Luc 12:1-59
-
Mvusu bepharisien (1-3)
-
E ko Zambe woñ, sa ke bôt (4-7)
-
E yemelan élat a Krist (8-12)
-
Éve’ela ya nkukume môt ô ne akut (13-21)
-
Te beta tyelané minleme yôp (22-34)
-
Mone mbame mintômba (32)
-
-
Taba’ané ntyel (35-40)
-
Mbamba ntebele nda a mbia ntebele nda (41-48)
-
Sa ke mvo’é, ve nkanda’ane mengam (49-53)
-
Mfi ya fase biyoñ (54-56)
-
E kôme mejô (57-59)
12 Éyoñ éte ébien, éyoñe nsamba bôt ô nga sulane betoyini betoyini aval é mbe na bôte be mbe be wulu’u ba bevo’o yôp, a nga taté jô beyé’é bé na: “Taba’ané mvusu bepharisien ntyel, nnye a ne fulu medu’an.
2 Ve teke jam éziñe ba te kôme solé da ye bo teke yené éngeñgeñ, a teke jam éziñ é ne nsolane bôte ba ye bo teke yem.
3 Nde jam ése mia jô dibi été, ba ye wô’ô de éfufup été, a jam ése mia kobô menyiñ e bitune bi nda bienan été, ba ye kañete de mendile menda yôp.
4 Nde fe, a bemvôé bam, ma jô mia na te kooné bôte ba wôé nyule woñ, ve mvuse ya valé be vo’o ki bo jam afe.
5 Ve Zambe a ne Nyu mia yiane ko woñ, amu a ne wôé mia a wua mia e Géhenne.* Nde nnye a ne Nyu mia yiane ko woñ.
6 Nga ba kuane bemvokuma betane tañe minsañe mi moné mibaé mi nji dañe dia?* Ve, teke wua ya été Zambe a vuan.*
7 Ve ja’a bisile bise bi ne mia nlô bi ne nlañan. Te mia ko woñ, mi ne dia a dañ abui bemvokuma.
8 “Ma jô mia na, môt ase a jô bôt été na a yeme ma, Mona môte fe a ye yeme nye mise beéngele be Zambe.
9 Ve môt a jô bôt été na a nji yeme ma, Mona môt a ye jô na a nji yeme nye mise beéngele be Zambe.
10 A nyu ase a jô Mona môte mbia éfia ba ye jamé nye, ve nyu a kobô mfufube nsisim ébiasé, ba ye ke jamé nye.
11 Éyoñe ba kee mia ôsu bikôane bi bôt* a betebe ôsu ya ngovina a bôte ba jôé, te kooné woñ avale mia ye kamane miabebien a jame mia ye jô,
12 amu mfufube nsisim a ye ye’ele mia awolo éte ébien, mame mia yiane jô.”
13 E teme na, môte ya nsamba bôt a nga jô nye na: “A Ñye’ele, jô’ôk mojañe na a kaban élik a ma.”
14 A nga jô nye na: “A môt, za a nga telé ma ntyi’i mejô zañe mia bebaé, nge nyu a zu kabe mia élik?”
15 Ane a nga jô be na: “Taba’ané ntyel, a sa’ale aval ôzañ akum ése, amu to’o éyoñe môt a bili abui akum, ényiñe jé é nji so biôm a bili.”
16 Ane a nga ve be éve’an a jô’ô na: “Si nkukume môt éziñ é nga ve abui bidi.
17 Nde a nga taté na a fase nleme wé été na, ‘Jé ma zu bo amu me bili ki fe vôme ya naane mefese mam?’
18 Nde a nga jô na, ‘Jame di nde ma ye bo: Ma ye tyame menda bidi mam a beta lôñe ma ma dañ anen, vôm ate ma ye kôane mefese mame mese a akume dam ése,
19 a ma ye jô mamiene na: “Ô naaneya mbamba be biôme ba ye yiane wo tañ abui mimbu, tame wo’on ô di a nyu a bu’uban ényiñ.”’
