An dabaga ye hakilitigi ye ka tɛmɛ an kan. I n’a fɔ Fa, kanuya bɛ min na a bɛ a janto an na. O la, Ala tun t’a fɛ an k’an ka yɛrɛmahɔrɔnya ta ale kan. (Jeremi 10:23) I n’a fɔ denmisennin mago bɛ a bangebagaw ka ɲɛminɛli la cogo min na, o cogo la an fana mago bɛ Ala ka ɲɛminɛli la. (Esayi 48:17, 18) Bibulu sariyakolow b’an ɲɛminɛ, o ye nilifɛn ye min bɔra Ala yɔrɔ.—2 Timote 3:16 kalan.

Jehova ka sariyaw ni a ka sariyakolow b’an kalan kabini sisan ɲɛnamaya kɛcogo ɲuman na, ani a b’a jira an na cogo min na an bɛ se ka ɲɛnamaya banbali nilifɛn sɔrɔ don nataw la. Ka d’a kan Ala ye an da, a ka kan, an k’a jira ko a ka an ɲɛminɛ, o ka di an ye.—Zaburu 19:8, 12; Jirali 4:11 kalan.

Bibulu sariyakolow ye tiɲɛ kuma nafamaw ye. Jamana dɔw la sariyaw bɛ di ka kɛɲɛ ni kow kɛrɛnkɛrɛnnen dɔw ye. (Dutɛrɔnɔmɛ 22:8). O la, anw de ka kan ka anw hakili la baara walasa k’a dɔn sariya kolo min ka kan ka bato ka kɛɲɛ ni o ko kɛrɛnkɛrɛnnen dɔw ye. (Ntalenw 2:10-12) Misali la, Bibulu bɛ an kalan ko ɲɛnamaya ye nilifɛn ye min bɔra Ala yɔrɔ. Nin sariyakolow bɛ se ka an ɲɛminɛ ni an bɛ baara yɔrɔ la, so walima taama na. O bɛna an bila an ka fɛɛrɛw tigɛ walasa ka an janto an Ni na.—Kɛwalew 17:28 kalan.

Yesu kumana sariyakolo fila kan minnu nafa bɛ tɔw ɲɛ. Sariyakolo fɔlɔ, o bɛ hadamadenw ka ɲɛnamaya kuntilenna de jira ni o ye —ka Ala dɔn, k’a kanu ani k’a bato ni kantigiya ye. An ka ko kɛtaw bɛɛ la, an ka kan ka an janto o sariyakolo fɔlɔ la. (Ntalenw 3:6) Mɔgɔ minnu bɛ o sariyakolo minɛ ni u dusukun ye,  olu bɛ teriya sɔrɔ ni Ala ye, ni hɛrɛ lakika ani ɲɛnamaya banbali.—Matiyu 22:36-38 kalan.

Sariyakolo filanan bɛ i dɛmɛ ka jɛɲɔgɔnya lafiyalen don i ni mɔgɔ tɔw cɛ. (1 Kɔrɛntekaw 13:4-7) Ka nin sariyakolo filanan sira taama, o ye ka Ala ladege a ka mɔgɔ minɛ cogo la.—Matiyu 7:12; 22:39, 40 kalan.

Bibulu sariyakolow bɛ denbayaw kalan u bɛ se ka kɛ kelen ye kanuya kɔnɔ cogo min na. (Kolosekaw 3:12-14) Ala ka kuma bɛ denbaya lakana fana, a kɛtɔ k’u kalan sariyakolo wɛrɛw la—minnu bɛ furu kɛ badaa furu ye.—Jenɛse 2:24 kalan.

Ka tugu Bibulu ka kalansenw kɔ, o bɛ se ka lakana di an ma bolofɛnw ani dusukun ta fan fɛ. Misali la, baara ɲɛmɔgɔ dɔw bɛ baarakɛlaw de fɛ min ka ɲɛnamaya ɲɛminɛnen bɛ Bibulu sariyakolow fɛ, minnu bɛ baara kɛ ni tilennenya ani timinandiya ye. (Ntalenw 10:4, 26; Heburuw 13:18) Ala ka kuma b’an kalan fana, an k’an wasa don fɛn na an tɛ ɲɛnamaya kɛ minnu kɔ, ani ka nafa bɔ teriya la ni Ala ye, o min ka fisa ni nafolotigiya ye.—Matiyu 6:24, 25, 33; 1 Timote 6:8-10 kalan.

Ka Bibulu ka sariyakolow sira taama o b’an ka kɛnɛya lakana. (Ntalenw 14:30; 22:24, 25) Misali la, Ka sɔn Ala ka sariyaw ma min bɛ dɔlɔtɔya kɔniya, o bɛ i lakana saya ni bana ani joginni ma. (Ntalenw 23:20) Jehova bɛ sɔn an ka dɔlɔ min, ni o ye a sɔrɔ an t’a min k’a dama tɛmɛ dɔrɔn de. (Zaburu 104:15; 1 Kɔrɛntekaw 6:10) An bɛ nafa bɔ sariyakolo ɲumanw na, an kɛtɔ k’u kalan, k’u mara an ka kɛwalew ani an ka miirinaw kama. (Zaburu 119:97-100) Krecɛn lakikaw bɛ Ala ka naamu tilennenw bonya u yɛrɛ ka nafa kama. Nka u b’o kɛ, ka d’a kan u bɛ Jehova bonya.—Matiyu 5:14-16 kalan.