Dili nako mabasol ang mga igsoon nga nagduhaduha kon makalahutay ba ko sa pagpayunir. Dili man god ko dasig. Dili man gani ko ganahang mosangyaw, ug mag-ampo pa gyod ko nga unta moulan pagka-Dominggo aron walay sangyaw. Kon mosangyaw man ugaling ko, igo ra kong manghatag ug mga magasin. Wala gyod ko makasulay nga mogamit ug Bibliya sa sangyaw. Suholan pa gani ko ni Mama aron mohatag lang ko sa akong bahin sa pagbasag Bibliya sa tigom. Di ko ganahang magtuon, ug wala pod koy espirituwal nga mga tumong.

 Diha toy distritong asembliya (gitawag na karon ug rehiyonal nga kombensiyon) sa Cardiff, Wales. Mao to ang nakapausab sa akong kinabuhi. Dihay mamumulong nga nagsuknag mga pangutana nga nakapahunahuna gyod nako. Miingon siya, “Bawtismado ba ka?” Nakaingon pod ko sa akong hunahuna, ‘Oo.’ “Misaad ba ka nga imong alagaron si Jehova sa tibuok nimong kasingkasing, kalag, hunahuna, ug kusog?” ‘Oo.’ “Naa ba kay sakit o responsibilidad sa pamilya nga makababag nimo sa pagpayunir?” ‘Wala.’ “Naa pa bay laing rason nga dili ka makapayunir?” ‘Wala.’ “Kon ang imong tubag sa kataposang pangutana maoy wala, nganong wala man ka magpayunir?”

 Nakaamgo gyod ko adto. Nakaingon ko: ‘Gisayangan ra man nako ang akong kinabuhi. Wala nako tumana ang akong panaad kang Jehova ug wala nako ihatag niya ang akong kinamaayohan.’ Nakahunahuna ko nga aron tumanon ni Jehova ang iyang mga saad nako, kinahanglang tumanon pod nako ang akong saad niya. Maong pagka-Oktubre 1956, nag-vacation pioneer ko, nga gitawag na karon ug oksilyare payunir.

 Pagkasunod tuig, nagregular payunir ko ug mibalhin ko sa kongregasyon nga 19 ray magmamantala. Sukad sa pagbalhin nako didto, naa gyod koy bahin kada semana. Sa tabang sa mapailobong mga brader, miuswag ang akong mga pakigpulong ug ang akong paagi sa paghatag niini. Paglabayg duha ka tuig, niadtong 1959, naasayn ko ingong espesyal payunir sa Aberdeen, sa amihanang bahin sa Scotland. Human sa pipila ka bulan, giimbitar ko nga mag-alagad sa London Bethel. Nakapribilehiyo ko nga magtrabaho sa printery sulod sa pito ka tuig nga naa ko didto.

 Ganahan ko sa Bethel, pero karon gibati nako nga morag ganahan kong mag-alagad sa field. Batan-on pa ko, baskog, ug andam magpagamit kang Jehova bisag asa. Maong pagka-Abril 1965, miaplay ko para sa Gilead aron mabansay ingong misyonaryo.

 Nianang tuiga, nakadesisyon mi sa akong roommate nga moadto sa Berlin, Germany, aron motambong ug kombensiyon ug motan-aw sa Berlin Wall nga pipila ka tuig pang natukod.

 Panahon sa kombensiyon, nakapribilehiyo mi nga makaapil sa pagsangyaw ug nakauban nako si Susanne Bandrock. Naminyo mi pagka-1966, ug duha ka tuig sa ulahi, giimbitar mi nga moeskuwela sa ika-47 nga klase sa Gilead. Panalangin gyod kaayo to! Nag-enjoy mi sa klase ug paspas ra kaayong nahuman ang lima ka bulan nga pag-eskuwela. Giasayn mi sa Zaire, nga karon gitawag nag Democratic Republic of the Congo. Wa gyod mi magdahom adto! Gamay ra mig nahibaloan bahin aning nasora. Nagduhaduha mi, pero gidawat namo ang asaynment ug gisalig namo ang tanan kang Jehova.

 Daghang oras pod ming nagbalhinbalhin ug mga airport ug eroplano hangtod nga nakaabot ra gyod mi sa lungsod sa Kolwezi nga daghag minahan. Natingala mi kon nganong walay mga igsoon nga misugat namo. Naulahi diayg duha ka adlaw ang telegrama nga magpahibalo sa mga igsoon bahin sa among pag-abot. Giduol mi sa usa ka opisyal sa airport ug naa siyay giingon. Pero wala mi makasabot kay French man ang iyang pinulongan. Giingnan mi sa babaye nga naa sa among atubangan nga ang giingon sa opisyal maoy, “Gidakop mo namo.”

