Beromain 5:1-21
5 Ajô te, amu bi nga bi mekabe na bi ne zôsô amu mbunan, bi tame ñhe bu’ubane mvo’é* a Zambe a zene ya be Tate wongane Yésus Krist,
2 nde amu mbunane bi bili be nye, zen é nga yombô bia, ndembene bi ne bi beta mvam a so be Zambe, a éyoñe ji bi bili beta mvame wé; nde ntame va’ané* nté bia yange na Zambe a ve bia duma dé.
3 Sa ke ve amu nalé, ve mva’ané* fe éyoñe bi ne minjuk été, amu bia yeme na minju’u mia volô bia na bi bo mbane ya jibi;
4 a mbane ya jibi ki, wo volô na bi bo avale môte Zambe a yene mvaé, avale môte Zambe a yene mvaé ki, da volô bia na bi bi ndi nlem,
5 a ndi nlem é ne teke samele; amu nye’ane Zambe ô nga sôébane fo’o bia minlem été a zene ya mfufube nsisim, nnye ate a nga vebane be bia.
6 Amu nté bi mbe bi ngenane bebo minsem, Krist a nga zu wu éyoñe ja yian asu bôte ba biasé Zambe.
7 Amu é ne nya ayaé na môt a kañese wu asu zôsôa môt, éko éziñ a ne kañese wu asu mbamba môt.
8 Ve Zambe a nga liti bia nye’ane wé avale di, éyoñe bi mbe bi ngenane bebo minsem, Krist a nga zu wu asu dangan.
9 Nde, jôme ja dañ é ne na, mbôl éyoñe ji, bi biya mekabe na bi ne zôsô amu metyi mé, bia ye nyiibane mfa’a ya ayaa Zambe a zene jé.
10 Amu nge éyoñe bi mbe besiñe bi nga kui na bi late ngbwa a Zambe a zene ya awu Mone wé, ngumane ki éyoñe ji, bia ye bi ényiñ a zene ya ényiñe jé, éyoñe bi lateya ngbwa a nye ji.
11 Sa ke ve amu jam éte, ve bia va’a fe be Zambe a zene ya be Tate wongane Yésus Krist, nnye ate a nga bo na bi beta late ngbwa a Zambe.
12 Jôme te nje, fo’o ve a zene ya môte wua, nsem ô nga nyiine be bôte bese ya si a awu é nga mialane be bôte bese amu bese be nga sem.
13 Amu nsem ô mbe be bôte bese ya si ôsusua na Metiñe me Moïse ma so, ve môt éziñ a nji nyoñe mekua amu nsem ôsusua na Metiñe me Moïse ma so.
14 Amu awu da jôé ane njô bôt, ataté be Adam akekui be Moïse, to’o be ba be nji bo avale nsem Adam a nga tyame metiñ, nnye ate a funane nyu a mbe na a yiane so.
15 Ve nsela’ane a ne zañe mvean a ékop. Nge amu ékobe môte wua, abui bôt é nga wu, ngumane ki beta mvame Zambe a mvean ô ne zezé, a zene ya beta mvame môte wua Yésus Krist a yian* asu abui bôt.
16 Nde fe, mvean ô ne zezé wo selan a avale mame me nga boban a zene ya môte wua a nga bo nsem, amu ntyi’ane mejô ô nga boban asu ékobe ya môte wua é mbe mekua, ve Zambe a nga ve mvean éyoñ abui bôt é boya nsem a amu jam éte, Zambe a yene bone be bôt ane bezôsô!
17 Amu nge a zene ya ékobe môte wua, awu da jôé ane njô bôt a zene ya be nye, abim avé ki ba ba nyoñe beta mvame Zambe a mvean ô ne zezé ya zôsô ba ye jôé ane bejô bôt a zene ya be môte wua Yésus Krist.
18 Nde aval ékobe môte wua é nga bo na bôte bese be bi mekua, avale te nde fe mbamba jame wua a nga bo na bôte bese be bi mekabe na be ne zôsô asu ényiñ.
19 Fo’o ve aval ane melo me môte wua me nga bo na abui bôt é bo bebo minsem, avale da fe mewô’ô me môte wua ma ye bo na abui bôt é loobane zôsô.
20 Nde Metiñe me Moïse me nga so asu na ékop é kôme tu’a yené ne fômelé, ve vôme nsem ô ne abui nne fe beta mvame Zambe a kôme tu’a yené valé.
21 Mfi ôvé? Asu na, fo’o ve avale nseme wo jôé awu, aval éte fe beta mvame Zambe a ne jôé a zôsô a kee bôt ényiñe ya nnôm éto a zene ya be Yésus Krist Tate wongan.
Notes
^ Be ne fe jô na, “bi bili mvo’é.”
^ Be fe jô na, “bia vak.”
^ Be ne fe jô na, “bia vak.”
^ Nge ke, “fuluku.”