20 Ve Zambe a nga jô nye na, ‘Akute môt, alu di ébiene wo zu wu. Za a ye li’i biôme bise wo te naan?’
21 Jame di nde da kui môt a kôan akum asu dé émien, ve teke bo nkukume mise me Zambe.”
22 Nde a nga jô beyé’é bé na: “Amu nalé ma jô mia na, te beta tyelané minleme yôbe mfa’a ya binyiñe bienan, mfa’a ya jôme mia ye di, nge mfa’a ya menyule menan, mfa’a ya biyé mia ye jaé.
23 Amu ényiñ é ne dia abui a lôte bidi a nyul é ne dia abui a lôte biyé.
24 Fomba’ané bingbwañ: Bi ne te bé, nge kôane bidi, a bi nji bi vôme ba naane biôme mevale meval, nge vôme ba naane bidi, ve Zambe a ve bie jôme ya di. Nga mi ne dia abui a lôt anon?
25 Za ya be mia, a ne kô’ôlane melu me ényiñe mé ve mone jôm amu a tyelé nleme yôp?
26 Nde nge mi se ngule ya bo to’o ve mone jam ate, amu jé mia tyelé minleme yôp asu mame mevok?
27 Tama fombané ane meyañe* ma yaé: Me ne te loé nge tiñe biyé; ve ma jô mia na, to’o Salomon e duma dé ése, a nji jaé biyé a lôt ayañe da ya été.
28 Ve, nge Zambe a jalé bilo’o ya fé, mbie bite bi ne valé den, akiti be wua bie nduan, ngumane ki mia, ye a ye bo te jalé mia biyé a mia mi ne teke ngule mbunan!
29 Nde te beta tyelané minleme yôbe mfa’a ya jôme mia ye di a jôme mia ye nyu, a te tyelané minleme yôp a lôte nné;
30 amu biôme bite bise bi ne biôme meyoñe ya si nyu ma jeñ a ngul ése na me bi, ve Ésa wônan a yeme na mia yiane bi biôme bite.
31 Ve kelané ôsu a jeñ Éjôé jé a ba ye kô’ôlane mia biôme bite bise.
32 “Te ko woñ, a mone nsamba, amu Ésa wônan a yeneya mvaé ya ve mia Éjôé.
33 Ku’ané biôme mi bili, a bo mimveane ya mvam,* kômané mimfe’e mi moné mi ne te ndaman a naan akume denan e yôp été, vôme ñwuwup ô vo’o ki subu bebé a vôme si’ibem* é vo’o ki mane zu di de.
34 Amu vôm akume dôé é ne, nne fe nleme wôé wo ye bo wôé.
35 “Jaéané biyé bi mbo ésaé* a taba’ané nkômesan a ba’alané belambe benane be yôñôk.
36 Mia yiane bo ane bôte ba yange na masa wop a bulan élat aluk, asu ya na be yoé nye mbé nné ane a ye suan a nné ane a ye kute mbé.
37 Mevak a bebo bisaé bete, mbe bete éyoñe masa wop a suan a koone na ba mombô! Ma kate fo’o mia na, a ye jaé biyé bi mbo ésaé, a bo na be tabe si tebele a di, a tebe fe tetele na a saane be.
38 Mevak a be nge a suan ézezañe mewolo ébule ya mame ngô’é akui zañ alu,* nge ke na, ataté zañ alu akui mewolo melale ya melendé me tyé,* a koone be be too nkômesan!
39 Ve yemané na, nge mie ndaa, a nga yem awolo ñwuwube wo ye so, a nji ye kañese na ñwuwup ô zu bu’u nye nda.
40 Mia fe taba’ané nkômesan, amu Mona môt a ye so awolo mi nji buni na a ne so.”
41 Nde Pierre a nga sili na: “A Tate, ye wo te nyoñ éve’ane ji, fo’o ve asu dangan étam, nge ki asu bôte bese?”
42 Tate a nga yalane na: “Za fo’o a ne ntebele nda a ne mewôk a nyu a ne fek,* nnye masa wé a ye telé na a ba’ale bebo bisaé bé bese a ke ôsu a ve be ngabe bidi ja yiane be mbamba éyoñ?