 Gisakay mi sa opisyal sa karaan nga sports car, nga naa sa likod ang makina. Dili to iyang sakyanan; gipugos lang niya ang tag-iya nga manakay ming tanan didto. Pero kay duha ka tawo ra man untay maigo didto, naghuot ming upat sa sakyanan. Kataw-anan seguro kaayo ming tan-awon kay libaong kaayo ang dalan nga among giagian, maong nag-untol-untol mi ug nag-abli-abli ang hood sa sakyanan nga mora bag isda nga nag-usap-usap sa among mga bagahe.

 Wala mi kahibalo kon asa ang puy-anan sa mga misyonaryo. Pero nakatultol ang opisyal maong iya ming gidala didto. Walay tawo pag-abot namo ug gikandadohan ang gate. Nanglakaw man god ang tanang misyonaryo kay mitambong silag internasyonal nga kombensiyon ug nagbakasyon. Nabulad mi sa init ug wala mi kahibalo kon unsay mahitabo namo. Pero maayo na lang kay naay miabot nga brader. Gipahiyoman mi niya maong okey na mi. Kaila diay sila sa opisyal, nga gusto lang makakuhag kuwarta namo. Human siya estoryaha sa brader, mibiya na ang opisyal ug nakasulod ra gyod mi sa among puy-anan.

 Malipayon ug mahigugmaon kaayo ang mga igsoon didto bisag dili lalim ang ilang naagian. Sa milabayng napulo ka tuig, gubot kaayo ang nasod tungod sa politika. Dayon pagka-1971, ang mga Saksi ni Jehova wala na ilha sa gobyerno ingong legal nga relihiyon. Naghunahuna mi kon makaya ba kaha to namo.

 Pero dili to panahon sa pag-atras. Daghang igsoon ang wala mokompromiso sa ilang neyutralidad bisan sa grabeng presyur nga magdala ug card ug magsul-ob ug pin sa politikal nga partido. Kon dili sila magsul-ob ug pin, dili sila makadawat sa mga benepisyo sa gobyerno ug dili pod sila trataron ug maayo sa mga sundalo ug polis. Ang mga igsoon nawad-ag trabaho ug ang mga bata gipapahawa sa eskuwelahan. Gatosan ka mga brader ang napriso. Lisod gyod kaayo to. Pero ang mga Saksi nagpadayon ug maisogong nagsangyaw sa maayong balita.

 Adtong mga tuiga, nag-alagad mi ni Susanne sa sirkito ug distritong buluhaton, maong magsige mig biyahe sa bukid ug mga probinsiya. Dili gyod sayon kon maasayn mi sa mga baryo kay lahi kaayo ni sa among naandan. Gagmay kaayo ang mga payag maong dili mi katarong ug higda. Magsige pa gyod kog ka pakong kay mas taas pa ko kay sa pultahan. Ang among tubig nga pangkaligo kinuha gikan sa mga sapa ug suba. Sa magabii, kandila ra tawon among suga samtang magbasa. Uling ra among gamit sa pagluto. Pero dili gyod ni ikatingala kay mao gyod ni ang tinuod nga kinabuhi sa misyonaryo. Mao ni ang among gipili, ug wala mi magmahay kay naeksperyensiyahan namo ang eksayting kaayo nga paagi sa pag-alagad kang Jehova.

 Ang pagpuyo uban sa mga igsoon nagtudlo namo nga pabilhan bisan ang simple kaayong mga butang: pagkaon, tubig, sinina, ug puy-anan. (1 Timoteo 6:8) Ang uban bonus na lang. Dili gyod to namo malimtan nga leksiyon.

 Bisag ang among naeksperyensiyahan dili parehas ka lisod sa naagian ni apostol Pablo, usahay bation namo nga nasulayan gyod ang among pagtuo ug mga motibo. Makaagi mig mga dalan nga puwerteng batia o halos dili na maagian. Luoy kaayo among sakyanan kay batoon kaayo ang mga dalan ug usahay malubong pa gani ni sa yuta ug balas. Kon ting-ulan, malubong nig maayo sa lapok. Dihay higayon nga nagbiyahe mi tibuok adlaw, pero 70 kilometros (43 ka milya) lang ang among nabiyahe. Ug paita lagi kay 12 ka beses gyong nalubong ang among sakyanan!

