Beromain 6:1-23
6 Nde, jé bia jô? Ye bia yiane ke ôsu a bo minsem asu na beta mvame Zambe a tu’a nen?
2 Teké’é fo’o! Amu bi ntoo bewu mfa’a ya nsem, aval avé bi ne beta ke ôsu a nyiñe nsem été?
3 Nge ke na, ye mi nji yeme na, bia bese bi nga duban e Krist été bi nga duban awu dé été?
4 Nde, bi nga jambe a nye a zene ya nduane wongan awu dé été asu na, fo’o ve avale Krist a nga wômô miñwuan a zene ya duma Ésa wongan, bia fe bia ye nyiñe mfefé ényiñ.
5 Nge bi ntoo jôme jia a nye mfa’a ya éfunane ya awu dé, bia ye fe bo jôme jia a nye mfa’a ya éfunane ya ñwômane miñwuane wé.
6 Amu bia yeme na, nnôma môte wongan a nga tyeléban élé a nye na nyule nseme jangan é bo teke ngul, ndembene bia ye ke beta ke ôsu a bo alo ya nsem.
7 Amu môt a wuya a ya’aneya* mvôla ya nseme wé.
8 Nde fe, nge bi nga wu a Krist, bi too fe ndi na bia ye fe nyiñ a nye.
9 Amu bia yem éyoñe ji na, Krist a wômôya a a ye ke beta wu; awu é nji beta jôé nye.
10 Amu awu a nga wu é mbe na a wôé* nsem, éyoñe jia ya biyoñe bise, ve ényiñ a nyiñ, a nyiñ amu Zambe.
11 Avale da fe, nyoñané miabebien ane bôte be wuya mfa’a ya nsem, ve ane ba ba nyiñ amu Zambe, a zene ya be Yésus Krist.
12 Ajô te, te mia kañese na nsem ô ke ôsu a jôé biwuwua menyule menan, ane njô bôt asu na mi bo minkômbane mié.
13 Te beta veané nseme menyule* menane na me bo bikpwelé ya ékotekot, ve va’ané miabebiene be Zambe, ane ba be nga wu a éyoñe ji be nga beta nyiñ. Va’ané fe Zambe menyule* menan, ane bikpwelé ya zôsô.
14 Ve nsem ô nji yiane jôé mia, amu mi nji bo metiñe si, ve mi ne beta mvame Zambe si.
15 Nde ñye’elan ôvé bia nyoñ? Ye bia yiane ke ôsu a bo nsem amu bi nji bo Metiñe me Moïse si, ve beta mvame Zambe si? Teké’é fo’o!
16 Ye mi nji yeme na, nge mia bo miabebien alo ya môte mia bo mewôk, mi ne alo dé amu mia bo nye mewôk? Mi ne alo ya nyu mia bo mewôk, asu nseme wo kee mia awu, nge mewô’ô ma kee mia zôsô.
17 Ve bia ve Zambe akiba na, akusa bo mi mbe alo ya nsem, mi nga bo mewô’ô ma so nleme wônan été a tôñe miñye’elane Zambe a nga ve mia.
18 Ôwé, amu mi kôtébaneya nsem, mi ntoo alo ya zôsô.
19 Ma belane bifia bone be bôte ba yem, amu ate’e ya menyule minsône menan; amu, fo’o ve avale mi nga ve menyule menan alo ya nyé mboone mam a ébiasé, mfa’a ya bo mbia be mam, avale te nde fe, va’ané menyule menane mfa’a ya bo mame me ne étyi.
20 Amu éyoñe mi mbe alo ya nsem, mi mbe fili mfa’a ya zôsô.
21 Nde, mame mevé mi mbe mi bo’ok éyoñ éte? Mame ma bo na mi wôk ôson éyoñe ji. Amu asu’ulane ya mame mete é ne awu.
22 Ve éyoñe ji, amu mi kôtébaneya nsem a mi ntoo alo Zambe, mi nga bo mbamba be mam, a asu’ulane ya été é ne ényiñe ya nnôm éto.
23 Amu ma’ane ya nseme me ne awu, ve mveane Zambe a ve ô ne ényiñe ya nnôm éto, a zene ya be Yésus Krist, Tate wongan.
Notes
^ Nge ke, “kôtébaneya; jamébaneya.”
^ Nalé a tinane na e vaa.
^ Nkobô Grec, “bibu’a ya menyul.”
^ Nkobô Grec, “bibu’a ya menyul.”
