Hadamaden tɔw danfara la, Yesu ye a ka ɲɛnamaya kɛ sankolo de la i n’a fɔ hakilimaa sani a ka bange dugukolo kan. (Yuhana 8:23) Ale de kɛra danfɛn bɛɛ la fɔlɔ bangelen ye, ani a ye Ala dɛmɛ ka fɛn tɔw bɛɛ da. Ale kelenpe de dara Jehova fɛ k’a sɔrɔ a ma tɛmɛ fɛn si sababu fɛ, wa o kama ale kelenpe dɔrɔn de bɛ se ka wele ko “Denkɛ kelenpe”. (Yuhana 1:14) Yesu tun ye Ala ka kumalasebaga ye, o de kama a bɛ wele ko “kuma”.—Ntalenw 8:22, 23, 30; Kolosekaw 1:15, 16 kalan.

Ala ye a denkɛ ci ka na dugukolo kan a kɛlen ka a ka ɲɛnamaya bɔ sankolo la ka na o bila Yahutumuso dɔ wolonugu la min tun ma cɛ dɔn, n’a tun tɔgɔ ye ko Mariyama. O la, Fa hadamadenlama tɛ Yesu la. (Luka 1:30-35) Yesu nana dugukolo kan (1) walasa ka mɔgɔw kalan tiɲɛ kan Ala ko la, (2) walasa ka Ala sago kɛ kɛcogo la min bɛ a kɛ an bolo misali ye hali ni o y’a sɔrɔ gɛlɛya bɛ an kan, ani (3) walasa ka a ka ɲɛnamaya dafalen di ka kɛ “kunmabɔ sara” ye.—Matiyu 20:28 kalan.

Kunmabɔ sara ye sara ye min bɛ sara mɔgɔ dɔ Ni kun kɔrɔ walasa ka a bɔ bolo la. (Ekisode 21:29, 30) Ala ye diɲɛ da tuma min na, saya ni kɔrɔya tun tɛ a ka kuntilenna ye ka ɲɛsin hadamadenw ma. An bɛ o dɔn cogo di? Ala ye a fɔ cɛ fɔlɔ Hadama ye, ko ni a ye ko kɛ Bibulu b’a fɔ min ma ko jurumu, a bɛna sa. O la ni Hadama tun ma jurumu kɛ, a tun tɛna sa abada. (Jɛnɛse 2:16, 17; 5:5) Ka kɛɲɛ ni Bibulu kuma ye, saya “donna” diɲɛ kɔnɔ Hadama de sababu la. O cogo la, Hadama ye jurumu lase a bɔnsɔn  bɛɛ ma ani saya, o min ye jurumu sara ye. O de kama an mago bɛ kunmabɔ sara la walasa ka an tila ka bɔ saya la, an ye o min sɔrɔ Hadama fɛ.—Romɛkaw 5:12; 6:23 kalan.

Jɔni tun bɛ se ka kunmabɔ sara di walasa ka an bɔ saya bolo? Ni anw sara, an bɛ an ka jurumu hakɛw dɔrɔn de sara. Hadamaden dafabali si tɛ se ka mɔgɔ wɛrɛw ka jurumu kunmabɔ sara di.—Zaburu 49:8-10 kalan.

Danfara min bɛ Yesu ni anw cɛ, o ye ko a dafalen don. Ale tun mago tɛ ka sa a ka jurumuw kama ka d’a a kan—jurumu tun tɛ a la. O la Yesu sara mɔgɔ wɛrɛw ka jurumuw de kama. Ala ye kanuya de jira Hadamadenw na min ɲɔgɔn tɛ yen, a kɛlen ka a Denkɛ ci o ka na sa an kosɔn. Yesu fana ye a ka kanuya de jira an na a kɛlen k’a Fa kan minɛ ka a yɛrɛ Ni di an ka jurumuw kama.—Yuhana 3:16; Romɛkaw 5:18, 19 kalan.

Wideyo lajɛ min tɔgɔ ye ko Mun na Yesu sara?

Ka Yesu to dugukolo kan, a ye banabaatɔw kɛnɛya, a ye suw lakunun, ka dɛsɛbaatɔw dɛmɛ. O kow fɛ, Yesu ye a jira a bɛna ko minnu kɛ don nataw la hadamadenw ye, minnu bɛ kanminɛli kɛ. (Matiyu 15:30, 31; Yuhana 5:28) Yesu salen kɔ, Ala y’a Ni segin a ma i n’a fɔ hakilimaa. (Efesekaw 1:20) O kɔ Yesu ye makɔnɔni kɛ Ala kini fɛ, fɔ a ye sebaaya di a ma walasa a ka mara kɛ dugukolo bɛɛ kan i ko Masakɛ. (Heburuw 10:12, 13) Sisan, Yesu ye Masakɛ ye sankolo la, wa a ka kalandenw b’a la k’o kibaru duman waajuli kɛ diɲɛ yɔrɔ bɛɛ la.—Daniɛl 7:13, 14; Matiyu 24:14 kalan.

Sɔɔni Yesu bɛna baara kɛ ni a ka sebaaya ye i n’a fɔ Masakɛ walasa ka tɔɔrɔ bɔ dugukolo kan ani fɛn minnu ye tɔɔrɔ sababu ye. O la mɔgɔ minnu bɛ dannaya da Yesu kan u kɛtɔ ka a kan minɛ, olu bɛna ɲɛnamaya diyabɔ dugukolo alijɛnɛma kɔnɔ.—Zaburu 37:9-11 kalan.