 Pero tungod ani nga mga kalisdanan, mas nasuod mi kang Jehova. Nakat-onan namo nga sa tabang ni Jehova, makalahutay mi ug makapabiling malipayon bisag morag wala mi mahimo aron mausab ang situwasyon. Si Susanne wala maanad ug ingon ani nga kahimtang, pero wala gyod siya moreklamo sa tanan namong naagian. Hinuon, para namo, kadtong tanan makapalipay nga eksperyensiya ug daghan gyod mig nakat-onan.

 Sa among asaynment sa Zaire, kadaghan kong gidakop. Dihay higayon nga gipasanginlan ko nga ilegal kuno kong namalit ug namaligyag mga diamante. Siyempre nahadlok gyod mi. Pero nasayod mi nga kon kabubut-on ni Jehova nga molampos mi sa among asaynment, iya gyod ming tabangan. Ug iya gyod nang gihimo!

 Pagka-1981, giimbitar mi nga mag-alagad sa sangang buhatan sa Kinshasa. Usa ka tuig una niana, ang atong buluhaton gitugotan nag balik sa gobyerno. Ang mga igsoon nakapalit ug yuta aron tukoran sa bag-o ug mas dako nga pasilidad sa sangang buhatan. Pero wa damha, pagka-Marso 1986, ang presidente sa nasod nagmando nga idili ang buluhaton sa mga Saksi ni Jehova. Nahunong ang pagpanukod ug wa madugay, kadaghanan sa mga misyonaryo mibiya sa nasod.

 Nagpabilin pa mi didto kadali. Naningkamot mi nga makapadayon sa pagsangyaw bisag nahibalo mi nga gipanid-an mi sa mga opisyales. Bisag nag-amping mi, nadakpan gihapon ko samtang nagdumalag pagtuon sa Bibliya. Gibutang ko sa dako nga prisohan nga punog mga piniriso. Grabe ka init, baho, ngitngit, ug alimuot kaayo didto. Gamay ra gyong kahayag ug hangin ang makalusot sa bangag nga naa sa ibabawng bahin sa bungbong. Dihay higayon nga gidala ko sa ubang piniriso ngadto sa ilang lider-lider. Iya kong giingnan, “Kantaha ang among nasodnong awit!” Miingon ko, “Di man ko kahibalo ana.” Sila miingon, “Kana na lang inyong nasodnong awit!” Miingon pod ko, “Di pod ko kahibalo ana.” Iya dayon kong gipabarog nga nag-atubang sa bungbong sulod sa mga 45 minutos. Sa ngadtongadto, ang mga igsoon nakig-estorya sa mga opisyales ug gibuhian ra ko nila.

 Nagkagrabe ang kahimtang sa nasod ug wa madugay, giasayn mi sa Zambia. Pagtabok namo sa border, nahupayan gyod mi pero naguol pod gamay. Nahinumdoman namo ang 18 ka tuig nga pag-alagad namo didto uban ang matinumanong mga misyonaryo ug mga igsoon. Bisag usahay lisod kaayo among kahimtang, naa gyod ang panalangin ni Jehova. Wala gyod mi niya biyai. Nakakat-on mig Swahili ug French, ug si Susanne medyo makamao na pod ug Lingala. Nagmalamposon pod ang among ministeryo ug nakatabang mi sa kapig 130 ka tawo nga mabawtismohan. Nalipay pod kaayo mi nga nakatabang mi sa pagpauswag sa buluhaton sa Gingharian didto. Ug grabe gyod ang pag-uswag didto! Pagka-1993, gibasura sa Korte Suprema ang pagdili sa atong buluhaton niadtong 1986. Karon naa nay kapig 240,000 ka magmamantala sa Congo.

 Samtang naa mi sa Zambia, nakita namo ang pagtukod sa bag-ong sangang buhatan ug uban pang pasilidad. Karon, ang gidaghanon sa magmamantala dinhi kapin nag tulo ka pilo kon ikompara niadtong miabot mi dinhi pagka-1987.

 Busa unsa nay nahitabo sa batan-ong brader nga morag dili kaabot ug usa ka bulan sa bug-os panahong pag-alagad? Sa tabang ni Jehova ug sa akong pinalanggang asawa nga si Susanne, nakaabot na kog 65 ka tuig sa bug-os panahong pag-alagad. Natilawan ug nakita gyod nako nga si Jehova maayo.—Salmo 34:8.

 Ordinaryong mga tawo ra mi ug naningkamot lang mi nga tumanon ang among panaad kang Jehova. Nagsalig mi nga padayon mi niyang tabangan nga dili gyod “moatras,” kondili magbaton ug pagtuo nga “makaluwas sa atong kinabuhi.”—Hebreohanon 10:39.

 Tan-awa ang video nga Dayrell and Susanne Sharp: We Promised to Serve Jehovah Whole-Souled.