LESON 2
Lekel sa vre Bondye?
1. Akoz nou devret ador Bondye?
Sa vre Bondye in kree tou keksoz. I napa en konmansman e i pou napa en lafen. (Psonm 90:2) Sa bon nouvel dan Labib i sorti kot li. (1 Timote 1:11) Vi ki Bondye in donn nou lavi, zis li ki nou devret adore.—Lir Revelasyon 4:11.
2. Ki mannyer Bondye i ete?
Personn pa’n deza vwar Bondye akoz i en Lespri envizib, setadir, i pli siperyer e i napa en lekor fizik parey bann imen ki pe viv lo later. (Zan 1:18; 4:24) Toudmenm, atraver bann keksoz ki i’n fer, nou kapab konn personnalite Bondye. Par egzanp, tou bann fri ek fler i montre ki i saz e kontan nou. Grander liniver i montre ki i pwisan.—Lir Romen 1:20.
Nou kapab aprann plis ankor lo personnalite Bondye ler nou lir Labib. Labib i dir nou sa ki Bondye i kontan e pa kontan, lafason ki i azir e reazir anver dimoun dan diferan sityasyon.—Lir Psonm 103:7-10.
3. Eski Bondye i annan en non?
Zezi ti dir: “Nou Papa ki dan lesyel, ki ou non i ganny sanktifye.” (Matye 6:9) Menm si Bondye i annan plizyer tit, i annan zis en sel non. Sak langaz i annan son fason pronons sa non. An Kreol i “Zeova.” Me serten dimoun i servi “Yahweh.”—Lir Psonm 83:18, NWT.
Dan bokou Labib, non Bondye in ganny tire e ranplase par bann tit parey Senyer oubyen Bondye. Me ler Labib ti ganny ekrir, non Bondye ti aparet apepre 7,000 fwa. Letan Zezi ti ansenny bann dimoun lo Bondye, i ti fer zot konn son non.—Lir Zan 17:26.
Get sa video Eski Bondye i annan en non?
4. Eski Zeova i enterese avek nou?
Parey sa bon papa, Bondye pe pran aksyon pour nou byennet eternel
Lefet ki i annan sitan kantite soufrans dan lemonn, eski sa i vedir ki Bondye pa enterese avek nou? Serten dimoun i dir ki Bondye i fer nou soufer pour teste nou, me sa i pa vre.—Lir Zak 1:13.
Bondye in donn nou sa liberte pour swazir. Eski nou kontan sa privilez lefet ki nou lib pour swazir pour servi Bondye? (Zozye 24:15) Me bokou i swazir pour fer sa ki mal, sanmenm sa soufrans i partou kote. Zeova i dan lapenn kan i vwar tou sa bann lenzistis.—Lir Zenez 6:5, 6, NWT.
Zeova i en Bondye ki enterese avek nou. I anvi ki nou lavi i gou. Byento i pou retir soufrans ek tou sa bann ki fer ditor lezot. Anfet, i annan en bon rezon akoz i pe les soufrans arive pour en serten letan. Dan leson 8, nou pou aprann akoz.—Lir 2 Pyer 2:9; 3:7, 13.
5. Ki mannyer nou kapab vin pli pros avek Bondye?
Zeova i envit nou pour vin pros avek li atraver lapriyer. I enterese avek nou tou endividyelman. (Psonm 65:2; 145:18) I pare pour pardonnen. I vwar nou zefor ki nou pe fer pour fer li plezir, menm si parfwa nou fer fot. Alor, menm si nou enparfe, nou kapab annan en relasyon pros avek Bondye.—Lir Psonm 103:12-14; Zak 4:8.
Vi ki Zeova in donn nou lavi, nou devret kontan li plis ki nenport ki. (Mark 12:30) Ou pou vin pli pros avek li anmezir ou eksprim ou lanmour pour li. Ou kapab fer sa ler ou aprann plis lo li e ou fer sa ki i demande.—Lir 1 Timote 2:4; 1 Zan 5:3.
