MELEP ASU NDA BÔT | MI YEME YALE BONE BENAN
Amu jé nlañan ô ne mfi asu bongô ?—Éfas 1: e lañe kalate nge ke e yene film ?
Éyoñe bone benane ba kômbô vôman, jé ba nye’e be bo’ok: ye e yene bevidéo nge ke e lañ? Jé be wô’ô top : ye téléfône ye kalate ?
Den a ntoo abui mimbu, abui bôte da nye’e ki fe é lañe’e amu da yene télé, a amu da yene abui bevidéo afe nkol. Ntili bekalate Jane Healy, e kalate wé a ne nlô ajô na Endangered Minds (Boo bongô a tele meve’ele été) a nga kui mbu 1990, a nga tili na : “Nlañane bekalate ô ne ve ane wo jañ.”
Éyoñ a nga jô bifia bite, bôte béziñe be nga simesane na a bete ôdo’é. Ve den, mesi bôte ba belane internet abui, beyeme mame be nga yene na abui bisoé da beta ke fe nye’e é lañe’e bekalate.
Ayé’é di, bia zu yen,
Amu jé é ne mfi na bongô be lañ ?
Nlañane wo volô na môt a bo ve ane a lôô mam a yene ki a mis. Éve’an é ne na, éyoñe môt a lañe nkañete éziñ, a bo ve ane a wô’ô tyiñe bôte ba kobô nkañete ôte. A bo ve ane a lôô bôte bete a vôme be ne. Môt a tili a kate fo’o ve mame méziñ, ve môt a lañ émien a yiane simesane mame mevok.
Mbiaé éziñe ba loone na Laura a jô na: “Éyoñe bia yene film nge ke vidéo éziñ, mame bia yen été me ne mame môte mfe a nga simesan. A ne fo’o mbamba jam. Ve nlañane wo soo beta jame mfe: bifia bi môte mfe bia bo vevee ôsimesane wongan.”
Nlañane wo volô mongô na a bi mbamba mefulu. Éyoñe bongô ba lañ, nalé a volô be na be yeme mame be ne bo éyoñe ba tôbane minju’u miziñ, a avale be ne kôme minju’u mite. Ba yé’é fe na be yeme bem ôsimesane mame ba bo. A ba kui na be bi mbamba mefulu aval ane ôjibi, na be yeme jôé bebien, a na be yeme tebe été bôte bevok.
Ye nlañan ô ne fo’o kôme volô mongô na a yeme tebe été bôte bevok ? Ôwé! Beyeme mame béziñe ba jô na éyoñe bongô ba lañ ôte’etek be kôme jeñe na be wô’ô nkañete ba lañ, nalé a volô be na be yem avale bôte bese ya nkañete ôte ba wô’ôtan. A nalé a ne volô be na be yeme tebe été bôte ba be be ba nyiñe môs ôse.
Nlañane wo volô mongô na a yeme fas. Bôte ba jeñe na be kôme wô’ô jame ba lañ, ba lañe ki ane ba ke mbil. Asu na be kôme wô’ô mame môte a nga tili kalate a kômbô jô, é wô’ô kui na be beta lañe bevôme be maneya lañ. Éyoñe ba bo nalé, ba kui na be ji’a simesane mame ba te lañ, a nyoñe mbamba miñye’elan. (1 Timothée 4:15).
Ésa éziñe ba loone na Joseph a jô na : “Éyoñe bia lañ, bi ne ji’a fase jôme ba kômbô jô, bi ne ji’a yen nja ô ne zañe mame bia lañ a mame bia yem, bi ne fe nyoñe besikôlô béziñ. Befilm a bevidéo ba volô ki bia éyoñ ése na bi tu’a fas.”
Jame bia yiane ba’ale : Ja’a bevidéo a téléfône nge ke beminsini be ne volô bongô, ve be ne sube jôm é ne angôndô ya mfi nge ba nyoñe ki éyoñe ya lañ.
Aval avé bi ne volô bongô na be lañ?
Ji’a taté : Chloé, nyia bobe fame bebaé a jô na: “Bi nga taté na bia ye’ele bone bangan éyoñe be mbe be ngenan abum été, a bi nga ke ôsu a bo de éyoñe be bialéya. Bia wôk angôndô ya mvaé amu bi nji bili atek. Éyoñe di ba lañe to’o éyoñe ba bo bivôé, amu a ntoo be fulu.”
Éfuse Bible : “Aso mongô wo yeme mimfufube mintilane.” (2 Timothée 3:15).
Bo’o na nda jôé é bo mbamba vôme ya lañ. Bo’o na nda jôé é bo vôme ba nye’e be lañe’e, bôône bekalate bevôme be ne tyi’ibi ya yen. Tamara, nyia bone benyin a ve melebe ma: “Jeñe’e bekalate mone wôé a ne nye’e a lañe’e a bôône be mfefel énoñe jé”
Éfuse Bible : “Ye’ele’e mongô zen a yiane ke, ja’an éyoñ a nto nnôm, a ye bo te kôlô je.” (Minkana 22:6).
Sé’é abim éyoñe mia belan internet. Ésa éziñ a too éyôlé na Daniel a lebe na, é ne mvo’é ya bo teke belane téléfône mame ngô’é méziñe nge yene télé. A jô na: “Bia lôte ngô’é évôvoé été teke télé, to’o éyoñe jia sondô. Bia nyoñ éyoñe ya lañe nsamba, nge ke môte ase étame mfa’a wé.”
Éfuse Bible : “Mi yemelane mame ma dañe mfi ” (Bephilippien 1:10).
Liti’i mbamba éve’ela. Karina, nyia bone be binga belal a jô na : “Éyoñe mia lañe bone benane minkañete, bo’ané de a meva’a mese a bo’ané na minkañete mite mi bo vevee ôsimesane wop. Nge mia nye’e mi lañe’e, bone benane be ne tôñ éve’ela jenan.”
Éfuse Bible : “ kele’e ôsu a yeme ngule jôé ése mfa’a ya nlañan e bôt été. ” (1 Timothée 4:13).
Sake bongô bese mbe ba ye nye’e be lañe’e. Ve mbamba bifia, bi ne volô be na be bi ngule ja sili be asu na be bo de. David, ésa bobe binga bebaé a ke ôsu a jô’ô na: “ Me mbe me lañe’e bekalate bengo bame ba lañ. Nalé a mbe a volô ma na me yeme mame ba nye’e, a me mbe me bili abui mame ya laan a be. Bi mbe bi bili mone ékôane belañe bekalate wongan. Angôndô ya mbamba jam! ”