Ôsusua na a zu wu, Yésus a nga jô na: “Mbamba foé ya [Ejôé] Zambe nyô a ye katebane si se, a ye bo meyoñe mese ndem ; wôna asu’ulan de aye bo.” (Matthieu 24:14) Ésaé te é nga ye boban aya? Yésus a nga li’i éve’ela bi ne tôñ éyoñ a nga too si va.​—Luc 8:1.

Bia jeñe bôte menda map. Yésus a nga liti beyé’é bé ane ba kañete mbamba foé menda menda. (Matthieu 10:11-13; Mam minlôman 5:42; 20:20) Bekañete mbamba foé y’ôsusua be mbe be bili ngumba afôla si ya kañete. (Matthieu 10:5, 6; 2 Becorinthien 10:13) Dene fe, ésaé nkañete jangan é ne nta’an, a akônda ése é bili ngumba vôme ya kañete. Nalé ate a volô bia na, bi jalé atiñe Yésus a nga ve bia na bi ‘kañete bôte mejô me Zambe.’​—Mam minlôman 10:42.

Bia jeñe bôte vôm ase. Yésus a mbe a kañete vôm ase a koone bôte: mfôme mañ, e fefel anjeñ. (Marc 4:1; Jean 4:5-15) Bia fe bia kañete bôte Mejô me Zambe vôm ase bi ne koone be: minjoñe minjoñ, menda bisaé, mefup, bi ne fe loone be e téléfôn. Bia kañete fe bôte be too bia mefefel, bôte bia be be bia saé, ba ya sikôlô wongan a bivuvumane biangan. Bizu’u bi bôte ya mesi mese bi kuiya na bi awô’ô ‘mbamba foé ya ényiñ’ a zene ya nkañete wongan. ​—Besam 96:2.

Ye ô bili môt éziñ ô ne kañete mbamba foé ya Éjôé Zambe a mbamba be mame Éjôé te ja ye soo bia melu ma zu? Te ba’ale avale mbamba foé te ve asu dôé. Kate fe bôte bevok.

• “Mbamba foé” mbé a yiane katebane?

• Aval avé Bengaa be Yéhôva ba vu Yésus nkañete?