esey vin ris akoz zot anvi ere e annan en pli bon lavenir.
LABIB I DIR: “Lasazes i en proteksyon zis parey larzan i en proteksyon, me lavantaz ki en dimoun i gannyen ler i annan konnesans i ki lasazes i protez son lavi.”—Eklezyast 7:12.
KI SA I VEDIR: Nou bezwen larzan me larzan i pa en garanti ki nou pou ere ouswa annan en meyer lavenir. (Proverb 18:11; 23:4, 5) Par kont, vre lazwa ek en meyer lavenir i depan lo aplik lasazes sorti kot Bondye parey i ganny trouve dan Labib.—1 Timote 6:17-19.
BANN KONSEY LABIB I KAPAB ED NOU: Cardo, en msye ki sorti Lendonezi ti konsantre lo ganny plis larzan. I dir: “Mon ti annan tou keksoz ki laplipar dimoun i anvi. Mon ti kapab vwayaze e aste bann keksoz ser, bann loto ek bann lakaz.” Me son larzan pa ti al pour bokou letan. Cardo i dir: “En dimoun ti trik mwan e pran tou sa larzan ki mon ti’n travay vreman dir pour gannyen. Pour plizyer lannen mon ti’n travay dir pour mwan vin ris me apre mon ti dezapwente akoz mon ti napa nanryen e mon ti santi ki mon pa vo nanryen.”
Cardo ti konmans aplik bann konsey Labib konsernan larzan. I ti nepli gat tou son lenerzi pour akimil larises me i ti swazir pour viv en lavi senp. I dir: “Aprezan, mon santi ki mon annan sa vre larises akoz mon annan en bon relasyon avek Bondye. Mon kapab dormi byen aswar e mon vreman ere.”
Pour plis lenformasyon lo pwennvi Labib konsernan larzan, lir sa lartik “Eski ledikasyon ek larzan i en garanti pour en meyer lavenir?” ki dan Latour Veyer No. 3 2021, lo jw.org.
4. Sèks
Dimoun i annan diferan lopinyon konsernan bann konportman seksyel ki akseptab.
LABIB I DIR: “Rezet imoralite seksyel. Sakenn parmi zot i devret konnen ki mannyer pour kontrol son prop lekor dan en fason sen e avek respe. Zot pa devret fer parey dimoun lezot nasyon ki pa konn Bondye, ki pa zanmen satisfe avek zot bann dezir seksyel san kontrol.”—1 Tesalonisyen 4:3-5.
KI SA I VEDIR: Labib in met bann limit lo lafason ki nou devret eksprim nou dezir seksyel. Sa term “imoralite seksyel” i enkli adilter, prostitisyon, relasyon seksyel ant bann dimoun ki pa’n marye, omoseksyalite ek sèks avek zannimo. (1 Korentyen 6:9, 10) Relasyon seksyel i en kado sorti kot Bondye e sa kado i zis pour en msye ek en madanm ki’n marye avek kanmarad.—Proverb 5:18, 19.
BANN KONSEY LABIB I KAPAB ED NOU: En madanm ki apel Kylie e ki reste Lostrali i dir: “Konman en selibater, mon ti krwar ki si mon fer sèks, dimoun ti pou kontan mwan e mon ti pou an sekirite. Me keksoz ti diferan. Mon pa ti santi mwan an sekirite e mon ti sagren.”
Pli tar, Kylie ti aprann e aplik sa ki Labib i dir lo sèks. I dir: “Mon kapab vwar ki bann standar Bondye i la pour protez nou kont douler ek sagrinasyon. Aprezan, mon santi ki dimoun i kontan mwan e mon santi mwan an sekirite akoz mon fer keksoz parey Zeova i anvi nou fer. Ler mon’n aplik konsey Labib, sa in anpes mwan pas dan en kantite problenm!”
Pour plis lenformasyon, lir sa lartik “Ki Labib i dir lo de dimoun ki viv ansanm san marye?” lo jw.org.
Nou Kreater i ed nou pour konnen kwa ki byen e kwa ki mal. Menm si i pa toultan fasil pour obei sa ki i dir, i vo lapenn fer zefor. Nou kapab annan konfyans ki sa pou toultan fer nou ere.
