Parfwa nou krwar ki nou pa kapab fer nanryen ler en zanmi pe soufer avek problenm mantal. Me nou kapab montre nou zanmi ki nou anvi ed li ler i pe fer fas avek en problenm lasante mantal ki pe fatig li. Ki mannyer?

“Pare pour ekoute.”​—ZAK 1:19.

Ler ou zanmi i anvi koze e ou pran letan pour ekout li, sa i en pli bon fason pour ed li. Ou pa bezwen reponn tou sa ki i dir. Fer li konnen ki ou pe ekout li e ki ou enterese avek li. Esey konpran ki mannyer i pe santi e pa ziz li oubyen kritik li. Mazinen ki i kapab dir keksoz ki pli tar i regrete.​—Zob 6:2, 3.

“Koz dan en fason ki pou konsol bann ki dan depresyon.”​—1 TESALONISYEN 5:14.

I kapab ki ou zanmi i enkyet e i pe lalit avek bann santiman ki fer li krwar i pa vo nanryen. Me ler ou reasir li ki ou enterese avek li, ou pou kapab rekonfort li e ankouraz li menm si ou pa konn egzakteman ki pour dir.

“En vre zanmi i toultan demontre lanmour.”​—PROVERB 17:17.

Ofer pour donn li led pratik. Olye krwar ou konnen ki pour fer pour ed li, demann li ki i ti a kontan ou fer. Si i difisil pour ou zanmi dir ou ki i anvi fer, esey demann li ki i ti a kontan zot fer ansanm, parey si i ti a kontan fer en pti pronmnad oubyen ou kapab ed li fer  son konmisyon, netway lakaz ouswa fer lezot keksoz.​—Galat 6:2.

“Annan pasyans.”​—1 TESALONISYEN 5:14.

Petet i pa toultan ki ou zanmi i anvi koze. Fer li konnen ki ou pou la pour ekout li ler i santi ki i anvi koze. I posib ki akoz son maladi, ou zanmi i kapab dir oubyen fer bann keksoz ki kapab bles ou santiman. I kapab kennsel bann plan ki i ti annan avek ou e vin ankoler. Annan pasyans e konpran li anmezir ki ou ofer pour ed li.​—Proverb 18:24.

“Mon ti fer sir ki mon en zanmi ki i toultan kapab koz avek. Menm si mon ti napa okenn solisyon pour son problenm, mon ti toultan esey ekout sa ki i ti annan pour dir. Parfwa, i ti zis bezwen en dimoun pour ekout li e apre i ti santi li byen.”​—Farrah, a ki son zanmi pe soufer avek en maladi ki apel eating and anxiety disorders ek clinical depression.

“Enn mon zanmi ti vreman kontan mwan e i ti zantiy avek mwan. I ti envit mwan kot li pour pran en bon repa. Dan sa bon latmosfer, mon ti kapab koz lo mon bann santiman. Sa ti vreman ankouraz mwan!”​—Ha-eun, ki pe soufer avek clinical depression.

“Pasyans i vreman enportan. Ler mon madanm i fer en keksoz ki ofans mwan, mon konnen ki i pa pe fer sa akoz i anvi me akoz son maladi. Sa ti ed mwan pour pa ankoler e konpran son sityasyon.”​—Jacob, ki son madanm pe soufer avek clinical depression.

“Mon madanm ti siport mwan e rekonfort mwan. Ler mon ti vreman enkyet i pa ti zanmen fors mwan pour fer okenn keksoz ki mon pa anvi fer, ki vedir menm si parfwa i ti anvi fer serten keksoz, i pa ti fer. Mon madanm i vreman spesyal pour mwan akoz i zenere e i pa mazin zis son lekor.”​—Enrico, ki pe soufer avek anxiety disorder.