43 Meva’a me bo’o be ôlo ôte, nge masa wé a zu koone nye a bo’o nalé!
44 Ma kate fo’o mia na a ye telé nye ntebele ya biôme bié bise.
45 Ve nge ôlo ôte wo jô nleme wé été na, ‘Masa wom a ye ke ji’a so,’ a taté na a bôme bebo bisaé befam a bebo bisaé be binga a di a nyu, a so’o fe meyok,
46 masa ôlo ôte a ye so môs a nji bunan, a awolo a nji yem, a ye fe bo na a wô’ô benya mintaé* a lôme nye nsamba bôte be ne bikotekot.
47 Mbo ésaé ate a nga yeme nkômbane masa wé, ve a nji be nkômesane ya bo wô nge bo jame masa wé a nga jô nye na a bo, ba ye bibi nye nkasa abui biyoñ.
48 Ve nyi a nji wô’ô mame masa a yi na a bo, a bo’o fe mame ma yian ébôm, ba ye ke yite nye abui biyoñ. Teke vaa nge beté, nyu ase be nga ve abui, ba ye sili nye abui a nyu be nga ve abui biôme na a ba’ale, ba ye sili nye a lôt abim ése be ne sili bôte bese.
49 “Me nga zu bo’é nduane si, nge é bo’obaneya, jé éfe me ne beta yi?
50 É ne été na, me bili nduane ma yiane dubane wô, a nleme wo ye ke bômbô ma si akekui éyoñe wo ye man.
51 Ye mia simesane na me nga zuu mvo’é si? Teké’é, ma kate mia na me nga zu bo na bôte be kandane mengame mengam.
52 Amu ataté éyoñe ji, nda é bili bôte betan, bôte bete ba ye wosane be be, belale ba ye wosane bebaé, a bebaé ba ye wosane belal.
53 Ba ye bo mengame mengam, ésa a ye wosane mona fam, mona fam a ye wosan ésa, nyia a ye wosane ngo jé, ngone minga ja ye wosane nyia, ntyi minga a ye wosane mbom, mbome wo ye wosane ntyi minga.”
54 Nde a nga jô fe minsamba mi bôte na: “Éyoñe mia yen évindi nkute mfa’a jôbe da tôô, mia jô tyi’ibi na, ‘Mveñe ja zu noñ,’ a mveñ é noñé.
55 A éyoñe mia yen évuñulu ja so mfa’a ya sud ja vuñ, mia jô na, ‘Ayôñe da ye bo,’ a nalé a boban.
56 A bôte medu’an, mia yeme yemelan avale yôp a si bi ne, ve amu jé mia kate yemelane jame da boban éyoñe ji?
57 Amu jé miabebiene mia kate fe yemelane jam é ne zôsô?
58 Éve’an é ne na, éyoñe môte mia nye mi bili mejô mia ke be ntyi’i mejô, nté mi ngenane zen, jika’a kôme me avôl avôl a nye, amu môt ate a za kele wo be ntyi’i mejô, ntyi’i mejô a za kele wo be mba’ale mimbôk, mba’ale mimbô’ô ki a za futi wo nda mimbôk.
59 Ma kate wo na, ba ye ke suu wo nté ô ngenane teke ya’ane tañ ése akekui mone nsañe moné wôé a dañe tyôtyoé.”*
Notes
^ Lañe’e Atinane bifia.
^ Nkobô Grec, “tañe beassarion bebaé.” Melu mete, assarion wua a mbe tañe ba ya’ane môt a te saé tañe minute 45.
^ Nge ke, “biasé.”
^ Be ne fe jô na, “ôsu besynagogue.”
^ Nge ke, “mesam.”
^ Nge ke, “ve minzôzoé biôm.” Lañe’e Atinane bifia.
^ Nge ke, “se’ebem.”
^ Nkobô Grec, “Tiñeta’ané bekandé mengeteñe menan.”
^ Nkobô Grec, “amombô baa.”
^ Nkobô Grec “amombô lale.”
^ Nkobô Grec, “ntyel.”
^ Nkobô Grec, “a ye tyi’i nye zañ.”
^ Nkobô Grec, “lepton a su’ulan.”
