Becolossien 1:1-29
1 Ma Paul, nlômane Krist Yésus amu nkômbane Zambe, bia monyañe wongane Timothée bi ne nsamba.
2 Ma tili mintoban a bobejañe ba yeme ba’ale élate be ne beyé’é be Krist, be ne Colosses kalate nyi:
Beta mvame Zambe, Ésa wongan a mvo’é jé bi tabe’e be mia.
3 Éyoñ ése bia ye’elan ajô denan, bia ve Zambe, Ésa Tate wongane Yésus Krist akiba.
4 Bia ve Zambe akiba amu bi nga wô’ô nkañete ya mbunane mia buni Krist Yésus a nye’ane mia nye’e mintobane mise
5 amu ma’ane ma yange mia yôp été. Mi nga taté wô’ô be kobô’ô ajô ya été a zene ya mbamba foé ya benya mejôô
6 a nga katebane be mia. Aval ane da bobane si ése, mbamba foé a yametan a wume fe bibuma be mia, ataté môse mi nga wôk a tu’a yem atinane ya beta mvame Zambe.
7 Épaphras, môte bia be nye bia bo ésaé, nnye a nga ve mia ñye’elan ôte; a nga bo de señe jangan aval ane mbamba mbo ésaé Krist.
8 Nnye fe a nga kate bia abime nye’ane ngule Zambe* ja ve mia na mi bi.
9 Amu nalé, ataté môse bi nga wô’ô de, bia ye’elane mban a sili Zambe na mi tu’a yeme nkômbane wé, a na mi bo njalan a fek ése a wô’ô mame ya nsisim,
10 na mi bi ntabane Yéhôva* a kañese, a wu wo ve nye nleme mvaé mimfa’a mise, nté mia ke ôsu a wume mbamba bibuma mimfa’a mise a kô’ôlane nya ñyemane mi nga yeme Zambe;
11 a na Zambe a ke ôsu a ve mia ngule jé asu ya na mi bo mbane ya jibi, mi jibi fe a mevak, amu ngule jé é ne étua anen,
12 nté mia ve Ésa akiba, nnye a nga bo na, mi bo ngule ya bu’ubane ma’ane ma yange mintoban, mmie mi ne éfufup été.
13 A nga vaa bia dibi si,* a kee bia éjôé ya Mone wé a nye’e,
14 a zene ya be Mone wé, bi nga kôtéban amu ntañ, bia bi fe njamane ya minseme miangan.
15 Nnye a ne éfunane ya Zambe a ne teke yené, atata’a* ya ntéane biôm ôse;
16 amu biôme bise bivo’o bi nga téban a zene jé, biôme ya yôp a bi ya si, biôme bia yené a bi bi ne te yené, to’o bijôé nge bito bi njôan, nge bengovina nge bôte ya éjôé. Biôme bivo’o bise bi nga téban a zene jé a asu dé.
17 Nde fe a mbe valé ôsusua na biôme bivo’o bise bia téban, a biôme bivo’o bise bi nga téban a zene jé,
18 a a ne nlô ya nyul, nje é ne ékôane bekristen.* A ne atata’a, ntôle ya bewu, na a bo môt ôsu ya biôme bise;
19 amu Zambe a nga yene mvaé na mefulu mé* mese me yené be nye.
20 A nga yene fe mvaé na, a zene ya be Yésus, biôme bise bivo’o bi tabe mvo’é a nlatane be Zambe a zene ya metyi Yésus a nga sôé élé mintaé* yôp, to’o biôme bi ne yôp, nge ke bi bi ne si.
21 Ajô te, mia mi mbe ôyap a Zambe, a mi mbe fe besiñe bé amu asimesane denan ése é mbe é kele’e ve mbia mimboon,
22 ve éyoñe ji, a boya na mi beta lat a Zambe a zene ya nyule minsône ya nyu a nga kañese wu, asu na a zen éte, mi bo ngule ya ke tebe asu dé, mi too mfuban, teke ayeñ a teke bijô.
23 Nalé a ye bobane nge mia ke ôsu a ba’ale mbunane wônan, nge mia yeme ne zeñ, teke jañele ndi nleme ya mbamba foé mi nga wôk, mbamba foé a nga katebane be bitétéa bise bi ne yôbe si. Ma Paul, me ne nkalane ya mbamba foé ate.
24 Éyoñe ji, ma va’a na ma tôbane minjuk amu mvo’é jenan. Ma yeme na me bili nkômbane ya ke ôsu a tôbane minjuk amu mi ne ngabe jia ya nyule Krist. Minju’u mite mia ye bo jam é ne mvaé asu nyule Krist, nje éte é ne ékôane bekristen.
25 Me nga bo mbo ésaé* ya ékôane bekristen éte, aval ane ésaé Zambe a nga ve ma é ne asu mvo’é jenan, na me kañete mejô me Zambe ngumba ngumba.
26 Nsolane jam ô ne étyi ô nga tabe nsolan asu biyoñe ya mvus,* a miaé mi bôte ya melu mvus. Ve den, ô kulibaneya be mintoban,
27 Zambe a nga yene mvo’é na, e meyoñe mese, mintobane mi yem étôtok akume ya nsolane jam ôte, ñwô ô ne na, Krist a bo jôme jia a mia, ndi nleme ya étôto’o jé.
28 Ajô dé nde bia kañete a ve môt ase abendé, a ye’ele môt ase a fek ése, na bi bo ngule ya volô môt ase e Krist été, na a bo étôtôlô a liti nye be Zambe.
29 Jôme te nje ma saé a ngule jam ése, me ju’ane fe a mvolane ya ngule jé, nje ja bo ésaé be ma.
Notes
^ Nkobô Grec, “nsisim.”
^ Lañe’e Atinane bifia.
^ Nkobô Grec, “A nga vaa bia éjôé ya dibi.”
^ Nkobô Grec, “ntôle mon.”
^ Nge ke, “akônda; kirké.”
^ Nalé a tinane na, mefulu me Zambe.
^ Lañe’e Atinane bifia.
^ Éfia Grec, “diakonos.” Éfia Latin, “minister.”
^ Bifia ya nkobô Grec be nga belane bie va bi ne “bimo” amu bi ne abui.
